Health Tips: చాలామంది బరువు తగ్గడం అంటే కేవలం జిమ్లో గంటల తరబడి చెమటలు చిందించడం అనుకుంటారు. కానీ అసలైన మార్పు వంటగది నుంచే మొదలవుతుందని పోషకాహార నిపుణులు చెబుతున్నారు. ముఖ్యంగా ఇంటి బాధ్యతలు, ఆఫీసు పని ఒత్తిడిలో మహిళలు తమ ఆరోగ్యాన్ని గాలికొదిలేస్తుంటారు. మనం చేసే కొన్ని సాధారణ తప్పులే దీర్ఘకాలిక వ్యాధులకు దారి తీస్తాయి. ఆ చిన్న పొరపాట్లను సరిదిద్దుకుంటే ఆరోగ్యం మీ గుప్పిట్లోనే ఉంటుంది.
త్వరగా పనైపోతుందని పిల్లల లంచ్ బాక్సుల్లో ప్యాక్డ్ ఫుడ్స్ పెట్టడం ఇప్పుడు ఫ్యాషన్ అయిపోయింది. కడుపు నిండుతుంది కానీ పోషకాలు మాత్రం శూన్యం. ఇలాంటి అలవాటే ఊబకాయం, షుగర్ వంటి సమస్యలకు పునాది వేస్తుంది. వీలైనంత వరకు తాజా కూరగాయలు, అప్పటికప్పుడు వండుకున్న పదార్థాలనే తీసుకోవాలి. ఒకవేళ పొద్దున్నే వంట చేయడం కుదరకపోతే ఓట్స్ను పాలలో కలుపుకుని తీసుకోవడం లేదా త్వరగా అయిపోయే సలాడ్స్ను ప్లాన్ చేసుకోవడం ఉత్తమం.
Also Read: పురుషుల్లోనే ఎక్కువగా జుట్టు రాలడానికి గల 4 ప్రధాన కారణాలు ఇవే!
ఆకలి వేసినప్పుడు చిప్స్ తినడం లేదా నూడుల్స్ వండుకోవడమో ఈజీ. కానీ ఆ రుచి వెనుక ప్రాణాంతక గుండె జబ్బులు దాగున్నాయి. మన అమ్మమ్మల కాలం నాటి సున్నుండలు, జంతికలు లేదా వేయించిన పప్పుల వంటి హెల్దీ స్నాక్స్ను వారానికి ఒక్కరోజు టైమ్ కేటాయించుకుని, ఇంట్లోనే చేసి పెట్టుకుంటే, ఆఫీసులో ఆకలి వేసినప్పుడు జంక్ ఫుడ్ జోలికి వెళ్లకుండా ఉండొచ్చు.
ప్రస్తుతం చాలామందికి భోజనం చేయడం ఒక తంతుగా మారిపోయింది. టీవీ చూస్తూనో, ఫోన్ స్క్రోల్ చేస్తూనో గబగబా నోట్లో కుక్కుకోవడం వల్ల ఏం తింటున్నామో, ఎంత తింటున్నామో మెదడుకు ఎక్కడం లేదు. దీంతో జీర్ణక్రియ మందగించి కొలెస్ట్రాల్ పెరుగుతుంది. 5 నిమిషాల్లో భోజనం ముగించేసినా సరే, ప్రశాంతంగా కూర్చుని రుచిని ఆస్వాదిస్తూ తినాలి. అప్పుడే మీరు తీసుకున్న ఆహారంలోని సారం శరీరానికి పడుతుంది.
మారుతున్న జీవనశైలికి అనుగుణంగా ఆహారపు అలవాట్లను మార్చుకోవడం కాదు.. మన ఆరోగ్యానికి అనుగుణంగా మన జీవనశైలిని మార్చుకోవాలి. మీ రోజువారీ మెనూలో చిన్నపాటి జాగ్రత్తలు తీసుకుంటే ఆసుపత్రుల చుట్టూ తిరిగే పని ఉండదు. శరీరానికి కావాల్సింది కేవలం కేలరీలు మాత్రమే కాదు, నాణ్యమైన పోషకాలు కూడా అందాలని గుర్తించుకోండి.
Also Read: క్యాన్సర్ కణాలకు మరణశాసనం.. కొత్త యాంటీబాడీతో ప్రాణాంతక వ్యాధికి అడ్డుకట్ట!
Share
Ameesha Patel: అమీషా పటేల్ కు భారీ షాక్.. నాన్ బెయిలబుల్ వారెంట్.. స్పందించిన నటి!
Amritha Aiyer : చీరకట్టులో కోమలమైన మోముతో ఆకట్టుకుంటున్న అమృత!
