యాపిల్ సైడర్ వెనిగర్ ను బరువు తగ్గాలని చూసే చాలామంది రోజూ తాగుతున్నారు. ఉదయం ఖాళీ కడుపుతో తీసుకుంటే త్వరగా వెయిట్ లాస్ జరుగుతుందని ప్రచారం పెరిగింది. కొందరు సెలబ్రిటీలు కూడా దీనిపై వీడియోలు పెట్టడంతో యువత ఎక్కువగా ఆకర్షితులవుతున్నారు. అయితే వైద్య నిపుణులు మాత్రం ఈ ట్రెండ్‌పై హెచ్చరికలు చేస్తున్నారు. సరైన పద్ధతి లేకుండా ఎక్కువగా తాగితే ఆరోగ్య సమస్యలు రావచ్చని చెబుతున్నారు. చిన్న ప్రయోజనం కోసం పెద్ద నష్టం చేసుకునే పరిస్థితి రావొచ్చని సూచిస్తున్నారు.
నిజంగా బరువు తగ్గుతారా?
యాపిల్ సైడర్ వెనిగర్‌లో అసిటిక్ యాసిడ్ ఉంటుంది. ఇది ఆకలి కొంత తగ్గించే అవకాశం ఉందని కొన్ని పరిశోధనలు చెబుతున్నాయి. దీంతో కొద్దిగా తక్కువ ఆహారం తినొచ్చు. అదే కారణంతో కొందరికి బరువు తగ్గినట్టు అనిపించొచ్చు. కానీ దీన్ని మ్యాజిక్ డ్రింక్‌గా భావించడం తప్పని వైద్యులు స్పష్టం చేస్తున్నారు. వ్యాయామం లేకుండా, మంచి ఆహారపు అలవాట్లు లేకుండా కేవలం వెనిగర్ తాగితే శరీరంలో కొవ్వు కరుగదని చెబుతున్నారు. సోషల్ మీడియాలో కనిపించే చాలా క్లెయిమ్స్‌కు శాస్త్రీయ ఆధారాలు తక్కువగా ఉన్నాయని నిపుణులు గుర్తుచేస్తున్నారు.
Also read: High BP Symptoms: మీలో అప్పుడప్పుడు కనిపించే ఈ చిన్న సంకేతాలు కూడా హైబీపీ ఉన్నట్టు చెప్పేస్తాయి
దంతాలకు నష్టమే
ఈ వెనిగర్‌ను నేరుగా తాగడం చాలా ప్రమాదకరం. ఇందులో యాసిడ్ మోతాదు ఎక్కువగా ఉండటం వల్ల పళ్ల పైపొర నెమ్మదిగా దెబ్బతినొచ్చు. రోజూ ఇలా చేస్తే పళ్లు సున్నితంగా మారే అవకాశం ఉంటుంది. చల్లటి పదార్థాలు తాగినా నొప్పి రావొచ్చు. కొందరిలో గొంతు మంట, ఛాతీలో మంట, కడుపు ఉబ్బరం కూడా కనిపించొచ్చు. ఇప్పటికే గ్యాస్ సమస్యలు ఉన్నవారికి ఇబ్బందులు మరింత పెరగొచ్చు. ఖాళీ కడుపుతో ఎక్కువ మోతాదులో తీసుకుంటే జీర్ణ వ్యవస్థపై ఒత్తిడి పెరిగే ప్రమాదం ఉందని వైద్యులు హెచ్చరిస్తున్నారు.
డయాబెటిస్ ఉన్నవారు మరింత జాగ్రత్తగా ఉండాలని నిపుణులు సూచిస్తున్నారు. యాపిల్ సైడర్ వెనిగర్ కారణంగా కడుపు ఖాళీ కావడం ఆలస్యం కావొచ్చు. దీంతో షుగర్ స్థాయిల్లో మార్పులు వచ్చే అవకాశం ఉంటుంది. కొన్ని మందులు వాడుతున్నవారిలో పొటాషియం స్థాయిలు తగ్గే ప్రమాదం కూడా ఉంది. అలసట, బలహీనత, గుండె దడ వంటి సమస్యలు రావొచ్చు. అందుకే డాక్టర్ సలహా లేకుండా దీన్ని రోజూ వాడటం మంచిది కాదని చెబుతున్నారు. ముఖ్యంగా ఆరోగ్య సమస్యలు ఉన్నవారు సోషల్ మీడియా వీడియోలు చూసి వెంటనే అలవాటు చేసుకోవద్దని సూచిస్తున్నారు.
వైద్యుల ప్రకారం రోజుకు ఒకటి లేదా రెండు టీ స్పూన్లు మాత్రమే తీసుకోవాలి. అది కూడా పెద్ద గ్లాస్ నీటిలో కలిపి తాగాలి. నేరుగా తాగడం పూర్తిగా మానేయాలని చెబుతున్నారు. భోజనం సమయంలో తీసుకుంటే సైడ్ ఎఫెక్ట్స్ తగ్గే అవకాశం ఉంటుంది. తాగిన తర్వాత నోరు నీటితో కడుక్కోవడం మంచిదని సూచిస్తున్నారు. ఆరోగ్యంగా బరువు తగ్గాలంటే సరైన ఆహారం, క్రమం తప్పని వ్యాయామం, మంచి నిద్ర చాలా ముఖ్యమని నిపుణులు చెబుతున్నారు. ఒక్క వెనిగర్‌పై ఆధారపడటం కంటే జీవనశైలిలో చిన్న మార్పులు చేసుకోవడం వల్లే నిజమైన ఫలితం కనిపిస్తుందని స్పష్టం చేస్తున్నారు.
Share
మోదీ ముందు కంటతడి పెట్టిన బండి సంజయ్.. వేదికపై అసలేం జరిగింది?
దృశ్యం - మహారాజా డెడ్లీ కాంబినేషన్ లో మరో మలయాళ సినిమా... క్లైమాక్స్ కి బుర్రపాడు
