Nallamala Elevated Corridor: శ్రీశైలం మల్లన్న దర్శనం కోసం వెళ్లే భక్తులకు త్వరలో ప్రయాణం మరింత ఈజీ కానుంది. నల్లమల అడవి మీదుగా రాత్రి వేళల్లో కూడా శ్రీశైలానికి రాకపోకలు సాగించే అవకాశం రాబోతోంది. ఇందుకోసం భారీ ఎలివేటెడ్ కారిడార్ ను నిర్మించాలని ప్రభుత్వం నిర్ణయించింది. ప్రస్తుతం ఉన్న ప్రయాణ ఆంక్షల కారణంగా భక్తులు నిర్ణీత సమయాల్లోనే అడవి మార్గంలో ప్రయాణించాల్సి వస్తోంది. కొత్త కారిడార్ పూర్తయితే, 24 గంటలూ ఎలాంటి ఇబ్బంది లేకుండా వెళ్లే అవకాశం ఉంటుంది.
ఈ ప్రాజెక్టులో భాగంగా సుమారు 86.74 కిలోమీటర్ల పొడవైన ఎలివేటెడ్ కారిడార్ నిర్మించాలని అధికారులు ప్రతిపాదించారు. సాధారణ రహదారిలా కాకుండా.. ఈ మార్గాన్ని భూమి నుంచి సుమారు 32 అడుగుల ఎత్తులో నిర్మించేలా ప్రణాళికలు రూపొందించారు. భారీ వ్యయంతో చేపట్టే ఈ ప్రాజెక్టుకు దాదాపు రూ.18,500 కోట్లు ఖర్చవుతుందని అంచనా. ప్రాజెక్టు పూర్తయితే శ్రీశైలం వెళ్లే భక్తులతో పాటు ఇతర ప్రయాణికులకు కూడా రాకపోకలు మరింత సులభం కానున్నాయి.
నల్లమల అడవి సాధారణ ప్రాంతం కాదు. ఇది పులులు, చిరుతలు, జింకలు, ఇతర అనేక రకాల వన్యప్రాణులకు ఆవాసంగా ఉంది. ఇలాంటి సున్నితమైన అటవీ ప్రాంతం మీదుగా రహదారి నిర్మించడం వల్ల వన్యప్రాణుల సంచారానికి ఆటంకం కలగకూడదనేది కీలక ప్రణాళిక. అందుకే, ఈ కారిడార్ను భూమికి ఎత్తుగా నిర్మించే ఆలోచన తెరపైకి వచ్చింది. రహదారి పైభాగంలో వాహనాలు ప్రయాణిస్తే.. కింద భాగంలో వన్యప్రాణులు సంచరించేందుకు అవకాశం ఉంటుందని భావిస్తున్నారు.
ప్రస్తుతం నల్లమల అటవీ మార్గంలో రాత్రి సమయంలో ప్రయాణానికి పరిమితులు ఉన్నాయి. ముఖ్యంగా రాత్రి 9 గంటల తర్వాత రాకపోకలపై ఆంక్షలు ఉండటంతో శ్రీశైలానికి వెళ్లే భక్తులు తమ ప్రయాణ సమయాన్ని ముందుగానే ప్లాన్ చేసుకోవాల్సి వస్తోంది. కొత్త ఎలివేటెడ్ కారిడార్ అందుబాటులోకి వస్తే ఈ సమస్యకు పరిష్కారం లభించే అవకాశం ఉంది. 24 గంటలూ రాకపోకలు కొనసాగించేలా మార్గాన్ని ఉపయోగించుకునే వీలుంటుందని ప్రాజెక్టు ప్రతిపాదన చెబుతోంది.
శ్రీశైలం మల్లన్న ఆలయానికి ప్రతి ఏడాది పెద్ద సంఖ్యలో భక్తులు వస్తుంటారు. పండుగలు, ప్రత్యేక పూజలు, సెలవు రోజుల్లో భక్తుల రద్దీ మరింత పెరుగుతుంది. అలాంటి సమయంలో ప్రయాణ సమయంపై ఉన్న పరిమితులు కొంత ఇబ్బందిగా మారుతుంటాయి. ఎలివేటెడ్ కారిడార్ అందుబాటులోకి వస్తే భక్తులు తమకు అనుకూలమైన సమయంలో శ్రీశైలానికి వెళ్లే అవకాశం ఉంటుంది. రాత్రి ప్రయాణం చేయాలనుకునే వారికి కూడా ఇది ఉపయోగపడుతుంది. ఒకవైపు భక్తులకు వేగవంతమైన, సురక్షితమైన ప్రయాణ సౌకర్యం కల్పించాలి. మరోవైపు నల్లమల అడవిలోని పులులు, ఇతర వన్యప్రాణులకు ఎలాంటి ఇబ్బంది కలగకుండా చూడాలి. ఈ రెండింటినీ దృష్టిలో పెట్టుకుని కారిడార్ ను నిర్మించాలని ప్రభుత్వం నిర్ణయించింది.
Read Also: కారు, మెట్రో కాదు.. ఇంటికి వెళ్లాలంటే నదిలో దూకాల్సిందే!
Share
పవన్ బర్త్డే వేళ సంచలన నిర్ణయం.. జనసేనలో యువజన విభాగం ఏర్పాటుకు రంగం సిద్ధం!
ప్రపంచ స్థాయి చదువులంటే ఇదేనా? ఫీజు బకాయిల పెండింగ్పై హరీశ్ రావు నిలదీత
