Caroline Ching IAS Inspiring Journey: నల్లగొండ జిల్లా దేవరకొండ సబ్ కలెక్టర్‌గా బాధ్యతలు చేపట్టారు కరోలిన్ చింగ్‌థియాన్‌మావి. మణిపూర్‌లోని లామ్‌కా ప్రాంతానికి చెందిన ఆమె.. దేశంలోని అత్యంత ప్రతిష్టాత్మకమైన సివిల్ సర్వీసుల్లో ఒకటైన ఐఏఎస్ ను క్రాక్ చేశారు. థాంగ్‌ఖాల్ తెగకు చెందిన తొలి ఐఏఎస్ అధికారిగా గుర్తింపు పొందారు. ఒక చిన్న తెగకు చెందిన ఆమె.. ఐఏఎస్ అధికారి వరకు సాగించిన ప్రయాణం సాధారణమైనది కాదు. ముఖ్యంగా ఎలాంటి స్పెషల్ కోచింగ్ లేకుండానే సివిల్ సర్వీసెస్ లో విజయం సాధించి అబ్బుర పరిచారు.
కరోలిన్ చింగ్‌థియాన్‌మావి మణిపూర్‌లోని లామ్‌కా ప్రాంతానికి చెందినవారు. మువాల్ వెంగ్, హియాంగ్‌టామ్ ప్రాంతాలకు చెందిన కరోలిన్ టి. పౌమిన్‌లియాన్‌థాంగ్, లామ్‌నేకిమ్ దంపతులకు కుమార్తె. నలుగురు పిల్లల్లో కరోలిన్ మూడో సంతానం. ఆమెకు ఇద్దరు అన్నలు, ఒక చెల్లెలు ఉన్నారు. కుటుంబ నేపథ్యం కూడా ఆమె జీవితంలో ముఖ్యమైన పాత్ర పోషించింది. తండ్రి థాంగ్‌ఖాల్ ప్రజా సంఘం మాజీ అధ్యక్షుడిగా పనిచేయడంతో పాటు సామాజిక సేవా కార్యక్రమాల్లోనూ పాల్గొన్నారు. తల్లి కూడా మహిళా సంఘంలో సేవలందించారు. సామాజిక బాధ్యతలతో పరిచయం ఉన్న కుటుంబ వాతావరణం కరోలిన్‌పై ప్రభావం చూపించింది.
కరోలిన్ చిన్నప్పటి నుంచే చదువుపై ప్రత్యేక శ్రద్ధ చూపారు. ఉన్నత విద్యలోనూ తన ప్రతిభను చాటుకున్నారు. 2020లో మణిపూర్ యూనివర్సిటీ పరిధిలో బీకాం ఆనర్స్ పూర్తి చేసిన ఆమె.. యూనివర్సిటీ స్థాయిలో టాపర్‌గా నిలిచారు. అయితే, చదువులో మంచి మార్కులు సాధించడం దగ్గరే ఆమె ప్రయాణం ఆగిపోలేదు. దేశానికి సేవ చేయాలనే లక్ష్యంతో కరోలిన్ సివిల్ సర్వీసెస్ వైపు అడుగులు వేశారు. సాధారణంగా సివిల్ సర్వీసెస్ పరీక్షకు సిద్ధమయ్యే చాలామంది అభ్యర్థులు స్పెషల్ కోచింగ్ తీసుకుంటారు. కానీ కరోలిన్ మాత్రం ఎలాంటి కోచింగ్ లేకుండానే తన సొంత ప్రయత్నంతో పరీక్షకు సిద్ధమై విజయం సాధించారు. క్రమశిక్షణతో చదవడం, లక్ష్యంపై దృష్టి పెట్టడం, పట్టుదలతో ముందుకు సాగడం ఆమె విజయానికి కారణంగా చెప్పారు.
కరోలిన్ విజయం వ్యక్తిగతంగా ఆమెకు మాత్రమే కాదు.. ఆమెకు చెందిన థాంగ్‌ఖాల్ సమాజానికి కూడా ఎంతో ప్రత్యేకమైనది. ఆ తెగ నుంచి తొలి ఐఏఎస్ అధికారిగా ఆమె గుర్తింపు పొందడం అక్కడి యువతకు కొత్త ఆశలు కలిగించింది. తమ ప్రాంతం, తమ సామాజిక నేపథ్యం తమ లక్ష్యాలకు అడ్డంకి కాదని ఆమె ప్రయాణం చెబుతోంది. అవకాశాలు పరిమితంగా ఉన్నా.. లక్ష్యం స్పష్టంగా ఉంటే ఉన్నత స్థానాలను చేరుకోవచ్చని ఆమె నిరూపించారు.
తాజాగా ఆమె నల్లగొండ జిల్లా దేవరకొండ సబ్ కలెక్టర్ గా బాధ్యతలు తీసుకున్నారు. పరిపాలనలో ప్రజలకు అందుబాటులో ఉండటం, సమస్యలను అర్థం చేసుకోవడం, ప్రభుత్వ సేవలను క్షేత్రస్థాయిలో ప్రజలకు చేరేలా చూడటం లాంటి బాధ్యతలను ఆమె నిర్వర్తించాల్సి ఉంటుంది. మణిపూర్‌లోని ఒక చిన్న తెగ నుంచి బయలుదేరి యూనివర్సిటీ టాపర్‌గా నిలిచి.. ఆ తర్వాత ఐఏఎస్‌గా ఎదిగి.. ఇప్పుడు తెలంగాణలో కీలక పరిపాలనా బాధ్యతలు చేపట్టడం కరోలిన్ ప్రయాణాన్ని ప్రత్యేకంగా నిలబెడుతోంది. కలలు కనడానికి నేపథ్యం అడ్డంకి కాదు.. వాటిని నిజం చేసుకోవడానికి పట్టుదల ఉంటే చాలని కరోలిన్ చింగ్‌థియాన్‌మావి విజయగాథ మరోసారి గుర్తుచేస్తోంది.
Read Also: నేషనల్ లెవెల్ లో సత్తా చాటిన నల్లగొండ, ఏకంగా సెకెండ్ ప్లేస్ కైవసం!
Share
ఓటీటీలోకి సూర్య 'విశ్వనాథ్ అండ్ సన్స్'.. అఫీషియల్ అనౌన్స్మెంట్ వైరల్!
కారులో ఆండ్రాయిడ్ ఆటో వాడే అలవాటు ఉందా? అయితే మీ ఫోన్ బ్యాటరీ డేంజర్లో పడ్డట్టే!
