Indians Festive Shopping| దీపావళి వచ్చిందంటే కొత్త బట్టలు, ఇంటికి అవసరమైన వస్తువులు, బహుమతులు కొనడం చాలామందికి అలవాటు. పండుగ ఆఫర్లు కనిపిస్తే షాపింగ్ చేయాలనే ఆసక్తి కూడా పెరుగుతుంది. అయితే, ఈసారి పరిస్థితి కొంత భిన్నంగా కనిపిస్తోంది. పెరుగుతున్న ధరలు, రుణాలపై అధిక వడ్డీ భారం కారణంగా పట్టణాలు, నగరాల్లో నివసించే భారతీయులు ఖర్చుల విషయంలో ఆచితూచి అడుగులు వేస్తున్నారు. అందుకే ఈ పండుగ సీజన్‌లో చాలామంది తమ షాపింగ్ బడ్జెట్‌ను తగ్గించుకునే అవకాశం ఉంది.
లోకల్‌సర్కిల్స్ సంస్థ నిర్వహించిన సర్వే ప్రకారం.. 2026లో పట్టణ కుటుంబాల పండుగల సందర్భంగా చేసే ఖర్చులు రూ.1.97 లక్షల కోట్లకు చేరవచ్చని అంచనా. 2025లో నమోదైన రూ.2.10 లక్షల కోట్లతో పోలిస్తే ఇది 6 శాతం తక్కువ. దేశంలోని 307 జిల్లాల్లో పట్టణ వినియోగదారుల నుంచి 67,000కు పైగా స్పందనలను ఈ సర్వే సేకరించింది.
సర్వేలో పాల్గొన్న కుటుంబాల్లో 57 శాతం మంది పండుగల కోసం అదనపు ఖర్చులు చేయాలని భావిస్తున్నారు. మరో 31 శాతం మంది అలాంటి ఖర్చులు చేయబోమని తెలిపారు. షాపింగ్ చేయాలనుకునే వారిలో 18 శాతం మంది రూ.10,000లోపు ఖర్చు చేయాలని భావిస్తున్నారు. మరో 15 శాతం మంది రూ.10,001 నుంచి రూ.25,000 వరకు బడ్జెట్ కేటాయించారు. కొంతమంది రూ.50,000కు పైగా ఖర్చు చేయాలని భావిస్తుండగా, 12 శాతం మందికి ఇంకా స్పష్టత లేదు. ద్రవ్యోల్బణం కూడా ఈ పరిస్థితికి ఒక కారణం. సెప్టెంబరులో రిటైల్ ద్రవ్యోల్బణం 5.54 శాతానికి చేరింది. ఆహార ద్రవ్యోల్బణం 7.74 శాతంగా నమోదైంది. నిత్యావసరాలకే ఎక్కువ డబ్బు ఖర్చవుతుండటంతో షాపింగ్ కోసం మిగిలే మొత్తం తగ్గుతోంది.
2024లో నగర, పట్టణాలకు చెందిన కుటుంబాల పండుగ ఖర్చులు రూ.1.85 లక్షల కోట్లుగా అంచనా వేయగా.. 2025లో అవి రూ.2.10 లక్షల కోట్లకు పెరిగాయి. గతేడాది సెప్టెంబర్‌లో అమల్లోకి వచ్చిన జీఎస్‌టీ రేట్ల తగ్గింపులు కొనుగోళ్లకు ఊతమిచ్చాయి. అయితే, ఈసారి అలాంటి ప్రోత్సాహం కనిపించడం లేదు. రిజర్వ్ బ్యాంక్ ఆఫ్ ఇండియా అక్టోబర్ 7న రెపో రేటును 0.25 శాతం పెంచి 5.50 శాతానికి చేర్చింది. బ్యాంకులు ఈ పెంపును రుణగ్రహీతలకు బదిలీ చేస్తే రుణాల భారం పెరగవచ్చు.
పండుగ షాపింగ్‌లో దుస్తులు, పాదరక్షలు, ఇతర ఫ్యాషన్ వస్తువులకు 72 శాతం మంది ప్రాధాన్యం ఇచ్చారు. గృహోపకరణాలు, ఫర్నిచర్, ప్రయాణాలకు 45 శాతం మంది ఆసక్తి చూపారు. ఆహార పదార్థాలు, బహుమతులు కొనాలని 39 శాతం మంది భావిస్తున్నారు. మొబైల్ ఫోన్లు, ఎలక్ట్రానిక్ వస్తువులు, ఇంటి అలంకరణకు 22 శాతం మంది చొప్పున బడ్జెట్ కేటాయించారు. వాహనాలు కొనాలని 10 శాతం మంది భావిస్తుండగా.. నగల కొనుగోళ్లపై ఆసక్తి కేవలం 6 శాతంగా ఉంది. బంగారం, వెండి ధరలు పెరగడం దీనికి కారణం కావచ్చు.
Also Read: పండుగ వేళ ఇల్లు కొనుగోలు చేస్తే భారీ డిస్కౌంట్.. బిల్డర్లు ఇచ్చే ఆఫర్లను నమ్మవచ్చా?
సర్వే ప్రకారం.. పండుగల కోసం అదనపు ఖర్చులు చేయాలనుకునే కుటుంబాల్లో 83 శాతం మంది తమ సేవింగ్స్ ఉపయోగించాలని భావిస్తున్నారు. మరోవైపు, 17 శాతం మంది తమ సంపాదనతోనే ఖర్చులు భరించాలని తెలిపారు. సేవింగ్స్ ఉపయోగించడం వల్ల రుణాలు తీసుకోవాల్సిన అవసరం తగ్గవచ్చు. అయితే, అత్యవసర పరిస్థితులు, భవిష్యత్తు అవసరాల కోసం మిగిలే డబ్బు తగ్గే ప్రమాదం ఉంది. మొత్తంగా, పట్టణ భారతీయులు పండుగలను జరుపుకోవడానికి సిద్ధంగా ఉన్నప్పటికీ, ఖర్చుల విషయంలో జాగ్రత్తగా వ్యవహరిస్తున్నారు. అవసరమైన వస్తువులకు ప్రాధాన్యం ఇస్తూ, ఖరీదైన కొనుగోళ్లను వాయిదా వేసే ధోరణి కనిపిస్తోంది.
Also Read: అత్తమామల ఇల్లు, ఆస్తిపై కోడలికి హక్కులుంటాయా? భారత చట్టం ఏం చెబుతోందంటే
Share
‘గరివిడి లక్ష్మి’లో ఆర్పీ పట్నాయక్ పాత్ర వెనుక అసలు కథ ఇదేనా?
హైదరాబాద్ MVSR కాలేజీ దాండియా వేడుకల్లో ఘోర ప్రమాదం.. ఇద్దరు మృతి!
