Craving Sugar: చక్కెర మానేయాలా ? తీపి కోరికను తీర్చే.. 5 ఆరోగ్యకరమైన మార్గాలు

Sugar Craving: చాలా మందికి భోజనం చేసిన తర్వాత లేదా ఒత్తిడిలో ఉన్నప్పుడు ఏదైనా తీపి పదార్థం తినాలనిపిస్తుంది. దీనినే షుగర్ క్రేవింగ్ అంటారు. అయితే.. మనం తీసుకునే రిఫైన్డ్ చక్కెర శరీరానికి కేవలం కేలరీలను మాత్రమే ఇస్తుంది తప్ప ఎటువంటి పోషకాలను అందించదు. పైగా ఇది రక్తంలో గ్లూకోజ్ స్థాయిలను ఒక్కసారిగా పెంచుతుంది. తీపి తినాలనే మీ కోరికను చంపుకోకుండానే.. ఆరోగ్యకరమైన పద్ధతిలో ఆ కోరికను ఎలా తీర్చుకోవచ్చో, చక్కెర స్థానంలో వేటిని వాడవచ్చో ఇప్పుడు వివరంగా చూద్దాం.

షుగర్ క్రేవింగ్స్‌ను తగ్గించే ఆరోగ్యకరమైన ప్రత్యామ్నాయాలు:

చక్కెరకు బదులుగా ఈ కింది సహజ సిద్ధమైన పదార్థాలను తీసుకోవడం వల్ల రుచితో పాటు ఆరోగ్యం కూడా మీ సొంతమవుతుంది.

1. తాజా పండ్లు :
చక్కెరకు ఉత్తమమైన, మొదటి ప్రత్యామ్నాయం తాజా పండ్లు. ఆపిల్, అరటి, మామిడి లేదా ద్రాక్ష పండ్లలో సహజమైన చక్కెర తో పాటు ఫైబర్, విటమిన్లు, యాంటీ ఆక్సిడెంట్స్ ఉంటాయి. పండ్లలోని పీచు పదార్థం రక్తంలో చక్కెర నెమ్మదిగా కలిసేలా చేస్తుంది. దీని వల్ల మీకు ఎక్కువ సేపు ఆకలి వేయదు.

2. డ్రై ఫ్రూట్స్, ఖర్జూరం :
ఖర్జూరాలను ‘ప్రకృతి ఇచ్చిన క్యాండీలు’ అని పిలుస్తారు. ఇవి చాలా తియ్యగా ఉండటమే కాకుండా పొటాషియం, ఫైబర్ , ఐరన్‌ను సమృద్ధిగా అందిస్తాయి. ఎండుద్రాక్ష, అత్తి పండ్లు కూడా షుగర్ క్రేవింగ్స్‌ను అద్భుతంగా తగ్గిస్తాయి. స్వీట్స్ తయారు చేసేటప్పుడు చక్కెరకు బదులుగా ఖర్జూర పేస్ట్‌ను వాడటం ఒక స్మార్ట్ పద్ధతి.

3. డార్క్ చాక్లెట్:
మీకు చాక్లెట్ తినాలనిపిస్తే.. మిల్క్ చాక్లెట్ బదులు కనీసం 70% కోకో ఉన్న డార్క్ చాక్లెట్ ఎంచుకోండి. ఇందులో చక్కెర తక్కువగా ఉంటుంది . గుండె ఆరోగ్యానికి మేలు చేసే పాలీఫెనాల్స్ ఉంటాయి. ఇది మెదడులో సెరోటోనిన్ స్థాయిలను పెంచి మూడ్‌ని మెరుగుపరుస్తుంది.

4. పెరుగు , బెర్రీలు :

తీపి తినాలనిపించినప్పుడు ఫ్లేవర్డ్ యోగర్ట్ కాకుండా, సాధారణ పెరుగులో స్ట్రాబెర్రీలు లేదా బ్లూబెర్రీలు కలుపుకుని తినండి. పెరుగులోని ప్రోటీన్ కడుపు నిండిన అనుభూతిని ఇస్తే.. బెర్రీలు తీపి రుచిని అందిస్తాయి.

5. తీపి పొటాటో :
స్వీట్ పొటాటో లేదా చిలగడదుంపలు సహజంగానే తీపిని కలిగి ఉంటాయి. వీటిలో ఉండే కార్బోహైడ్రేట్లు శరీరానికి శక్తినిస్తాయి. ఉడకబెట్టిన చిలగడదుంపలపై కొద్దిగా దాల్చిన చెక్క పొడి చల్లుకుని తింటే అది అద్భుతమైన డెజర్ట్‌లా పనిచేస్తుంది.

Also Read: వైరల్ ఫీవర్ డైట్.. త్వరగా కోలుకోవడానికి ఏం తినాలో తెలుసా ?

6. స్టీవియా, తేనె:

చక్కెరకు బదులుగా స్టీవియా వంటి సహజ స్వీట్నర్లను వాడవచ్చు. ఇందులో కేలరీలు ఉండవు. అలాగే, పరిమిత పరిమాణంలో తేనె లేదా బెల్లం వాడటం కూడా రిఫైన్డ్ చక్కెర కంటే మంచిది. ఎందుకంటే వీటిలో యాంటీ ఆక్సిడెంట్స్ , మినరల్స్ ఉంటాయి.

చక్కెర క్రేవింగ్స్‌ను అదుపు చేయడం అంటే.. తీపిని పూర్తిగా మానేయడం కాదు, సరైన తీపిని ఎంచుకోవడం. పైన పేర్కొన్న సహజ ప్రత్యామ్నాయాలను మీ ఆహారంలో భాగం చేసుకోవడం ద్వారా బరువును అదుపులో ఉంచుకోవడమే కాకుండా.. దీర్ఘకాలిక ఆరోగ్య సమస్యల నుంచి తప్పించుకోవచ్చు.