TRS పేరు నా నుదుట రాసిపెట్టి ఉందేమో.. కీలక ప్రకటన చేసిన కల్వకుంట్ల కవిత

తెలంగాణ రాజకీయ యవనికపై సరికొత్త అధ్యాయం మొదలైంది. గత రెండు దశాబ్దాలుగా తెలంగాణ జాగృతి ద్వారా సాంస్కృతిక పునరుజ్జీవం కోసం కృషి చేసిన కల్వకుంట్ల కవిత ప్రత్యక్ష రాజకీయాల్లోకి అడుగుపెట్టారు. ఆమె స్థాపించిన కొత్త పార్టీకి కేంద్ర ఎన్నికల సంఘం ఆమోదం తెలిపింది. ఈ పార్టీకి ‘తెలంగాణ రక్షణ సేన’ (TRS) అనే పేరు ఖరారు అయింది. ఢిల్లీలోని కేంద్ర ఎన్నికల సంఘం కార్యాలయంలో నేరుగా ఆమోద పత్రాన్ని అందుకున్నట్లు ఆమె అధికారికంగా ప్రకటించారు. ఈ సందర్భంగా తెలంగాణ సమాజానికి ఆమె శుభాకాంక్షలు తెలుపుతూ భవిష్యత్తు కార్యచరణను వివరించారు.

ఎన్నికల సంఘం నిబంధనల ప్రకారం 2026 జనవరి నెలలో ఐదు పేర్లతో దరఖాస్తు చేసుకున్నట్లు కవిత వెల్లడించారు. తాము ఇచ్చిన ప్రాధాన్యత క్రమంలో మూడవ పేరు అయిన తెలంగాణ రక్షణ సేనను ఈసీ కేటాయించింది. యాదృచ్ఛికంగా ఈ పేరు సంక్షిప్త రూపం టీఆర్ఎస్ (TRS) కావడం విశేషం. తెలంగాణ రాష్ట్ర సాధన ఉద్యమంలో విడదీయలేని భాగమైన ఈ మూడు అక్షరాలు మళ్ళీ తన పార్టీకే రావడం పట్ల ఆమె హర్షం వ్యక్తం చేశారు. విధి వైచిత్రి వింతగా ఉంటుందని టీఆర్ఎస్ పేరు తన నుదుట రాసిపెట్టి ఉన్నట్లుగా అనిపిస్తోందని ఆమె భావోద్వేగానికి గురయ్యారు.

రాష్ట్ర ప్రజల ప్రయోజనాలను కాపాడటమే తమ పార్టీ ప్రధాన ఉద్దేశమని ఆమె స్పష్టం చేశారు. గత రెండు దశాబ్దాలుగా తెలంగాణ భాష సంస్కృతి అస్తిత్వం కోసం జాగృతి సంస్థ ద్వారా నిరంతరం పోరాడామని గుర్తు చేశారు. అదే అంకితభావంతో ఇప్పుడు రాజకీయ వేదిక ద్వారా ప్రజలకు సేవ చేస్తామని భరోసా ఇచ్చారు. ఎన్నికల సంఘం నిబంధనలకు కట్టుబడి చట్టబద్ధంగా పార్టీ కార్యకలాపాలు నిర్వహిస్తామని ఈ సందర్భంగా ప్రతిజ్ఞ చేశారు. అస్తిత్వ పరిరక్షణ ధ్యేయంగా రక్షణ సేన సైనికుల్లా పని చేస్తుందని ఆమె ధీమా వ్యక్తం చేశారు.

పార్టీ పేరును అధికారికంగా ట్వీట్ చేసిన కవిత

కవిత పార్టీకి సీఈసీ అధికారిక గుర్తింపు

'తెలంగాణ రక్షణ సేన' పేరును ఆమోదించిన సీఈసీ

కవిత నివాసంలో లేఖ అందజేసిన అధికారులు

ఈ నెల 25న మేడ్చల్ సభలో పార్టీ పేరు 'తెలంగాణ రాష్ట్ర సేన'గా ప్రకటించిన కవిత

తెలంగాణ ప్రజా జాగృతి, తెలంగాణ… https://t.co/TqSDdY7C15 pic.twitter.com/UsBXxRzuaw

— BIG TV Breaking News (@bigtvtelugu) April 30, 2026

తెలంగాణ రక్షణ సేన ఆవిర్భావం రాష్ట్ర రాజకీయాల్లో పెను మార్పులకు సంకేతంగా మారుతోంది. టీఆర్ఎస్ అనే అక్షరాలతో ప్రజలకు ఉన్న అనుబంధం తమకు కలిసి వస్తుందని పార్టీ శ్రేణులు భావిస్తున్నాయి. క్షేత్రస్థాయిలో పార్టీ నిర్మాణాన్ని బలోపేతం చేయడంపై కవిత దృష్టి సారించనున్నారు. రాబోయే రోజుల్లో రాష్ట్ర సమస్యలపై పోరాటాలను ఉధృతం చేస్తామని ప్రకటించారు. తెలంగాణ సమాజం తమను ఆదరిస్తుందని రక్షణ సేన నాయకత్వం ఆశాభావం వ్యక్తం చేస్తోంది.

ALSO READ: కదంతొక్కిన అంబటి.. నా కుక్క కూడా భయపడదంటూ.. లోకేశ్‌కు మాస్ వార్నింగ్!