Smart Handbag: రంగులు మార్చే ఊసరవెల్లి బ్యాగ్ ఇది.. జస్ట్ ఇలా చేస్తే నచ్చిన డిజైన్‌, కలర్‌కు మారిపోద్ది

Smart Handbag: ఫ్యాషన్ అంటే దుస్తులు, హ్యాండ్‌బ్యాగ్‌లు, షూస్ వరకే పరిమితమైందని మనం ఇప్పటివరకు అనుకున్నాం. టెక్నాలజీ అంటే ఫోన్‌లు, గాడ్జెట్లు మాత్రమే అనుకున్నాం. కానీ ఇప్పుడు ఈ రెండింటి మధ్య ఉన్న గీత పూర్తిగా మాయమవుతోంది. ఒకే హ్యాండ్‌బ్యాగ్‌లో మీకు నచ్చిన రంగు, డిజైన్, ఫోటో, ఆర్ట్‌వర్క్ అన్నీ క్షణాల్లో మారిపోతే ఎలా ఉంటుంది అనే ఆలోచన ఇప్పుడు నిజం అవుతోంది. ఫ్యాషన్ షోల్లో మాత్రమే చూసిన కాన్సెప్ట్ ఇప్పుడు మార్కెట్‌లోకి రావడానికి సిద్ధమవుతోంది. అదే ఇన్ఫినిటీ స్మార్ట్ హ్యాండ్‌బ్యాగ్.

ఈ బ్యాగ్‌ను ఎవరు డిజైన్ చేశారు?

కొన్ని సంవత్సరాల క్రితం లగ్జరీ ఫ్యాషన్ షోల్లో టెక్నాలజీతో కలిసిన హ్యాండ్‌బ్యాగ్‌లు చూసి ఇది కేవలం షోపీస్ అనుకున్నాం. కానీ ఇప్పుడు అదే ఆలోచన నిజంగా కొనుగోలు చేసే స్థాయికి వచ్చింది. ఫ్రాన్స్‌కు చెందిన ప్యూటీ (Peuty) అనే సంస్థ ఈ ఇన్ఫినిటీ హ్యాండ్‌ బ్యాగ్‌ను రూపొందించింది. ఈ సంస్థను స్థాపించిన వ్యక్తి రిచర్డ్ ప్యూటీ. ఫ్యాషన్‌లో కొత్త దారులు తెరవాలనే ఆలోచనతో ఈ ప్రాజెక్ట్‌ను ముందుకు తీసుకొచ్చారు.

ఇన్ఫినిటీ బ్యాగ్‌లో ఉండే ప్రత్యేకత ఏమిటి?

ఇది సాధారణ హ్యాండ్‌బ్యాగ్ కాదు. బయట నుంచి చూస్తే ప్రీమియమ్ ఫుల్ గ్రెయిన్ లెదర్‌తో తయారైన లగ్జరీ బ్యాగ్‌లానే కనిపిస్తుంది. కానీ అసలు మ్యాజిక్ ముందు భాగంలో ఉంటుంది. ఈ బ్యాగ్‌లో ఓఎల్‌ఈడి స్క్రీన్ ఉంటుంది. ఆ స్క్రీన్‌పై మీకు నచ్చిన రంగులు, డిజైన్‌లు, ప్యాటర్న్‌లు కనిపిస్తాయి. మీరు బ్యాగ్ మార్చాల్సిన అవసరం లేకుండా బ్యాగ్ లుక్‌ను మాత్రమే మార్చుకోవచ్చు.

ఒక్క టచ్‌తో పూర్తిగా మారిపోయే బ్యాగ్ లుక్

ఈ హ్యాండ్‌బ్యాగ్‌కు ప్రత్యేకంగా రూపొందించిన ఇన్ఫినిటీ యాప్ ఉంటుంది. ఆ యాప్ ద్వారా మీరు స్క్రీన్‌పై ఏం చూపించాలో మీరే నిర్ణయించవచ్చు. ముందే ఉన్న డిజైన్‌ల లైబ్రరీ నుంచి ఎంచుకోవచ్చు. మీకు నచ్చిన ఆర్ట్‌వర్క్ అప్లోడ్ చేయవచ్చు. మీ ఫోన్‌లో ఉన్న ఫోటోను కూడా బ్యాగ్‌పై చూపించుకోవచ్చు. ఒక్క టచ్‌తో బ్యాగ్ లుక్ పూర్తిగా మారిపోతుంది. పార్టీకి వెళ్తే ఒక డిజైన్, ఆఫీస్‌కు వెళ్తే మరో డిజైన్, ట్రావెల్‌లో ఇంకో లుక్ అన్నట్టు రోజుకు ఎన్నిసార్లైనా మార్చుకోవచ్చు.

Also Read: Vanga’s 2026 predictions: 2026 ఇంత భయానకంగా ఉంటుందా? బాబా వంగ చెప్పిందే జరుగుతుందా? వామ్మో!

లెదర్ క్వాలిటీ, ప్రీమియమ్ ఫీలింగ్

టెక్నాలజీ ఉన్నా సరే లగ్జరీ ఫీలింగ్ తగ్గకూడదనే ఉద్దేశంతో ఈ బ్యాగ్‌ను ఫుల్ గ్రెయిన్ లెదర్‌తో తయారు చేశారు. ఇది సాధారణ లెదర్ కంటే ఎక్కువ కాలం నిలిచే రకం. చేతిలో పట్టుకున్నప్పుడు సాఫ్ట్ టచ్, ప్రీమియమ్ ఫినిష్ స్పష్టంగా కనిపిస్తుంది. టెక్ బ్యాగ్ అయినా సరే ఇది పూర్తిగా ఫ్యాషన్ యాక్సెసరీలా కనిపించడమే దీని ప్రత్యేకత.

బ్యాటరీ, వైర్లెస్ చార్జింగ్

ఇలాంటి స్క్రీన్ ఉన్న బ్యాగ్ అంటే బ్యాటరీ పెద్ద సమస్య అనిపిస్తుంది. కానీ కంపెనీ చెబుతున్న వివరాల ప్రకారం, ఈ బ్యాగ్ బ్యాటరీ కొన్ని రోజులు పనిచేస్తుంది. మీరు ఎంత ఎక్కువగా డిజైన్ మార్చుతారు అనేదానిపై బ్యాటరీ లైఫ్ ఆధారపడి ఉంటుంది. చార్జింగ్ విషయంలో కూడా వైర్లు అవసరం లేదు. వైర్లెస్ చార్జింగ్ సపోర్ట్ ఉంటుంది. అంటే ఫోన్‌లా చార్జింగ్ ప్యాడ్‌పై పెడితే సరిపోతుంది. ఇన్ఫినిటీ బ్యాగ్ మూడు బేస్ కలర్‌లలో అందుబాటులోకి రానుంది. వైట్, బ్లాక్, బీజి రంగు (Beige color)ల్లో ఈ బ్యాగ్ వస్తుంది. బయట లెదర్ కలర్ సింపుల్‌గా ఉండి, స్క్రీన్ ద్వారా రంగుల ఆట మొత్తం కనిపించేలా డిజైన్ చేశారు. ఇది క్లాసిక్ లుక్ ఇష్టపడే వాళ్లకు కూడా నచ్చేలా చేస్తుంది.

బ్యాగ్ ధర – లాంచ్ ఎప్పుడు?

ఈ బ్యాగ్ ధర ఇప్పటి వరకు అధికారికంగా ప్రకటించలేదు. అంతేకాదు, ఈ బ్యాగ్‌ను నేరుగా షాపుల్లోకి తీసుకురావడం లేదు. ముందుగా కిక్‌స్టార్టర్ క్యాంపెయిన్ ద్వారా లాంచ్ చేయాలని ప్లాన్ చేస్తున్నారు. ఈ క్యాంపెయిన్ CES 2026 సమయంలో లైవ్ అవుతుంది. అంటే టెక్నాలజీ ప్రపంచంలోనే అతిపెద్ద ఈవెంట్‌లో ఈ ఫ్యాషన్ టెక్ బ్యాగ్‌ను పరిచయం చేయబోతున్నారు. అక్కడ నుంచి దీనికి ఎంత డిమాండ్ వస్తుందో అన్నది క్లియర్ అవుతుంది.

ఫ్యాషన్ ప్రపంచంలో హాట్ టాపిక్‌

ఇక్కడ అసలు ప్రశ్న ఇదే. ఒకే బ్యాగ్‌తో ఎన్నో లుక్‌లు మార్చుకోవచ్చు అంటే ఇది లగ్జరీ కంటే ఒక కొత్త ఎక్స్‌పీరియన్స్‌లా మారుతుంది. ఫ్యాషన్‌ను వ్యక్తిత్వంతో కలపాలనుకునే వాళ్లకు ఇది చాలా ఆకర్షణీయంగా ఉంటుంది. సోషల్ మీడియా కోసం, ఈవెంట్‌ల కోసం, ప్రత్యేకమైన స్టైల్ చూపించాలనుకునే వాళ్లకు ఇది స్టేట్‌మెంట్ పీస్‌గా మారే అవకాశం ఉంది. మరోవైపు ఇది అందరికీ అవసరమా అనే ప్రశ్న కూడా ఉంటుంది. కానీ ఫ్యాషన్ ప్రపంచం ఎప్పుడూ అవసరం కంటే కొత్తదనం వైపే అడుగులు వేస్తుంది. ఇది ఫ్యాషన్ టెక్నాలజీ కలిసే దిశను చూపించే సంకేతం. ఇప్పుడు ప్రశ్న ఒక్కటే… మీ చేతిలో ఉండే ఈ కస్టమైజ్ చేసుకునే హ్యాండ్‌ బ్యాగ్‌ను మీరు ఎంతగా కోరుకుంటున్నారు? అనేది. ధర ఎంత ఉన్నా సరే, ఈ బ్యాగ్‌ను కొనేందుకు ఎంతమంది ముందున్నారనేది ఫ్యాషన్ ప్రపంచంలో హాట్ టాపిక్‌గా మారింది.