Hyderabad Rain Alert: హైదరాబాద్‌కు రెడ్ అలర్ట్.. భారీ ఉరుములు, వడగళ్ల వానలు !

Hyderabad Rain Alert: హైదరాబాద్ నగరవాసులకు వాతావరణ శాఖ అత్యంత కీలకమైన తీవ్ర ఉరుములతో కూడిన వర్షం హెచ్చరికను జారీ చేసింది. గత ఏడు రోజులుగా భానుడి భగభగలతో ఉడికిపోతున్న నగరంలో, వాతావరణం ఒక్కసారిగా మారిపోయింది. వాతావరణ పీడనంలో ఏర్పడిన మార్పుల వల్ల ప్రెజర్ కుక్కర్ పరిస్థితి ఏర్పడిందని, అది ఇప్పుడు ఉరుములు, మెరుపులతో కూడిన భారీ వర్షాలుగా మార‌నుంద‌ని అధికారులు హెచ్చరిస్తున్నారు. హైద‌రాబాద్ లో పలు ప్రాంతాల్లో ఇప్ప‌టికే వ‌ర్షం మొద‌లైంది.

రానున్న గంట వ్యవధిలో కుత్బుల్లాపూర్, గాజులరామారం, అల్వాల్, కాప్రా, మల్కాజిగిరి, సికింద్రాబాద్, నాచారం, దమ్మాయిగూడ, చర్లపల్లి, బొల్లారం, ఎల్బీ నగర్, హయాత్‌నగర్, బీఎన్ రెడ్డి నగర్ వంటి ప్రాంతాల్లో అత్యంత తీవ్రమైన ఉరుములు, మెరుపులతో కూడిన వర్షం పడనుంది. ఈ తుపాను మేఘాలు క్రమంగా నగరం మధ్యభాగం, దక్షిణ హైదరాబాద్ ప్రాంతాలకు కూడా విస్తరించనున్నాయి. కొన్ని ప్రాంతాల్లో వడగళ్ల వాన కురిసే అవకాశం కూడా ఉంది కాబట్టి ప్రజలు అప్రమత్తంగా ఉండాలి.

నగరంతో పాటు తెలంగాణ గ్రామీణ జిల్లాలకు కూడా భారీ వర్ష సూచన ఉంది. ప్రస్తుతం సిరిసిల్ల, కామారెడ్డి, సంగారెడ్డి జిల్లాల్లో ఉరుములతో కూడిన భారీ వర్షాలు కురుస్తున్నాయి. ఇవి మరో రెండు గంటల పాటు కొనసాగి, ఆ తర్వాత సిద్దిపేట, కరీంనగర్, మెదక్ జిల్లాలకు విస్తరించనున్నాయి. అలాగే రంగారెడ్డి, వికారాబాద్, నాగర్ కర్నూల్, ఆదిలాబాద్, ఆసిఫాబాద్ జిల్లాల్లో చెదురుమదురుగా వర్షాలు కురిసే అవకాశం ఉంది.