Jangaon District: మద్యంప్రియుల వింత డిమాండ్.. వైన్ షాప్‌ను గ్రామంలోకి తరలించాలని డిమాండ్

Jangaon District: జనగామ జిల్లా జఫర్‌ఘడ్‌ మండలంలో మద్యం ప్రియులు వినూత్న నిరసనకు దిగారు. పలు డిమాండ్లతో కూడిన ఫ్లెక్సీని పట్టుకుని ప్రధాన రహదారిపై బైఠాయించి ఆందోళన చేపట్టారు. గ్రామ శివారులో ఉన్న వైన్‌ షాప్‌ను గ్రామం లోపలికి తరలించాలి అని వారు ప్రధానంగా డిమాండ్ చేశారు.

మద్యం ప్రియులు తమ ఆవేదన వ్యక్తం చేస్తూ పలు కారణాలను వివరించారు. ఊరి చివరన మద్యం దుకాణం ఉండడం వల్ల అక్కడికి వెళ్లడానికి తీవ్ర ఇబ్బందులు పడుతున్నామన్నారు. ఈ దూరం కారణంగా వృద్ధులు సైతం షాపులకు చేరుకోలేక నానా అవస్థలు పడుతున్నారని తెలిపారు.

అంతేకాక, గ్రామం వెలుపల మద్యం షాపు ఉండడంతో గ్రామం లోపల ఉన్న చిరువ్యాపారులు నష్టపోతున్నారని మద్యం ప్రియులు ఆరోపించారు. మద్యం దుకాణం గ్రామంలో ఉంటే చిన్న చిన్న టీ స్టాళ్లు, ఇతర దుకాణాలకు కూడా వ్యాపారం పెరుగుతుందని అభిప్రాయపడ్డారు.

మరో ముఖ్యమైన విషయం ఏంటంటే… ఊరి బయట ఉన్న మద్యం దుకాణానికి వెళ్లే క్రమంలో తరచూ రోడ్డు ప్రమాదాలు జరుగుతున్నాయని వారు ఆందోళన వ్యక్తం చేశారు. అందుకే ఈ సమస్యలన్నిటికీ పరిష్కారంగా వైన్‌ షాప్‌ను గ్రామం మధ్యలోకి తరలించాలని.. అప్పుడే తమ ఇబ్బందులు తొలగుతాయని వారు గట్టిగా డిమాండ్‌ చేశారు. వారి వింత డిమాండ్‌ స్థానికంగా చర్చనీయాంశమైంది.

ALSO READ: MLA Adi Srinivas: వేములవాడలో డబుల్ బెడ్‌రూమ్ ఫ్లోర్ కూలిపోవడంపై స్పందించిన ఎమ్మెల్యే శ్రీనివాస్