Rosemary Water: మీ మెదడును చురుగ్గా మార్చే రోజ్మేరీ టీ.. 21 రోజుల్లోనే అద్భుత ఫలితాలు !

Rosemary Water: రోజ్మేరీ సుగంధ ద్రవ్యం మాత్రమే కాదు.. ఇది ఒక అద్భుతమైన ఔషధ గుణాలున్న మొక్క. గత కొన్ని ఏళ్లుగా ఆరోగ్య స్పృహ ఉన్నవారు రోజ్మేరీ నీటిని తాగడం ఒక ఆరోగ్యకరమైన అలవాటుగా మార్చుకున్నారు. మరి మీరు వరుసగా 21 రోజుల పాటు రోజ్మేరీ నీటిని తాగితే మీ శరీరంలో ఎలాంటి మార్పులు వస్తాయో వివరంగా ఇప్పుడు తెలుసుకుందాం.

రోజ్మేరీ నీటిని ఎలా తయారు చేయాలి ?

తాజా రోజ్మేరీ కొమ్మలను లేదా ఎండిన ఆకులను నీటిలో వేసి బాగా మరిగించాలి. ఆ నీటిని వడగట్టి.. గోరు వెచ్చగా ఉన్నప్పుడు తాగాలి. కొందరు దీనికి నిమ్మరసం లేదా తేనెను కూడా కలుపుకుంటారు.

21 రోజుల్లో కలిగే మార్పులు:

1. మెరుగైన జీర్ణశక్తి :

మొదటి వారంలోనే మీ జీర్ణ వ్యవస్థలో సానుకూల మార్పులు గమనిస్తారు. రోజ్మేరీలో ఉండే యాంటీ ఆక్సిడెంట్స్ కడుపు ఉబ్బరం, గ్యాస్ సమస్యలను తగ్గిస్తాయి. ఇది జీర్ణ రసాల ఉత్పత్తిని ప్రేరేపించి.. తిన్న ఆహారం త్వరగా అరిగేలా చేస్తుంది.

2. జ్ఞాపకశక్తి, ఏకాగ్రత:

రోజ్మేరీని “జ్ఞాపకశక్తి మొక్క” అని కూడా పిలుస్తారు. ఇందులోని ‘సినీయోల్’ అనే సమ్మేళనం మెదడు పని తీరును మెరుగు పరుస్తుంది. 21 రోజుల పాటు క్రమం తప్పకుండా తాగడం వల్ల ఏకాగ్రత పెరగడం, మతి మరుపు తగ్గడం, మానసిక ప్రశాంతత లభించడం వంటి మార్పులు కనిపిస్తాయి. విద్యార్థులకు ఆఫీసు పనుల్లో ఒత్తిడి ఎదుర్కొనే వారికి ఇది బాగా పనిచేస్తుంది.

3. మెరిసే చర్మం, జుట్టు:

రోజ్మేరీ నీటిలో యాంటీ ఇన్ఫ్లమేటరీ, యాంటీ మైక్రోబియల్ గుణాలు పుష్కలంగా ఉంటాయి. ఇవి రక్త ప్రసరణను మెరుగు పరుస్తాయి. దీని వల్ల చర్మంపై మొటిమలు తగ్గడమే కాకుండా.. చర్మం సహజంగా మెరుస్తుంది. అలాగే.. ఇది జుట్టు రాలడాన్ని తగ్గించి.. కుదుళ్లను బలోపేతం చేయడానికి సహాయ పడుతుంది.

4. రోగ నిరోధక శక్తి పెరుగుదల:

రోజ్మేరీలో కార్నోసిక్ యాసిడ్, రోజ్మరినిక్ యాసిడ్ వంటి శక్తివంతమైన యాంటీ ఆక్సిడెంట్స్ ఉంటాయి. ఇవి శరీరంలోని ఫ్రీ రాడికల్స్‌తో పోరాడి కణాల నాశనాన్ని అడ్డుకుంటాయి. 21 రోజుల వ్యవధిలో మీ రోగ నిరోధక శక్తి పెరిగి, తరచుగా వచ్చే జలుబు, దగ్గు వంటి ఇన్ఫెక్షన్ల నుంచి రక్షణ లభిస్తుంది.

5. ఒత్తిడి, ఆందోళన తగ్గింపు:

రోజ్మేరీ నీరు తాగడం వల్ల శరీరంలో ‘కార్టిసాల్’ (ఒత్తిడి హార్మోన్) స్థాయిలు తగ్గుతాయి. ఇది నాడీ వ్యవస్థను శాంతపరిచి.. మంచి నిద్ర పట్టేలా చేస్తుంది. మానసిక ఆందోళనతో బాధ పడేవారికి ఇది ఒక సహజమైన ఔషధంగా పనిచేస్తుంది.

Also Read: జీర్ణక్రియ మెరుగుపడాలా? అయితే మీ డిన్నర్ టైమ్ మార్చుకోవాల్సిందే !

తీసుకోవాల్సిన జాగ్రత్తలు:

రోజ్మేరీ నీరు ఆరోగ్యానికి మంచిదే అయినప్పటికీ.. కొన్ని జాగ్రత్తలు తప్పనిసరి.

గర్భిణీలు: గర్భిణీలు రోజ్మేరీ నీటిని అతిగా తాగకూడదు. ఇది కొన్నిసార్లు గర్భాశయ సంకోచాలకు దారితీయవచ్చు.

అలెర్జీ: మీకు పుదీనా జాతి మొక్కల పట్ల అలెర్జీ ఉంటే.. జాగ్రత్తగా ఉండాలి.

పరిమితి: రోజుకు ఒకటి లేదా రెండు కప్పుల కంటే ఎక్కువ తాగకూడదు. ఏదైనా ఆరోగ్య సమస్యలు ఉన్నవారు డాక్టర్ సలహా తీసుకోవడం ఉత్తమం.