Traffic Challans: ట్రాఫిక్ రూల్స్ ఉల్లంఘించారా? అయితే, మీకో గుడ్ న్యూస్!

Pending Traffic Challans: వాహనదారులు తరచుగా ట్రాఫిక్ రూల్స్ ఉల్లంఘించడం వల్ల ట్రాఫిక్ పోలీసులు చలాన్లు జారీ చేస్తుంటారు. చాలా మంది వాహనదారులు తమ చలాన్లను పెద్దగా పట్టించుకోరు. కొంత మంది అసలు తన బండ్ల మీద చలాన్లు ఉన్నాయనే విషయం కూడా తెలియదు. మరికొంత మంది వాహనాల మీద పెద్ద సంఖ్యలో చలాన్లు ఉన్నా, కట్టకుండా అలాగే వదిలేస్తారు. అలాంటి వారికి ఉపశమనం కలిగించేలా ప్రభుత్వం నిర్ణయం తీసుకుంది. డిసెంబర్ రెండవ వారంలో జాతీయ లోక్ అదాలత్ నిర్వహించబోతోంది. డిస్కౌంట్లను అందించడం ద్వారా పెండింగ్‌లో ఉన్న ట్రాఫిక్ చలాన్లను చెల్లించే అవకాశం కల్పించనుంది.

లోక్ అదాలత్ లో ఏ ఉల్లంఘనలు పరిష్కరించుకోవచ్చంటే?

లోక్ అదాలత్ లో పలు ట్రాఫిక్ ఉల్లంఘనలకు సంబంధించిన కేసులను పరిష్కరించుకునే అవకాశం ఉంటుంది. పరిష్కారాలని అర్హత కలిగిన ఉల్లంఘనలు ఏవంటే..

⦿ హెల్మెట్, సీట్ బెల్ట్ లేకుండా వాహనం నడపడం

⦿ రెడ్ సిగ్నల్ జంప్ చేయడం

⦿ సాధారణ ఓవర్ స్పీడ్

⦿ రాంగ్ పార్కింగ్

⦿ పొల్యూషన్ సర్టిఫికేట్ లేకపోవడం

⦿ లైసెన్స్ లేకుండా వాహనం నడపడం

⦿ నంబర్ ప్లేట్లు లేకపోవడం

⦿ ఫిట్‌ నెస్ సర్టిఫికెట్ లేకపోవడం

⦿ తప్పుగా జారీ చేసిన చలాన్లు

⦿ పాత పెండింగ్‌ చలాన్లు

లోక్ అదాలత్ లో పరిష్కారం కాని కేసులు

అటు ట్రాఫిక్ ఉల్లంఘనలకు సంబంధించి కొన్ని కేసులను లోక్ అదాలత్ నుంచి మినహాయించారు. తీవ్రమైన కేసులను ఈ పరిధిలోకి తీసుకురావడం లేదు. అవేంటంటే..

⦿ మద్యం సేవించి వాహనం నడపడం

⦿ హిట్ అండ్ రన్

⦿ ర్యాష్ డ్రైవింగ్

⦿ రోడ్డు ప్రమాదం(గాయాలు, మృతి) లాంటి తీవ్రమైన ఉల్లంఘటనలకు ఈ మినహాయింపు వర్తించదు.

డిసెంబర్ 21న లోక్ అదాలత్

తెలంగాణలో డిసెంబర్ 21న జాతీయ లోక్ అదాలత్ జరగనుంది. ఈ మేరకు తెలంగాణ రాష్ట్ర లీగల్ సర్వీసెస్ అథారిటీ తన వెబ్ సైట్ లో ప్రకటించింది. అయితే, పెండింగ్‌ లో ఉన్న ట్రాఫిక్ చలాన్లకు తగ్గింపు గురించి ఇప్పటి వరకు ఎలాంటి అధికారిక ప్రకటన రాలేదు.