Supernatural Horror Thriller OTT : ఒక భయంకరమైన ప్రమాదం జరగబోతోందని ముందే తెలిసి, అందులో చనిపోవాల్సిన వారిని కాపాడితే ఎంతో అదృష్టంగా భావిస్తాము. కానీ అలా ప్రాణాలు దక్కించుకున్న వారి కుటుంబాలను మరణం తరతరాల పాటు వెంటాడితే… ప్రమాదం నుంచి బయటపడటం నిజంగా అదృష్టమా, లేక మరింత భయంకరమైన పరిణామాలకు ఆరంభమా… ఇలాంటి ఆలోచనను భయానక సంఘటనలతో చూపించే హారర్ చిత్రం ‘ఫైనల్‌ డెస్టినేషన్‌ బ్లడ్‌లైన్స్‌’ (Final Destination Bloodlines). మరి ఈ సినిమాను తెలుగులో ఎక్కడ చూడొచ్చు ? అసలు ఏ ఓటీటీలో స్ట్రీమింగ్ అవుతోంది ? అనే వివరాల్లోకి వెళ్తే…
1969లో ఐరిస్‌ క్యాంప్‌బెల్‌ అనే యువతికి భయంకరమైన భవిష్యత్తు ముందే తెలుస్తుంది. స్కైవ్యూ రెస్టారెంట్‌ లో జరగబోయే ఘోర ప్రమాదాన్ని ఆమె ముందుగానే గుర్తిస్తుంది. అంతేకాదు దానివల్ల ఆ ప్రమాదం నుంచి కొంత మందిని కాపాడాలనే ఉద్దేశంతో ముందే హెచ్చరిస్తుంది కూడా. ఆ హెచ్చరిక కారణంగా అక్కడ ఘోరంగా చావాల్సిన పలువురి ప్రాణాలు దక్కుతాయి. అయితే అక్కడ మరణం నుంచి తప్పించుకున్న ఆ వ్యక్తుల జీవితాలు అక్కడితో ముగిసిపోవు. చావు వెంటాడుతూనే ఉంటుంది.
దశాబ్దాల తర్వాత కథ షిఫ్ట్ అవుతుంది. స్టెఫానీ అనే కాలేజీ విద్యార్థినికి భయంకరమైన కలలు పదేపదే వస్తుంటాయి. ఆ కలలకు అర్థం తెలుసుకోవాలని ఆమె తన కుటుంబం దగ్గరకు తిరిగి వస్తుంది. అక్కడ తన బామ్మ ఐరిస్‌ గతంలో చూసిన భవిష్యత్తు, దాని వల్ల జరిగిన సంఘటనల గురించి తెలుసుకుంటుంది. అప్పట్లో ప్రమాదం నుంచి బయటపడిన వారి వారసులే ఇప్పుడు మృత్యువు లక్ష్యంగా మారారని ఆమెకు అర్థమవుతుంది.
ఇక్కడి నుంచి కథ మరింత భయానకంగా మారుతుంది. కుటుంబ సభ్యులు ఒక్కొక్కరుగా అనూహ్యమైన ప్రమాదాల్లో చిక్కుకుంటారు. సాధారణంగా కనిపించే వస్తువులు, చిన్న చిన్న సంఘటనలు కూడా ప్రాణాంతకంగా మారుతాయి. ప్రమాదం ఎలా జరుగుతుందో ముందే ఊహించడం కష్టమవుతుంది. స్టెఫానీ తన కుటుంబాన్ని కాపాడాలంటే గతంలో ఏం జరిగిందో పూర్తిగా తెలుసుకోవాల్సి వస్తుంది.
ఐరిస్‌ చూసిన భవిష్యత్తు వెనుక ఉన్న అసలు విషయం ఏమిటి ? మరణం నుంచి తప్పించుకున్న వారి వారసులనే ఎందుకు లక్ష్యంగా చేసుకుంటోంది ? ఈ ప్రమాదాల క్రమాన్ని ఆపడానికి ఏదైనా మార్గం ఉందా ? చివరికి ఆ అమ్మాయి బతికిందా లేదా ? అన్నది తెలియాలంటే సినిమాను చూడాల్సిందే. ఊహించని ప్రమాదాలు, భయంకరమైన మలుపులు, మరణాన్ని తప్పించుకునే ప్రయత్నాలతో ఈ చిత్రం అనుక్షణం ఉత్కంఠకు గురిచేస్తుంది.
Also Read : బాబోయ్… రోడ్డుపై రచ్చ ఇంత డేంజరా ? మలయాళ సైకలాజికల్ థ్రిల్లర్ స్ట్రీమింగ్ తెలుగులో
‘ఫైనల్‌ డెస్టినేషన్‌ బ్లడ్‌ లైన్స్‌’ భారతదేశంలో జియోహాట్‌స్టార్‌ (Jio Hotstar)లో స్ట్రీమింగ్‌కు అందుబాటులో ఉంది. ఆపిల్‌ టీవీ (Apple TV)లోనూ అద్దెకు దొరుకుతుంది. ఆపిల్‌ టీవీలో తెలుగు ఆడియో కూడా ఉంది. కానీ జియో హాట్‌స్టార్‌లో మాత్రం ఇంగ్షీషులోనే స్ట్రీమింగ్ అవుతోంది. కైట్లిన్‌ శాంటా జువానా (Kaitlyn Santa Juana), టియో బ్రియోన్స్‌ (Teo Briones), బ్రెక్‌ బాసింజర్‌ (Brec Bassinger), టోనీ టాడ్‌ (Tony Todd) తదితరులు ఇందులో మెయిన్ లీడ్స్ గా నటించగా, జాక్‌ లిపోవ్‌స్కీ (Zach Lipovsky), ఆడమ్‌ స్టెయిన్‌ (Adam Stein) దర్శకత్వం వహించారు. ప్రమాదాల వెనుక దాగి ఉన్న కారణాలను, ట్విస్టులను ఊహిస్తూ చూసే హారర్ అభిమానులకు ఇది బెస్ట్ మూవీ.
Share
హోటల్ స్టైల్ క్రిస్పీ ఇన్‌స్టంట్ రవ్వ దోశ.. 15 నిమిషాల్లో ఇలా తయారు చేసుకోండి!
తెలంగాణ సర్కార్ సంచలన నిర్ణయం.. మారనున్న ప్రభుత్వ పాఠశాలల రూపురేఖలు!
