Jaggery: మీరు తినే బెల్లంలో సోడా కలిపారో లేదో.. ఇంట్లోనే ఇలా కనిపెట్టేయండి!

Jaggery: మన భారతీయ వంటకాల్లో బెల్లానికి ప్రత్యేక స్థానం ఉంది. పరమాన్నం చేసినా, ఆయుర్వేద పానీయాలు తయారు చేసినా పంచదార కంటే బెల్లానికే ఎక్కువ ప్రాధాన్యత ఇస్తాం. దీనివల్ల ఆరోగ్యానికి ఎంతో మేలు జరుగుతుందని మన నమ్మకం. అయితే ప్రస్తుతం మార్కెట్లో లభించే బెల్లం ఎంతవరకు స్వచ్ఛమైనది అనేది ఇప్పుడు పెద్ద ప్రశ్నగా మారింది. లాభాల కోసం కొంతమంది వ్యాపారులు బెల్లంలో పంచదార, సున్నం పొడి లేదా బేకింగ్ సోడా వంటివి కలుపుతున్నారు. ఈ కల్తీ వల్ల బెల్లానికి ఉన్న సహజ గుణాలు పోవడమే కాకుండా ఆరోగ్యానికీ హాని కలుగుతోంది.

కల్తీ ఎందుకు జరుగుతుంది?

సాధారణంగా బెల్లానికి మార్కెట్లో మంచి డిమాండ్ ఉంటుంది. ముఖ్యంగా పండుగ సీజన్లలో దీని వినియోగం ఇంకా పెరుగుతుంది. దీన్ని ఆసరాగా చేసుకుని బెల్లం రంగును మెరుగుపరచడానికి, బరువు పెంచడానికి కొన్ని రసాయనాలను కలుపుతుంటారు. ముఖ్యంగా బేకింగ్ సోడాను కలిపితే బెల్లం ముక్కలు చాలా మృదువుగా, చూడటానికి ఆకర్షణీయంగా కనిపిస్తాయి. ఇలాంటి తళతళలాడే బెల్లాన్ని చూసి మనం స్వచ్ఛమైనదని మోసపోతుంటాం.

Also Read: అరటి పండ్లను ఇలా వదిలేస్తున్నారా? బల్లి ఏం చేసిందో మీరే చూడండి!

కల్తీని కనిపెట్టే పద్ధతి ఇది:

మన ఇంట్లో ఉండే బెల్లం స్వచ్ఛమైనదో కాదో తెలుసుకోవడానికి భారత ఆహార భద్రత ప్రమాణాల సంస్థ (FSSAI) ఒక సులభమైన పరీక్షను సూచించింది. ఒక చిన్న గ్లాసులో లేదా టెస్ట్ ట్యూబ్‌లో కొద్దిగా బెల్లం పొడిని తీసుకోవాలి. దానికి 3 మి.లీ. హైడ్రోక్లోరిక్ యాసిడ్ (HCL)‌ను కలపాలి. ఒకవేళ బెల్లం ముక్కల నుంచి బుడగలు వస్తుంటే, అందులో బేకింగ్ సోడా కలిపినట్లు అర్థం చేసుకోవాలి. ఎలాంటి మార్పు లేకుండా బెల్లం అలాగే ఉంటే అది స్వచ్ఛమైనదని నిర్ధారించుకోవచ్చు. బెల్లంలోని సోడియం బైకార్బోనేట్ యాసిడ్‌తో కలిసినప్పుడు కార్బన్ డయాక్సైడ్ విడుదలవుతుంది కాబట్టి.. బుడగలు వస్తాయి.

కల్తీ బెల్లంతో కలిగే నష్టాలు:

నిజానికి బేకింగ్ సోడా వల్ల పెద్దగా ముప్పు లేదనిపించినా, అది బెల్లం యొక్క సహజత్వాన్ని దెబ్బతీస్తుంది. ఇలా సోడా కలిపిన బెల్లాన్ని తరచుగా తీసుకోవడం వల్ల జీర్ణక్రియ మందగించడమే కాకుండా శరీరానికి అందాల్సిన పోషకాలు సరిగ్గా అందవు. బెల్లం వల్ల వచ్చే రోగనిరోధక శక్తి, ఉత్సాహం వంటి ప్రయోజనాలు కల్తీ బెల్లంతో దొరకవు.

బెల్లం కొనేముందు:

మనం బెల్లం కొనేటప్పుడు కొన్ని విషయాలను గుర్తుంచుకోవాలి. మరీ తెల్లగా లేదా మెరుస్తూ ఉండే బెల్లాన్ని కొనకపోవడమే మంచిది. ముదురు రంగులో ఉండే బెల్లం సాధారణంగా తక్కువ ప్రాసెసింగ్ అవుతుంది కాబట్టి.. అది ఆరోగ్యానికి మేలు చేస్తుంది. ప్యాకెట్ మీద FSSAI లైసెన్స్ నంబర్ ఉందో లేదో చూసుకోవాలి. అలాగే నమ్మకమైన వ్యాపారుల వద్దే కొనడం ఉత్తమం. ఇలాంటి చిన్న చిన్న జాగ్రత్తలు పాటిస్తే మన ఆరోగ్యాన్ని మనం కాపాడుకోవచ్చు.

Also Read: ఎండలు మండిపోతున్నాయని చెరకు రసం తాగుతున్నారా? ఈ జాగ్రత్తలు పాటించకపోతే డేంజరే!