మరణం తర్వాత శరీరంలోని ఏ అవయవం ఎంతసేపు జీవించి ఉంటుంది? ఈ విషయాలు తెలుసా

మనిషి మరణించిన వెంటనే శరీరంలోని అన్ని అవయవాలు ఒకేసారి పనిచేయడం ఆగిపోతాయని అందరూ అనుకుంటారు. అయితే వైద్య శాస్త్రం ప్రకారం అది పూర్తిగా నిజం కాదు. మరణం తర్వాత కూడా కొన్ని అవయవాలు, కణజాలాలు కొంత సమయం వరకు జీవించి ఉంటాయి. అందుకే అవయవ దానం ద్వారా ఎంతో మంది ప్రాణాలను కాపాడడం సాధ్యమవుతోంది. చావు తరువాత ప్రతి అవయవం సజీవంగా ఉండే సమయం వేర్వేరుగా ఉంటుంది.

మరణం తర్వాత అవయవాలు ఎందుకు వెంటనే పనిచేయడం ఆగిపోవు?

మరణం జరిగిన వెంటనే అన్ని అవయవాలు ఒకేసారి దెబ్బతినవు. కొన్ని అవయవాలు నిమిషాల్లోనే పనితీరు కోల్పోతాయి. మరికొన్ని సరైన పద్ధతిలో భద్రపరిస్తే గంటలు లేదా సంవత్సరాల పాటు కూడా ఉపయోగించవచ్చు. అందుకే వైద్యులు అవయవ మార్పిడి కోసం వేగంగా చర్యలు తీసుకుంటారు.

కంటి కార్నియా ఎక్కువసేపు పనిచేస్తూ ఉంటుంది

కార్నియా అనేది కంటి ముందుభాగంలో ఉండే పారదర్శక పొర. దీనికి ఇతర అవయవాల మాదిరిగా నేరుగా రక్త సరఫరా అవసరం ఉండదు. అందువల్ల మరణించిన తర్వాత 12 నుంచి 24 గంటలలోపు కార్నియాను సేకరించవచ్చు. దాన్ని కంటి మార్పిడి శస్త్రచికిత్సలో ఉపయోగించి చూపు కోల్పోయిన వారికి మళ్లీ చూపు అందించే అవకాశం ఉంటుంది.

కిడ్నీలు 24 నుంచి 36 గంటల వరకు భద్రంగా ఉంటాయి

కిడ్నీలు ఎక్కువగా మార్పిడి చేసే అవయవాల్లో ఒకటి. వీటిని ప్రత్యేకమైన చల్లని నిల్వ ద్రావణాల్లో భద్రపరిస్తే సుమారు 24 నుంచి 36 గంటల వరకు ఉపయోగించవచ్చు. అయితే విజయవంతమైన మార్పిడి కోసం సరైన సమయంలో శస్త్రచికిత్స చేయడం చాలా ముఖ్యం.

గుండెను త్వరగా మార్పిడి చేయాలి

గుండె అత్యంత సున్నితమైన అవయవం. రక్తప్రసరణ ఆగిన తర్వాత దీని పనితీరు వేగంగా తగ్గుతుంది. అందువల్ల గుండెను సేకరించిన తర్వాత సాధారణంగా ఆరు గంటలలోపు మార్పిడి చేయడం ఉత్తమం. ఆలస్యం అయితే మార్పిడి విజయవంతంగా జరగడానికి అవకాశాలు తగ్గిపోతాయి.

ఊపిరితిత్తులు త్వరగా డ్యామేజ్ అవుతాయి

ఊపిరితిత్తులను కూడా వీలైనంత త్వరగా మార్పిడి చేయాలి. వైద్యులు సాధారణంగా ఆరు గంటలలోపు శస్త్రచికిత్స పూర్తి చేయడానికి ప్రయత్నిస్తారు. సరైన పరిస్థితుల్లో ఇవి సుమారు ఏడు గంటల వరకు ఉపయోగించగల స్థితిలో ఉండవచ్చు.

చర్మం, ఎముకలు ఎక్కువకాలం నిల్వ ఉంటాయి

చర్మం, ఎముకలతో పాటు టెండన్లు వంటి కణజాలాలు ప్రధాన అవయవాల కంటే చాలా ఎక్కువకాలం నిల్వ ఉంటాయి. వీటిని ప్రత్యేక టిష్యూ బ్యాంకుల్లో సంవత్సరాల పాటు భద్రపరుస్తారు. తర్వాత కాలిన గాయాలు, ఎముకల సమస్యలు, ఇతర శస్త్రచికిత్సల్లో వీటిని ఉపయోగిస్తారు.

Also Read: పాము, ముంగీస లాంటి సంబంధం వీరిది.. ఈ తేదీల్లో పుట్టినవారు పెళ్లి తరువాత గొడవపడుతూనే ఉంటారు

అవయవ దానం ఎందుకు ముఖ్యం?

అవయవ దానం ద్వారా అనేక మంది రోగులకు కొత్త జీవితం లభిస్తుంది. ప్రతి అవయవాన్ని నిర్ణీత సమయంలో సేకరించి సరైన విధంగా భద్రపరిస్తే విజయవంతమైన మార్పిడి అవకాశాలు పెరుగుతాయి. అవయవ దానం గురించి అవగాహన పెరగడం వల్ల మరింత మంది ప్రాణాలను కాపాడే అవకాశం ఉంటుంది.