Solar AC in India: తెలుగు రాష్ట్రాల్లో ఎండలు మండిపోతున్నాయి. ఫిబ్రవరి మూడో వారంలో ఉన్నప్పటికీ ఉష్ణోగ్రతలు మార్చి నెలను తలపిస్తున్నాయి. ఈ నేపథ్యంలో ఉక్కపోత నుంచి తప్పించుకునేందుకు ప్రజలు ఏసీలను ఆశ్రయిస్తున్నారు. అయితే చాలా మంది రెగ్యులర్ ఏసీలు కొనుగోలు చేస్తుంటే మరికొందరు మాత్రం సోలార్ ఏసీలపై దృష్టిసారిస్తున్నారు. ఈ నేపథ్యంలో సోలార్ ఏసీలకు సంబంధించిన లాభ నష్టాలు? అవి ఏవిధంగా పనిచేస్తాయి? ధర వివరాలు? వంటి అంశాలను తెలుసుకునే ప్రయత్నం చేద్దాం.
సోలార్ ఏసీలు ఇంటి పైకప్పుపై అమర్చిన సోలార్ ప్యానెల్స్ కు కనెక్ట్ చేయబడి ఉంటాయి. ఈ ప్యానెల్స్ సూర్యరశ్మిని విద్యుత్ శక్తిగా మార్చి ఏసీలోని కూలింగ్ వ్యవస్థ పనిచేసేలా సాయపడతాయి. ఈ ప్యానెల్స్ సాధారణంగా 1.5 టన్ ఏసీకి 1.5 – 3 kW సామర్థ్యాన్ని కలిగి ఉంటాయి. ఎండ ఉన్న సమయంలో ఈ ఏసీలు.. సోలార్ విద్యుత్ ను ఉపయోగించుకొని పనిచేస్తాయి. రాత్రి వేళల్లో లేదా దట్టమైన మేఘాలు కమ్ముకున్న సమయాల్లో దానంతట అదే గ్రిడ్ పవర్ కు మారిపోతుంది. గ్రిడ్ పవర్ కోసం సోలార్ ఏసీలకు బ్యాటరీలను ఉపయోగించుకోవచ్చు. ఇవి పగటి పూట సూర్య రశ్మిని సేకరించి దానిని సోలార్ పవర్ రూపంలో బ్యాటరీలో స్టోర్ చేస్తాయి.
సాధారణ ఏసీలతో పోలిస్తే సోలార్ ఏసీలు పర్యావరణ పరంగా, ఆర్థికపరంగా ఎంతో ప్రయోజనకరంగా ఉంటాయి. పగటి పూట ఏసీ వాడకానికి అవసరమైన విద్యుత్ లో 50-90 శాతం సోలార్ నుంచే వినియోగించుకుంటుంది. తద్వారా విద్యుత్ బిల్లును ఆదా చేస్తుంది. హైదరాబాద్ వంటి నగరాల్లో సోలార్ ఏసీ ద్వారా నెలకు రూ.1500-3000 వరకూ ఆదా చేసుకోవచ్చు. మరోవైపు సాధారణ ఏసీలు రన్నింగ్ సమయంలో కర్బన ఉద్గారాలను గాలిలోకి విడుదల చేస్తాయి. వాటితో పోలిస్తే సోలార్ ఏసీలు పర్యావరణహితంగా పనిచేస్తాయి. మరోవైపు సోలార్ ఏసీలను కొనుగోలు చేస్తే పీఎం సూర్య ఘర్ స్కీమ్ కింద కేంద్రం సబ్సిడీ సైతం ఇస్తోంది. అటు సాధారణ ఏసీలతో పోలిస్తే.. వీటి లైఫ్ టైమ్ చాలా ఎక్కువ. సోలార్ ప్యానెల్స్ 25 ఏళ్లకు పైగా పనిచేస్తాయి.
సోలార్ ఏసీలకు లాభాలతో పాటు కొన్ని నష్టాలు సైతం ఉన్నాయి. సాధారణ ఏసీలతో పోలిస్తే ఇది 2-3 రెట్లు ఖరీదైనవి. సోలార్ ప్యానెల్స్ నిర్మాణం కోసం ఇంటి పైకప్పుపై 100-300 చదరపు అడుగుల స్థలం తప్పనిసరి. హైదరాబాద్ వంటి నగరాల్లో అపార్ట్ మెంటుల్లో జీవించే వారికి ఇది కష్టంగా మారవచ్చు. అలాగే శీతాకాలం, వర్షాకాలంలో సోలార్ ఏసీ పనితీరు గణనీయంగా మందగిస్తుంది. దీని వల్ల గ్రిడ్ బిల్ పెరిగిపోవచ్చు. అలాగే మెయింటెనెన్స్ కూడా కొందరికి కష్టంగా అనిపించవచ్చు. మరోవైపు సోలార్ ప్యానెల్స్ ను 3-6 నెలలకు ఒకసారి శుభ్రం చేయాల్సి ఉంటుంది. అలాగే వాటిపై దుమ్ము, దూళి పేరుకుపోకుండా ఎప్పటికప్పుడు జాగ్రత్తలు తీసుకోవాల్సి వస్తుంది. సాధారణ ఏసీలతో పోలిస్తే.. సోలార్ ఏసీల్లో కూలింగ్ కాస్త నెమ్మదిగా ఉంటుందన్న అభిప్రాయాలు కూడా ఉన్నాయి.
సోలార్ ఏసీల ధరలు.. సైజు (1 లేదా 2 టన్), ప్యానెల్స్ సామర్థ్యం (1.5 – 3 kW), బ్యాటరీల పరిమాణంపై ఆధారపడి ఉంటుంది. మార్కెట్ లో రూ.1.2 లక్షల నుంచి రూ.3.5 లక్షల వరకూ (సబ్సిడీ లేకుండా) సోలార్ ఏసీలు పలుకుతున్నాయి. ఎక్కువ మంది వినియోగించే 1.5 టన్ ఏసీకి రూ. 1.5 – 2.5 లక్షలు ఖర్చు అవుతుంది. అదే కేంద్ర రాష్ట్ర ప్రభుత్వాలు ఇచ్చే సబ్సిడీ లభిస్తే.. వాటి ఖరీదు రూ.80,000 నుంచి రూ.2 లక్షల వరకూ తగ్గుతుంది. సోలార్ ఏసీతో విద్యుత్ బిల్లు భారం గణనీయంగా తగ్గినప్పటికీ వీటి మెయింటెనెన్స్ కోసం ఏడాదికి రూ.5,000 – 10,000 వరకూ ఖర్చు చేయాల్సి ఉంటుంది.
Share
K P Vivekanand: రాజకీయ భిక్ష పెట్టిన కేసీఆర్ను మోసం చేస్తారా?.. కడియంపై వివేకానంద ధ్వజం
Chiranjeevi Viswanath: ఆ సినిమా కోసం మెగాస్టార్ చిరంజీవి చెప్పులు కుట్టడం నేర్చుకున్నారు.. నిర్మాత ఏడిద శ్రీరామ్
