మే, జూన్ నెలల్లో వేసవి కాలం పీక్స్లో ఉంటుంది. ఈ రెండు నెలలు ఉష్ణోగ్రతలు.. ఎక్కువగా ఉండటం వల్ల చాలా మంది రాత్రిపూట సరిగా నిద్రపోలేక ఇబ్బందులు పడుతుంటారు. పగటిపూట వేడి వల్ల అలసిపోయినా, రాత్రి బెడ్పై పడుకున్న తర్వాత కూడా నిద్ర రావడం కష్టంగా మారుతుంది. కొందరు తరచుగా మేల్కొంటూ ఉంటారు. వైద్యులు ఈ సమస్యని.. ‘సమ్మర్ ఇన్సోమ్నియా’ లేదా వేసవి నిద్రలేమి అని పిలుస్తారు. వేడి వాతావరణం మాత్రమే కాకుండా, శరీరంలో జరిగే కొన్ని సహజ మార్పులు కూడా దీనికి కారణమవుతాయి.
మన శరీరం గాఢ నిద్రలోకి వెళ్లాలంటే శరీర అంతర్గత ఉష్ణోగ్రత కొద్దిగా తగ్గాలి. సాధారణంగా రాత్రి సమయంలో శరీరం సహజంగానే చల్లబడేందుకు ప్రయత్నిస్తుంది. కానీ వేసవిలో అధిక వేడి, తేమ కారణంగా ఈ ప్రక్రియ సరిగా జరగదు. శరీరం వేడిగా ఉన్నప్పుడు మెదడు నిద్ర సంకేతాలను ఆలస్యంగా పంపిస్తుంది. దీంతో నిద్ర పట్టడానికి ఎక్కువ సమయం పడుతుంది.
వేసవిలో పగలు పెద్దది, రాత్రులు చిన్నవి. అంటే సూర్యుడు ఎక్కువ సమయం ఆకాశంలో ఉంటాడు. త్వరగా ఉదయిస్తాడు. చలికాలంతో పోలిస్తే ఆలస్యంగా అస్తమిస్తాడు. అంటే సూర్యాస్తమయం ఆలస్యంగా జరుగుతుంది. దీని వల్ల శరీరంలోని జీవ గడియారం గందరగోళానికి గురవుతుంది. సాధారణంగా రాత్రి సమయంలో విడుదలయ్యే మెలటోనిన్ అనే నిద్ర హార్మోన్ ఆలస్యంగా విడుదలవుతుంది. ఫలితంగా రాత్రి ఆలస్యమైనా నిద్ర రావడం కష్టమవుతుంది. అదనంగా, రాత్రిపూట ఎక్కువగా చెమట పట్టడం వల్ల శరీరంలో నీటి శాతం తగ్గుతుంది. ఈ డీహైడ్రేషన్ కారణంగా అసౌకర్యం పెరిగి నిద్ర మధ్యలో పలుమార్లు మేల్కొనే అవకాశం ఉంటుంది.
నిద్రకు ముందు సాధారణ లేదా గోరువెచ్చని నీటితో స్నానం చేయడం వల్ల శరీర ఉష్ణోగ్రత తగ్గుతుంది. ఇది మెదడుకు విశ్రాంతి సమయం వచ్చిందనే సంకేతాన్ని ఇస్తుంది. దీంతో నిద్ర త్వరగా పట్టే అవకాశం ఉంటుంది.
వేసవిలో రాత్రి సమయంలో హెవీ లేదా మసాలా ఎక్కువగా ఉన్న ఫుడ్ తినడం మంచిది కాదు. అలాంటి ఆహారం జీర్ణం కావడానికి ఎక్కువ సమయం తీసుకుంటుంది. దీంతో శరీరంలో వేడి పెరుగుతుంది. తేలికపాటి ఆహారం తీసుకోవడం వల్ల జీర్ణక్రియ సులభంగా జరిగి శరీరం చల్లగా ఉంటుంది.
Also Read: చిన్నారుల కోసం ఈ బేబీ ప్రొడక్ట్స్ కొనకూడదు.. తల్లిదండ్రులకు డాక్టర్ల హెచ్చరిక
సాయంత్రం 6 గంటల తర్వాత టీ, కాఫీ లేదా కెఫిన్ ఉన్న డ్రింక్స్ తాగకూడదు. కెఫిన్ శరీరాన్ని ఉత్తేజపరచడంతో పాటు నీటి శాతం తగ్గిస్తుంది. దీని వల్ల నిద్ర మరింత ఆలస్యంగా వస్తుంది. దానికి బదులుగా తగినంత నీరు తాగడం మంచిది.
బెడ్ రూమ్ వీలైనంత చల్లగా, చీకటిగా ఉంచాలి. గాలి సరిగా ఆడేలా చూడాలి. కాటన్ బెడ్షీట్లు, తేలికపాటి దుప్పట్లు ఉపయోగించడం వల్ల శరీరం చల్లగా ఉంటుంది. ఇలాంటి చిన్న మార్పులు కూడా వేసవిలో ప్రశాంతమైన నిద్రకు సహాయపడతాయి.
Share
కెమికల్స్ లేకుండా మౌత్వాష్ ఇంట్లోనే తయారు చేయండి.. జామ ఆకులతో పంటి సంరక్షణ
మెరిసేపోయే ముఖ చర్మం కోసం సింపుల్ చిట్కా.. కేవలం 2 నిమిషాలు ఈ స్పెషల్ క్యూబ్స్ రబ్ చేస్తే చాలు
