రూ.కోట్ల కుంభకోణం.. బాధితులకు అండగా ఉంటా, మంగ్లీ ఆవేదన

ప్రముఖ గాయని మంగ్లీ చుట్టూ ముసురుకున్న ఆర్థిక మోసం వివాదం ఇప్పుడు తెలుగు రాష్ట్రాల్లో హాట్ టాపిక్ గా మారింది. మైక్రో ఫైనాన్స్, రియల్ ఎస్టేట్ మాటున జరిగిన భారీ స్కామ్‌లో తన పేరును కావాలనే ఇరికించారని ఆమె ఆవేదన వ్యక్తం చేశారు. కొందరు వ్యక్తులు పనికట్టుకొని తన ప్రతిష్టను దిగజార్చేందుకు కుట్ర పన్నారని మంగ్లీ మండిపడ్డారు. ఈ వ్యవహారంతో తనకు ఎలాంటి సంబంధం లేదని స్పష్టం చేస్తూనే.. మోసపోయిన బాధితులకు న్యాయం జరిగే వరకు తోడుగా ఉంటానని ఆమె భరోసా ఇచ్చారు. తన ఎదుగుదలను ఓర్వలేని శక్తులు దుష్ప్రచారం చేస్తున్నాయని మంగ్లీ ఆరోపించారు. బాధితుల తరపు న్యాయవాదిపై ఆమె ఎదురు ఫిర్యాదు చేశారు. వందల కోట్ల వసూళ్లతో తనకు ఎటువంటి సంబంధం లేదని కన్నీటి పర్యంతమయ్యారు.

‘గోకుల నందన ఇన్‌ఫ్రా ఇండియా ప్రైవేట్ లిమిటెడ్’ అనే సంస్థ సినిమా ఫైనాన్సింగ్ పేరుతో భారీ వసూళ్లకు పాల్పడినట్లు ఆరోపణలు ఉన్నాయి. నెలకు 3% నుండి 5% వరకు అధిక వడ్డీ ఆశ చూపి సుమారు 150 మంది ఇన్వెస్టర్ల దగ్గర కోట్లాది రూపాయలు డిపాజిట్లు చేయించుకున్నారు. మంగ్లీ తన పాపులారిటీని అడ్డుపెట్టుకొని అమాయక ప్రజలను ఈ స్కీముల్లో చేర్పించారని బాధితులు పోలీసులను ఆశ్రయించారు. ఆమె సోదరుడు శివ సైతం ఈ అక్రమాల్లో భాగస్వామి అని న్యాయవాది సింగపోగు సుబ్బారావు పంజాగుట్ట పోలీసులకు ఫిర్యాదు చేయడంతో వివాదం ముదిరింది.

తనపై వస్తున్న ఆరోపణలను మంగ్లీ తీవ్రంగా ఖండించారు. తాను ఎంతో కష్టపడి ఈ స్థాయికి చేరుకున్నానని ఎవరినీ మోసం చేయాల్సిన అవసరం తనకు లేదని ఆమె వివరణ ఇచ్చారు. తనను బ్లాక్ మెయిల్ చేయడమే కాకుండా అసభ్య పదజాలంతో దూషించినందుకు గాను సదరు న్యాయవాదిపై నార్సింగి పోలీస్ స్టేషన్‌లో ఆమె ఫిర్యాదు చేశారు. పోలీసులు ప్రస్తుతం ఈ కేసును లోతుగా విచారిస్తున్నారు. ఇప్పటికే ప్రధాన నిందితుడు రామావత్ మధును అదుపులోకి తీసుకున్న అధికారులు.. మంగ్లీ ప్రమేయంపై ఆధారాలను సేకరిస్తున్నారు.

ప్రజలు కష్టపడి సంపాదించిన సొమ్ము పోవడం బాధాకరమని మంగ్లీ పేర్కొన్నారు. న్యాయ వ్యవస్థపై తనకు పూర్తి నమ్మకం ఉందని త్వరలోనే నిజానిజాలు బయటకు వస్తాయని ఆమె ధీమా వ్యక్తం చేశారు. నిందితులకు శిక్ష పడాలని బాధితులకు వారి డబ్బు తిరిగి వచ్చే వరకు తన వంతు సహకారం అందిస్తానని ఆమె స్పష్టం చేశారు. ఈ కుట్ర వెనుక ఉన్న అసలు సూత్రధారులను బయటపెట్టాలని ఆమె డిమాండ్ చేశారు.

కొందరు వ్యక్తులు, శక్తులు నాపై పనికట్టుకొని కుట్ర: సింగర్ మంగ్లీ

మైక్రో ఫైనాన్స్, శుభక్షేత్ర ఇన్‌ఫ్రా మోసాలతో బాధితులకు అన్యాయం

వాళ్లకు న్యాయం జరిగే వరకు వాళ్లకు అండగా ఉంటా

ఈ ఆర్థిక మోసాలతో నాకు ఎలాంటి ప్రమేయం లేదని వెల్లడి: మంగ్లీ

Certain individuals and forces are… pic.twitter.com/V9GAUztNZ1

— BIG TV Breaking News (@bigtvtelugu) April 23, 2026