ప్రపంచంలోనే అత్యంత సన్నని ఇల్లు.. లోపల సౌకర్యాలు చూస్తే షాకవ్వాల్సిందే?

World’s Narrowest House: ఇల్లు అంటే ఎలా ఉండాలి? కనీసం నాలుగు గోడలు, కొంత ఖాళీ స్థలం, చక్కటి గదులు, మంచి వంటగది, బాత్‌ రూమ్.. ఇలా ఎన్నో ఊహించుకుంటాం.. కానీ, ప్రపంచంలోనే అత్యంత ఇరుకైన ఇల్లు మాత్రం ఈ ఆలోచనలకు పూర్తి భిన్నంగా ఉంటుంది. పోలాండ్‌ లోని వార్సాలో ఉన్న కెరెట్ హౌస్ చూస్తే.. ఇంత చిన్న స్థలంలో కూడా ఇంటిని నిర్మించవచ్చా? అని ఆశ్చర్యపోక తప్పదు.

రెండు భవనాల మధ్య చిన్న సందులో..

వార్సాలోని రెండు భవనాల మధ్య ఉన్న చాలా ఇరుకైన ఖాళీ ప్రదేశంలో ఈ ఇల్లు నిర్మించారు. పోలిష్ ఆర్కిటెక్ట్ జాకుబ్ స్జెన్స్నీ దీనిని రూపొందించారు. రెండు అంతస్తులుగా ఉండే ఈ చిన్న నిర్మాణం బయట నుంచి చూస్తే చిన్న నిర్మాణంలా కనిపిస్తుంది. అయితే దీని వెనుక ఉన్న ఆలోచన మాత్రం చాలా ప్రత్యేకమైనది. అందుబాటులో ఉన్న అతి తక్కువ స్థలాన్ని ఉపయోగించుకుని, ఒక వ్యక్తి నివసించడానికి అవసరమైన సౌకర్యాలను ఇందులో ఏర్పాటు చేశారు.

వెడల్పు ఎంతో తెలిస్తే షాక్!

కెరెట్ హౌస్‌ లో ఆశ్చర్యం కలిగించే విషయం దాని వెడల్పు. అత్యంత ఇరుకైన ప్రాంతంలో ఈ ఇల్లు కేవలం 92 సెంటీమీటర్ల వెడల్పు మాత్రమే ఉంటుంది. కొంచెం వెడల్పైన ప్రాంతంలో కూడా అది 152 సెంటీమీటర్లకు మించదు. మొత్తం నివాస స్థలం సుమారు 14 చదరపు మీటర్లు మాత్రమే. ఇంత చిన్న ప్రదేశంలోనే కిచెన్, బాత్‌ రూమ్, డైనింగ్ స్పేస్, పడుకునే ప్రాంతాన్ని ఏర్పాటు చేశారు.

మెట్లు కూడా చాలా ప్రత్యేకం

సాధారణ ఇళ్లలో కనిపించే మెట్లకు ఇక్కడ స్థలం లేదు. ఇంట్లోకి వెళ్లేందుకు బయట మెటల్ మెట్లను ఉపయోగించాలి. రెండు అంతస్తుల మధ్య తిరగడానికి లోపల నిచ్చెనలను ఏర్పాటు చేశారు. చిన్న స్థలాన్ని వృథా చేయకుండా ప్రతి అంగుళాన్ని జాగ్రత్తగా ఉపయోగించడం ఈ ఇంటి డిజైన్‌లో ప్రధాన ఆకర్షణగా చెప్పొచ్చు. గిన్నిస్ వరల్డ్ రికార్డ్స్ కూడా కెరెట్ హౌస్‌ను ప్రపంచంలోనే అత్యంత ఇరుకైన ఇల్లుగా గుర్తించింది.

ఇంటి వెనుక ఆసక్తికర చరిత్ర

కెరెట్ హౌస్ కేవలం వింత నిర్మాణం మాత్రమే కాదు. ఇది వార్సాలోని వోలా ప్రాంతంలో, ఒకప్పుడు వార్సా ఘెట్టో సరిహద్దు ఉన్న ప్రాంతానికి సమీపంలో ఉంది. ఘెట్టోలోని రెండు ప్రాంతాలను కలిపే చారిత్రక చెక్క వంతెన కూడా ఇదే ప్రాంతంలో ఉండేది. ఈ ఇంటికి ఇజ్రాయెల్ రచయిత, చిత్రనిర్మాత ఎట్గర్ కెరెట్ పేరు పెట్టారు. ఆయన కుటుంబానికి హోలోకాస్ట్‌ తో ముడిపడిన చరిత్ర ఉంది. అందుకే ఈ చిన్న ఇల్లు ఆయనకు స్మారకంగా మారింది. కెరెట్ హౌస్ ప్రస్తుతం అక్కడికి వచ్చే రచయితలు, కళాకారులకు నివాసం, విశ్రాంతి, సృజనాత్మక ఆలోచనలకు ఉపయోగపడే స్థలంగా కొనసాగుతోంది.

స్థలం ఎంత చిన్నదైనా ఆలోచన పెద్దదైతే అద్భుతమైన నిర్మాణం సాధ్యమేనని కెరెట్ హౌస్ నిరూపిస్తోంది. అందుకే ఇది ప్రపంచంలోనే అత్యంత ఇరుకైన ఇల్లుగా మాత్రమే కాకుండా.. వాస్తుశిల్పం, చరిత్ర, కళ కలిసిన ఒక ప్రత్యేకమైన ప్రదేశంగా గుర్తింపు పొందింది.