Mystery Thriller: ఇంట్లో పుట్టినరోజు వేడుక… మరుసటి రోజు అదే ఇంట్లో కుటుంబ పెద్ద శవమై కనిపిస్తే ? ఆ ఇంట్లో ఉన్న ప్రతి ఒక్కరిపై అనుమానం వస్తే ? పైగా పోలీసులు ఎంత దర్యాప్తు చేసినా అసలు హంతకుడు ఎవరో అంత ఈజీగా తేలకపోతే ? ఒకరిపై ఒకరు ఆరోపణలు చేసుకుంటున్న కుటుంబ సభ్యుల మధ్య, అసలు నిజాన్ని బయటకు తీసేందుకు ఓ డిటెక్టివ్ రంగంలోకి దిగితే ? ఇలాంటి మైండ్ గేమ్స్, ఫ్యామిలీ సీక్రెట్స్, ఊహించని ట్విస్టులతో తెరకెక్కిన ఆల్ టైమ్ పాపులర్ మిస్టరీ థ్రిల్లర్ ‘Knives Out’. మరి హత్యకు గురైన వ్యక్తి ఎవరు ? అతన్ని చంపింది కుటుంబంలోనే ఉన్న వ్యక్తేనా ? డిటెక్టివ్ బెనాయిట్ బ్లాంక్ అసలు నిజాన్ని ఎలా బయట పెట్టాడు ? అనే వివరాలపై ఒక లుక్కేద్దాం పదండి.
ప్రముఖ క్రైమ్ నవలా రచయిత హార్లన్ త్రోంబే తన 85వ పుట్టినరోజును కుటుంబ సభ్యులతో కలిసి జరుపుకుంటాడు. ఆ రాత్రి అంతా సాధారణంగానే కనిపిస్తుంది. కానీ మరుసటి రోజు హార్లన్ తన ఎస్టేట్‌లో అనుమానాస్పద పరిస్థితుల్లో చనిపోయి కనిపిస్తాడు. మొదట ఇది ఆత్మహత్యలా కనిపించినా, కేసులోకి డిటెక్టివ్ బెనాయిట్ బ్లాంక్ ఎంట్రీ ఇవ్వడంతో అసలు ఆట మొదలవుతుంది.
హార్లన్ కుటుంబంలో ప్రతి ఒక్కరికీ అతనితో ఏదో ఒక సమస్య ఉంటుంది. ఆస్తి, కుటుంబ గొడవలు, వ్యక్తిగత రహస్యాలు, డబ్బు ఇలా ఒక్కొక్కరి వెనుక ఒక్కో కారణం దాగి ఉంటుంది. బ్లాంక్ ఒక్కొక్కరినీ ప్రశ్నిస్తూ వెళ్లే కొద్దీ, బయటికి ఎంతో సంతోషంగా కనిపించే కుటుంబం లోపల ఎంత గందరగోళంగా ఉందో బయట పడుతుంది. కానీ అసలు ట్విస్ట్ ఏంటంటే… పోలీసులు అనుకుంటున్నట్టుగా ఇది సాధారణ హత్య కేసు కాదు.
హార్లన్ మరణానికి ముందు జరిగిన ప్రతి చిన్న సంఘటనకు ఏదో ఒక లింక్ ఉంటుంది. ఎవరు నిజం చెబుతున్నారు ? ఎవరు అబద్ధం చెబుతున్నారు ? హార్లన్ చివరి రోజుల్లో ఏం జరిగింది ? అతని మరణం వెనుక ఉన్న అసలు ఉద్దేశం ఏంటి ? ఇలాఅ చివరి వరకు అనుమానాలను పెంచుతూ వెళ్లే ఈ కథలో అసలు హంతకుడు ఎవరో తెలుసుకోవడమే ప్రధాన థ్రిల్.
రియాన్ జాన్సన్ దర్శకత్వం వహించిన ఈ సినిమాలో డేనియల్ క్రేగ్, క్రిస్ ఎవాన్స్, అనా డి ఆర్మాస్, జామీ లీ కర్టిస్, టోనీ కొల్లెట్, మైఖేల్ షానన్, డాన్ జాన్సన్, క్రిస్టోఫర్ ప్లమ్మర్ తదితరులు నటించారు. సినిమా రన్‌టైమ్ సుమారు 2 గంటల 10 నిమిషాలు. 2019లో వచ్చిన ఈ సినిమా ప్రపంచవ్యాప్తంగా భారీ విజయాన్ని అందుకుని, సుమారు 312.9 మిలియన్ డాలర్ల గ్రాస్ వసూళ్లు సాధించింది. అంటే 2600 కోట్లు అన్నమాట. ప్రస్తుతం IMDbలో 7.9 రేటింగ్‌తో కొనసాగుతోంది. ప్రస్తుతం భారత్‌లో Amazon Prime Videoలో అందుబాటులో ఉంది. కానీ తెలుగు వెర్షన్ మాత్రం అందుబాటులో లేదు. మర్డర్ మిస్టరీ, డిటెక్టివ్ ఇన్వెస్టిగేషన్, ఫ్యామిలీ సీక్రెట్స్, ఊహించని ట్విస్టులు ఉన్న ఈ మూవీ ఇప్పటికీ తప్పకుండా చూడాల్సిన క్లాసిక్ మిస్టరీ థ్రిల్లర్.
Read Also: నామోషీగా భావిస్తే జీవితం నాశనమే… గ్రౌండ్‌లో చెమట కాదు రక్తం చిందేలా పోరాటం
Share
యాంకర్ గా స్రవంతి ఉంటే సినిమా హిట్టే.. డైరెక్టర్ ప్రశంశలు..సుమ క్రేజ్ తగ్గిందా?
1300 కోట్ల థ్రిల్లర్ తెలుగులో... కేక పుట్టిస్తున్న మైండ్ బ్లాక్ క్రైమ్ కామెడీ
