Yoga: యోగాతో ఆందోళనకు చెక్.. మరెన్నో బెనిఫిట్స్

Yoga: మానసిక ప్రశాంతతకు, అంతర్గత శక్తికి యోగా ఒక అద్భుతమైన మార్గం. నేటి ఉరుకుల పరుగుల జీవితంలో ఒత్తిడి, ఆందోళన సర్వసాధారణం అయిపోయాయి. ఈ నేపథ్యంలో ‘యోగా’ కేవలం శారీరక వ్యాయామంగానే కాకుండా.. మనసును నియంత్రించే శక్తివంతమైన సాధనంగా పనిచేస్తుంది. క్రమం తప్పకుండా యోగా సాధన చేయడం వల్ల మెదడు చురుగ్గా మారుతుంది. అంతే కాకుండా భావోద్వేగాల మీద నియంత్రణ పెరుగుతుంది. ఇది డిప్రెషన్, యాంగ్జైటీ వంటి సమస్యల నుంచి ఉపశమనం కలిగించి, జీవితం పట్ల సానుకూల దృక్పథాన్ని పెంపొందిస్తుంది.

మానసిక ఆరోగ్యం కోసం యోగా:

ఆధునిక ప్రపంచంలో మనిషి ఎదుర్కొంటున్న అతిపెద్ద సవాలు శారీరక అనారోగ్యం కంటే మానసిక అశాంతి. ప్రపంచ వ్యాప్తంగా మిలియన్ల మంది ఒత్తిడి , ఆందోళన, నిరాశ వంటి సమస్యలతో సతమతమవుతున్నారు. ఈ సమస్యలకు పరిష్కారంగా వేల ఏళ్ల క్రితమే మన దేశం అందించిన గొప్ప సంపద యోగా.

1. ఒత్తిడిని తగ్గించడంలో యోగా పాత్ర:
మనం ఒత్తిడికి గురైనప్పుడు శరీరంలో ‘కోర్టిసాల్’ అనే హార్మోన్ విడుదలవుతుంది. యోగాలోని ఆసనాలు, ప్రాణాయామం ఈ కోర్టిసాల్ స్థాయిలను తగ్గించి, శరీరాన్ని విశ్రాంతి స్థితిలోకి తీసుకెళ్తాయి. శ్వాసపై ధ్యాస పెట్టడం వల్ల నాడీ వ్యవస్థ శాంతిస్తుంది.

2. భావోద్వేగాల నియంత్రణ:
చాలామంది చిన్న చిన్న విషయాలకే కోపానికి లేదా నిరాశకు లోనవుతుంటారు. యోగా సాధన చేయడం వల్ల మెదడులోని ‘ప్రీఫ్రంటల్ కార్టెక్స్’ భాగం బలోపేతం అవుతుంది. ఇది మనం భావోద్వేగాలను సరిగ్గా నిర్వహించుకోవడానికి, కష్ట సమయాల్లో కూడా స్థిరంగా ఉండటానికి సహాయ పడుతుంది.

3. ఏకాగ్రత, జ్ఞాపకశక్తి:
యోగాలో భాగమైన ధ్యానం మనసును ఒకే చోట కేంద్రీకరించేలా చేస్తుంది. ఇది విద్యార్థులకు, ఉద్యోగులకు ఎంతో మేలు చేస్తుంది. ప్రతిరోజూ 10-15 నిమిషాల ధ్యానం చేయడం వల్ల మెదడులోని నెరైన్ కణాలు చురుగ్గా మారి జ్ఞాపకశక్తి పెరుగుతుంది.

4. నిద్రలేమి సమస్యకు చెక్:
మానసిక ఆరోగ్యానికి సరైన నిద్ర చాలా ముఖ్యం. మనసు నిండా ఆలోచనలు ఉన్నప్పుడు నిద్ర పట్టడం కష్టమవుతుంది. ‘శవాసనం’ వంటి విశ్రాంతి ఆసనాలు, ‘భ్రామరి ప్రాణాయామం’ చేయడం వల్ల మనసు ప్రశాంతంగా మారి, గాఢ నిద్ర పడుతుంది.

Also Read: నడుము నొప్పికి అసలు కారణం ఇదేనా? ప్రమాదకరమైన వ్యాధులను గుర్తించే వన్ మినిట్ గైడ్

మానసిక ఆరోగ్యం కోసం చేయాల్సిన ముఖ్యమైన ఆసనాలు:
బాలాసనం: వెన్నుపామును రిలాక్స్ చేసి, ఒత్తిడిని తగ్గిస్తుంది.
వృక్షాసనం: మనసులో ఏకాగ్రతను, శారీరక సమతుల్యతను పెంచుతుంది.
ప్రాణాయామం: ఆక్సిజన్ సరఫరాను పెంచి, ఆందోళనను దూరం చేస్తుంది.
శవాసనం:పూర్తి శరీరానికి, మెదడుకు విశ్రాంతిని ఇస్తుంది.

యోగా అంటే కేవలం శరీరాన్ని వంచడం కాదు. అది మనసును మలచుకోవడం. ఇది మనల్ని మనం ప్రేమించుకునేలా చేస్తుంది. ప్రతి రోజూ కనీసం 30 నిమిషాల పాటు యోగా కోసం కేటాయిస్తే.. అది మన జీవిత నాణ్యతను మెరుగు పరుస్తుంది. ఆరోగ్యకరమైన మనసే ఆనందకరమైన జీవితానికి పునాది.