YSRCP Infighting: ఇచ్చాపురం వైసీపీలో అసంతృప్తి సెగలు రాజుకున్నాయి. మున్సిపల్ ఛైర్‌పర్సన్ అభ్యర్థిగా పిలక రాజ్యలక్ష్మిని ప్రకటించిన వెంటనే పార్టీలో అంతర్గత విభేదాలు ఒక్కసారిగా తెరపైకి వచ్చాయి. ఇన్నాళ్లూ పదవిపై ఆశలు పెట్టుకున్న ఆశావహుల్లో అసంతృప్తి జ్వాలలు ఎగసిపడుతున్నాయి. ఈ పరిణామాలు ఇప్పుడు ఇచ్చాపురం వైసీపీ రాజకీయాలను మరింత రసవత్తరంగా మార్చాయి.
ఛైర్‌పర్సన్ అభ్యర్థి ఎంపికపై పార్టీలోని కొందరు నేతలు బహిరంగంగానే తమ అసంతృప్తిని వ్యక్తం చేస్తున్నారు. అటు సోషల్ మీడియాలోనూ విమర్శలు, పోస్టుల పర్వం కొనసాగుతోంది. ముఖ్యంగా ఛైర్‌పర్సన్ పీఠంపై ఆశలు పెట్టుకున్న ఉలాల భారతిదివ్య సోషల్ మీడియా వేదికగా తన అనుచరులతో అసంతృప్తిని వ్యక్తం చేయడం రాజకీయంగా చర్చనీయాంశంగా మారింది. యాదవ సామాజిక వర్గానికి ఛైర్‌పర్సన్ పదవిని కేటాయించలేదంటూ ఆమె వర్గీయులు చేసిన విమర్శలు పార్టీలోని అంతర్గత విభేదాలను మరోసారి బయటపెట్టాయి.
మరోవైపు, పార్టీ అభ్యర్థి ఎంపిక నేపథ్యంలో నెలకొన్న అసంతృప్తి ప్రభావం ఎన్నికల సమీకరణాలపై పడకుండా వైసీపీ ఛైర్‌పర్సన్ భర్త చివరి నిమిషం వరకు కౌన్సిలర్ల మద్దతు కూడగట్టే ప్రయత్నాల్లో ఉన్నట్లు రాజకీయ వర్గాల్లో చర్చ సాగుతోంది. అభ్యర్థి ఎంపికపై వ్యతిరేకత, నేతల మధ్య విభేదాలు పార్టీకి ఎలాంటి సవాల్‌గా మారనున్నాయన్నది ఇప్పుడు ఆసక్తికరంగా మారింది. ఇచ్చాపురం రాజకీయాల్లో మరో ఆసక్తికర పరిణామం చోటుచేసుకుంది. ఒకే వార్డు నుంచి కౌన్సిలర్లుగా పోటీ చేసేందుకు తోటికోడళ్లైన ఉలాల జ్యోతి, ఉలాల భారతిదివ్య నామినేషన్లు దాఖలు చేశారు. ఛైర్‌పర్సన్ పీఠంపై ఆశలు పెట్టుకున్న భారతిదివ్య, అదే కుటుంబానికి చెందిన జ్యోతితో ఒకే వార్డులో బరిలోకి దిగడం రాజకీయ చర్చకు దారితీసింది.
ఛైర్‌పర్సన్ అభ్యర్థి ఎంపికతో మొదలైన అసమ్మతి.. సోషల్ మీడియా విమర్శలతో మరింత బహిర్గతం కాగా, ఇప్పుడు కౌన్సిలర్ల మద్దతు కూడగట్టే ప్రయత్నాలు రాజకీయ వేడిని పెంచుతున్నాయి. ఈ పరిణామాలు వైసీపీ ఎన్నికల వ్యూహంపై ఎలాంటి ప్రభావం చూపుతాయి? అసంతృప్త నేతలు పార్టీ నిర్ణయానికి కట్టుబడి ఉంటారా? లేక ఎన్నికల వేళ కొత్త రాజకీయ మలుపులు చోటుచేసుకుంటాయానన్న విషయాలు జోరందుకున్నాయి. ఇచ్చాపురం వైసీపీలో అంతర్గత అసంతృప్తి చల్లారుతుందా? లేక ఎన్నికల వేళ మరింత ముదురుతుందా? అన్నది వేచి చూడాలి!
Also read: మీ వీధిలో ప్రమాదకరంగా కరెంట్ తీగలు ఉన్నాయా.. అయితే మీకో గుడ్ న్యూస్!
Share
ఇండియన్ టూరిస్టులపై స్విట్జర్లాండ్ స్పెషల్ ఫోకస్.. ఏకంగా జెమీమాతో ప్రమోషన్స్!
చనిపోయిన తల్లి ఆత్మ కూతురిని వెంటాడితే... ఆ కుటుంబాన్ని కాపాడేందుకు అఘోరీ రంగంలోకి! కన్నడ హారర్ థ్రిల్లర్
