రే-బాన్ మెటా గ్లాసెస్‌లో ఊహించని అప్డేట్.. ఇప్పుడిక దారి వెతకడం, మ్యూజిక్ వినడం సూపర్ ఈజీ!

Ray-Ban Meta Glasses: రే-బాన్ మెటా స్మార్ట్ గ్లాసెస్‌‌లో కొత్త ఫీచర్లు అందుబాటులోకి వస్తున్నాయి. వీటిలో వాకింగ్ నావిగేషన్, స్పేషియల్ ఆడియో, సౌండ్‌ను సర్దుబాటు చేసుకునే ఆప్షన్లు ఉన్నాయి. Meta AI యాప్ ద్వారా ఈ అప్‌డేట్స్ అందుతున్నట్లు సమాచారం. వెర్షన్ 128లో నావిగేషన్ ఫీచర్ రాగా.. వెర్షన్ 129లో ఆడియోకు సంబంధించిన కొత్త కంట్రోల్స్ చేరనున్నాయి.

వాకింగ్ నావిగేషన్..

Ray-Ban Meta గ్లాసెస్‌లో వెర్షన్ 128 అప్‌డేట్ ద్వారా వాకింగ్ నావిగేషన్ ఫీచర్ వస్తున్నట్లు సమాచారం. దీని సాయంతో యూజర్లు Meta AIని అడిగి తమ గమ్యస్థానానికి దారి తెలుసుకోవచ్చు. నడుస్తున్నప్పుడు ప్రతిసారీ ఫోన్ బయటకు తీసి మ్యాప్ చూడాల్సిన అవసరం తగ్గుతుంది. కనెక్ట్ చేసిన స్మార్ట్‌ఫోన్ లొకేషన్ ఆధారంగా ఈ ఫీచర్ పనిచేస్తుంది. గమ్యస్థానానికి చేరుకునే వరకు దారి సూచనలు పొందే అవకాశం ఉంటుంది.

Also Read: బోస్ సౌండ్ స్పీకర్లు, 165Hz డిస్‌ప్లేతో రెడ్‌మీ నుంచి మరో పవర్‌ఫుల్ ఫోన్!

ఫోన్‌తోనూ షేరింగ్..

యూజర్లు తమ ఫోన్‌లోని మ్యాప్స్ యాప్‌లో గమ్యస్థానాన్ని ఎంచుకుని, దాన్ని Meta AIతో షేర్ చేయవచ్చు. ఆ తర్వాత కనెక్ట్ చేసిన గ్లాసెస్‌ను ఎంచుకుంటే వాటి ద్వారా దారి సూచనలు పొందవచ్చు. ఒకవేళ ఎంచుకున్న ప్రదేశం నడిచి వెళ్లడానికి చాలా దూరంగా ఉంటే.. డ్రైవింగ్ దిశలను ఫోన్‌లో చూపించే అవకాశం ఉంది. దీంతో ప్రయాణంలో ఫోన్‌ను పదేపదే చూడాల్సిన పని తగ్గుతుంది.

స్పేషియల్ ఆడియో..

వెర్షన్ 128లో స్పేషియల్ ఆడియో ఫీచర్ కూడా వస్తున్నట్లు సమాచారం. ఇది సౌండ్ వినిపించే విధానాన్ని మరింత సహజంగా మార్చేందుకు ఉపయోగపడుతుంది. అయితే, ఈ ఫీచర్ అందరికీ ఎప్పుడు అందుబాటులోకి వస్తుందనే విషయంలో స్పష్టత లేదు. Meta AI యాప్ ద్వారా అప్‌డేట్ అందుతున్నందున యూజర్లకు ఫీచర్లు చేరే సమయం మారవచ్చు.

కొత్త ఆడియో కంట్రోల్స్..

వెర్షన్ 129లో మోనో ఆడియో, ఆడియో బ్యాలెన్స్ ఆప్షన్లు రానున్నాయి. మోనో ఆడియో ఆన్ చేస్తే రెండు స్పీకర్లలోనూ ఒకే సౌండ్ వినిపిస్తుంది. ఆడియో బ్యాలెన్స్‌తో ఎడమ లేదా కుడి స్పీకర్ వైపు సౌండ్‌ను మార్చుకోవచ్చు. వినికిడి అవసరాలకు అనుగుణంగా సౌండ్ సర్దుకోవడానికి ఇవి ఉపయోగపడతాయి. ఈ ఆప్షన్లు గ్లాసెస్ డివైస్ సెట్టింగ్స్‌లోని ఆడియో విభాగంలో ఉంటాయని సమాచారం. వెర్షన్ 129 అప్‌డేట్ ఇంకా దశలవారీగా అందుతోంది.

Also Read: వావ్.. స్మార్ట్‌వాచ్‌లో ఇలాంటి ఫీచర్లు కూడా ఉంటాయా? 51 రోజుల బ్యాకప్‌తో Amazfit T-Rex Dual Solar!