Tree Collapse: అదృష్టమంటే వీరిదే.. మృత్యువు ముంగిట నుంచి ప్రాణాలతో..!

Tree Collapse: మేడ్చల్ పట్టణంలోని వెంకటరామయ్య కాలనీలో శనివారం భారీ ప్రమాదం తప్పింది. కాలనీలోని రోడ్ నెంబర్–7లో ఉన్న తుమ్మల శీను ఇంటి పక్కన గల ఖాళీ స్థలంలో ఉన్న ఒక భారీ వేపచెట్టు అకస్మాత్తుగా కూలిపోయింది. ఈ ప్రమాదంలో అక్కడ పార్క్ చేసి ఉన్న రెండు కార్లు చెట్టు కింద పడి పూర్తిగా ధ్వంసమయ్యాయి.

చెట్టు కూలిన సమయంలో కార్లలో ఎవరూ లేకపోవడంతో పెద్ద ప్రాణాపాయం తప్పింది. భారీ శబ్దం రావడంతో స్థానికులు ఒక్కసారిగా ఉలిక్కిపడి బయటకు పరుగులు తీశారు. అప్రమత్తమైన కాలనీ వాసులు వెంటనే అధికారులకు సమాచారం అందించి.. ప్రమాద స్థలంలో మరిన్ని ఇబ్బందులు కలగకుండా పరిసర ప్రాంతాన్ని ఖాళీ చేయించారు.

ఇటీవల కురిసిన అకాల వర్షాలు, బలమైన ఈదురు గాలుల కారణంగా భూమి మెత్తబడి, పాత చెట్లు బలహీనపడే అవకాశం ఉందని నిపుణులు హెచ్చరిస్తున్నారు. ఈ నేపథ్యంలో స్థానికులు తమ భద్రతపై ఆందోళన వ్యక్తం చేస్తున్నారు. ఎండిపోయిన లేదా వంగిపోయిన పాత చెట్ల కింద వాహనాలను పార్క్ చేయవద్దని కాలనీ వాసులు ఒకరికొకరు విజ్ఞప్తి చేసుకుంటున్నారు. మున్సిపాలిటీ అధికారులు పట్టణంలోని కాలనీలలో పర్యటించి, ప్రమాదకరంగా ఉన్న ఎండిపోయిన చెట్లను గుర్తించి వాటిని తొలగించాలని కోరుతున్నారు.

అదృష్టవశాత్తు ఆ సమయంలో ఆ దారిలో ఎవరూ నడవకపోవడంతో అందరూ ఊపిరి పీల్చుకున్నారు. ఈ ఘటన చూస్తుంటే ప్రకృతి వైపరీత్యాల పట్ల అప్రమత్తంగా ఉండటం ఎంత అవసరమో అర్థమవుతోంది.

Also Read: ‘ధర్మవాణి’ భరోసా.. సమస్య ఏదైనా.. పరిష్కారం ఇక వారం రోజుల్లోనే!

Share

• 
• 
• 
• 
• 
•