వర్షాకాలంలో తరచూ అనారోగ్యానికి గురవుతున్నారా? రోగ నిరోధక శక్తి పెంచుకోవడానికి ఈ పుడ్స్

Healthy Foods for Rainy Season| వర్షం పడుతుంటే వేడి వేడి పకోడీలు, చాట్, ఫ్రైడ్ స్నాక్స్ తినాలని చాలామందికి అనిపిస్తుంది. కానీ ఈ అలవాటే ఆరోగ్య సమస్యలకు ప్రధాన కారణం. ఎప్పుడైనా ఇలాంటి ఫ్రైడ్ ఫుడ్స్ తినవచ్చు. కానీ తరచూ తినడం వల్ల ఆరోగ్య సమస్యలు వస్తాయి. వర్షాకాలంలో వాతావరణ మార్పులు, అధిక తేమ కారణంగా జీర్ణక్రియ నెమ్మదిస్తుంది. అందుకే ఈ సీజన్‌లో రుచితో పాటు పోషకాలు అందించే ఆహారాలను ఎంచుకోవడం మంచిది. మీ రోజువారీ డైట్‌లో కొన్ని సింపుల్ మార్పులు చేస్తే ఆరోగ్యకరమైన ఆహారపు అలవాట్లను కొనసాగించవచ్చు.

1. తాజా సీజనల్ పండ్లను తీసుకోండి

వర్షాకాలంలో మీ డైట్‌లో భాగంగా తాజా పండ్లు తినండి. బొప్పాయి, యాపిల్, పియర్, దానిమ్మ వంటి పండ్లు మంచి ఆప్షన్లు. వీటిలో ఫైబర్, విటమిన్లు, ఖనిజాలు వంటి పోషకాలు లభిస్తాయి. పండ్లను తినే ముందు వాటిని శుభ్రంగా కడగడం ముఖ్యం. బయట ఎక్కువసేపు ఉంచిన కట్ చేసిన పండ్లకు బదులుగా ఇంట్లో తాజాగా కట్ చేసిన పండ్లను ఎంచుకోండి.

2. ఆకుకూరల బదులు తాజాగా కడిగిన కూరగాయలు తినాలి

వర్షాకాలంలో ఆకుకూరల్లో మట్టి, చిన్న పురుగులు దాగి ఉండే అవకాశం ఉంటుంది. అందుకే వాటిని శుభ్రం చేయడానికి ఎక్కువ జాగ్రత్త అవసరం. ఈ సీజన్‌లో బాగా కడిగి, తాజాగా వండిన కూరగాయలను తినాలి. సొరకాయ, బీరకాయ, క్యారెట్, గుమ్మడికాయ, పొట్లకాయ వంటి కూరగాయలు మంచి ఎంపికలు. కూరగాయలను సరిగ్గా ఉడికించి తినడం అలవాటు చేసుకోండి.

3. పప్పులు, తృణధాన్యాలలో మంచి పోషకాలు

పప్పులు, శనగలు, రాజ్మా, ఇతర తృణధాన్యాలు మంచి పోషకాలను అందిస్తాయి. వీటిలో ప్రోటీన్, ఫైబర్, విటమిన్లు, ఖనిజాలు ఉంటాయి. ఫైబర్ ఎక్కువసేపు కడుపు నిండిన అనుభూతి కలిగిస్తాయి. వర్షాకాలంలో పెసరపప్పు ఖిచ్డీ మంచి తేలికైన భోజనం. పప్పు, కూరగాయలు, రోటీ కలిపి కూడా సమతుల్యమైన భోజనం తినాలి.

4. ఇంట్లో తయారుచేసిన వేడి సూప్‌ ఆస్వాదించండి

వర్షంలో వేడి సూప్ తాగడం రుచిగా, హాయిగా అనిపిస్తుంది. టమాటా, క్యారెట్, మిక్స్‌డ్ వెజిటబుల్ లేదా దాల్ (పప్పు) సూప్‌ను ఇంట్లో తయారుచేసుకోవచ్చు. సూప్‌లో ఎక్కువ క్రీమ్ లేదా వెన్నను ఉపయోగించకుండా కూరగాయలు, సహజమైన మసాలాలు ఉపయోగించండి. సాయంత్రం తేలికగా ఆకలి వేసినప్పుడు సూప్ మంచి ఎంపికగా ఉంటుంది.

5. నట్స్, విత్తనాలు పరిమితంగా తీసుకోండి

బాదం, వాల్‌నట్స్, గుమ్మడి గింజలు, అవిసె గింజలు పోషకాలను అందించే ఆహారాలు. వీటిలో ఆరోగ్యకరమైన కొవ్వులు, ప్రోటీన్, ఫైబర్ వంటి పోషకాలు ఉంటాయి. వీటిని అల్పాహారంలో లేదా సాయంత్రం స్నాక్‌గా తీసుకోవడం మంచిది. అయితే వీటిలో కేలరీలు ఎక్కువగా ఉండొచ్చు కాబట్టి పరిమిత పరిమాణంలో తీసుకోవడం మంచిది.

ఇంట్లో తయారుచేసిన తాజా ఆహారానికే ప్రాధాన్యం ఇవ్వాలి

వర్షాకాలంలో ఆహారం తాజాదనం, పరిశుభ్రతపై ప్రత్యేక శ్రద్ధ పెట్టాలి. బయట ఎక్కువసేపు ఉంచిన కట్ చేసిన పండ్లు, చాట్, స్ట్రీట్ ఫుడ్‌కు దూరంగా ఉండటం మంచిది. తరచుగా ఫ్రైడ్ ఫుడ్స్ తినడం వల్ల అధిక కేలరీలు, కొవ్వులు తీసుకునే అవకాశం ఉంటుంది. దాల్ రైస్, ఖిచ్డీ, రోటీ కూర, వెజిటబుల్ ఉప్మా వంటి ఇంటి ఆహారాన్ని ఎంచుకోవడం బెటర్.

Also Read: నేలపై కూర్చొని భోజనం చేయడం మంచిదేనా? వాస్తు ప్రకారం ప్రభావం ఇదే

రోజంతా తగినంత నీరు తాగాలి

వర్షాకాలంలో దాహం తక్కువగా అనిపించడంతో చాలామంది నీటిని తక్కువగా తాగుతారు. అయితే శరీరానికి ప్రతి సీజన్‌లో తగినంత ద్రవాలు అవసరం. దాహం వేసినప్పుడు మాత్రమే కాకుండా రోజంతా కొద్దికొద్దిగా నీరు తాగండి. ఇంట్లో తయారుచేసిన నిమ్మరసం లేదా తక్కువ చక్కెరతో తయారుచేసిన హెర్బల్ డ్రింక్స్ కూడా తీసుకోవచ్చు.

Also Read: కడుపు బరువుగా అనిపిస్తుందా? భోజనం తర్వాత పైనాపిల్ తింటే చాలా ప్రయోజనాలు

వర్షాకాలంలో ఆహారంపై దృష్టి ఉండండి

వర్షాకాలంలో ఆరోగ్యకరమైన ఆహారం కోసం ఖరీదైన పదార్థాలు అవసరం లేదు. తాజా ఆహారం, సరైన పరిశుభ్రత, సమతుల్యమైన భోజనంపై దృష్టి పెట్టండి. మంచి ఆహారపు అలవాట్లతో పాటు తగిన నిద్ర, శారీరక చురుకుదనం కూడా ముఖ్యమే.