Inspirational Military Drama OTT : యుద్ధంలో శత్రువులను ఎదురించి దేశం కోసం పోరాడిన ఓ సైనికుడు… విధి ఆడిన వింత నాటకంతో తన కాళ్లపై తాను నిలబడలేని పరిస్థితికి చేరుకుంటాడు. తుపాకీ పట్టిన చేతులతోనే మళ్లీ జీవితాన్ని గెలవాలని ప్రయత్నిస్తాడు. చావు అంచుల వరకు వెళ్లి వచ్చిన అతడికి, తనలోని నిరాశతో పోరాడటమే అసలైన యుద్ధంగా మారుతుంది. వీల్‌చైర్‌కే పరిమితం కావాల్సి వచ్చిన ఆ సైనికుడు… తన పట్టుదలతో అసాధ్యాన్ని సుసాధ్యం చేసుకునేందుకు చేసిన పోరాటమే ‘జీత్‌ కీ జిద్‌’ (Jeet Ki Zid). కన్నీళ్లు పెట్టించే భావోద్వేగాలతో పాటు, ఓడిపోయానని అనుకున్న చోటు నుంచే మళ్లీ ఎలా గెలవాలో చెప్పే ఈ సిరీస్‌ ఎక్కడ స్ట్రీమింగ్ అవుతుందో తెలుసుకుందాం.
మేజర్‌ దీప్‌ సింగ్‌ కు సైనిక జీవితమే ప్రపంచం. దేశం కోసం పోరాడాలనే లక్ష్యంతో సైన్యంలో చేరిన అతడు, క్రమశిక్షణతో పని చేస్తూ తనకంటూ ఓ గుర్తింపు తెచ్చుకుంటాడు. ఎలాంటి పరిస్థితి ఎదురైనా వెనక్కి తగ్గకూడదనేది అతడి నమ్మకం. కానీ యుద్ధభూమిలో ఎదురైన ఓ ప్రమాదం అతడి జీవితాన్నే తలకిందులు చేస్తుంది. తీవ్రంగా గాయపడిన దీప్‌ నడవలేని స్థితికి చేరుకుంటాడు. అప్పటి వరకు తన బలంగా భావించిన శరీరమే ఒక్కసారిగా సహకరించకపోవడంతో అతడి ప్రపంచం మారిపోతుంది.
యుద్ధంలో గాయపడటం ఒక బాధ అయితే, ఇకపై మునుపటిలా జీవించలేనేమోననే ఆలోచన అతడిని మరింత కుంగదీస్తుంది. తోటి సైనికులతో కలిసి పని చేసిన రోజులు, తన కాళ్లపై తాను నిలబడి బాధ్యతలు నిర్వర్తించిన క్షణాలు గుర్తుకొస్తుంటాయి. ఇప్పుడు చిన్న పనికి కూడా ఇతరుల సాయం అవసరమవడంతో దీప్‌ తనను తాను ప్రశ్నించుకోవడం మొదలుపెడతాడు. శత్రువుతో పోరాడినప్పుడు చూపించిన ధైర్యం, తనలోని నిరాశను ఎదుర్కొనే విషయంలో మాత్రం కనిపించదు.
దీప్‌ పరిస్థితిని దగ్గరగా చూస్తున్న అతడి భార్య జయ సింగ్‌ కు ఇది ఎంతటి కష్టకాలమో అర్థమవుతుంది. అయినా భర్తను జాలితో చూడటం కాకుండా, అతడిలో మళ్లీ బతకాలనే ఆశను రగిలించేందుకు ప్రయత్నిస్తుంది. అతడు తన మీద నమ్మకం కోల్పోయిన ప్రతిసారీ అండగా నిలుస్తుంది. దీప్‌ మళ్లీ సాధారణ జీవితం గడపాలంటే శరీరానికి చికిత్స ఒక్కటే సరిపోదు.. మనసులోని ఓటమి భావనను కూడా జయించాలని ఆమెకు తెలుసు. మరోవైపు, కల్నల్‌ రంజీత్‌ చౌధరి కూడా దీప్‌ జీవితంలో కీలకంగా మారతాడు.
అతడిలో ఇంకా మిగిలి ఉన్న పట్టుదలను గుర్తించి, తనను తాను తక్కువగా అంచనా వేసుకోవద్దని ప్రోత్సహిస్తాడు. అయితే, ఇతరులు ధైర్యం చెప్పడం ఒక ఎత్తయితే… తాను నిజంగా సాధించగలననే నమ్మకాన్ని తిరిగి పొందడం మరో ఎత్తు. ఈ రెండింటి మధ్య దీప్‌ చేసే పోరాటమే కథ. తిరిగి నిలబడాలనే ప్రయత్నంలో దీప్‌ ఎన్నో అడ్డంకులను ఎదుర్కొంటాడు. అయినా ఓటమిని అంగీకరించకుండా ముందడుగు వేయాలని నిర్ణయించుకుంటాడు. ఒకప్పుడు యుద్ధభూమిలో తన ధైర్యాన్ని నిరూపించుకున్న అతడు, ఇప్పుడు తన జీవితాన్నే మరో యుద్ధభూమిగా మార్చుకుంటాడు. ఆ పోరాటంలో అతడు ఎంతవరకు విజయం సాధించగలిగాడన్నదే సిరీస్‌లో చూడాల్సిన విషయం.
Also Read : అత్తింట్లోనే దెయ్యాల వేట… ఒక్కొక్కరినీ రాక్షసులుగా మార్చే దుష్టశక్తి… తెలుగులోనూ హారర్ మూవీ
‘జీత్‌ కీ జిద్‌’ (Jeet Ki Zid) జీ5 (ZEE5)లో అందుబాటులో ఉంది. 2021లో విడుదలైన ఈ సిరీస్‌ హిందీ భాషలో రూపొందింది. తెలుగు డబ్బింగ్‌ అందుబాటులో లేదు. అమిత్‌ సాధ్‌ (Amit Sadh), అమృతా పురి (Amrita Puri), సుశాంత్‌ సింగ్‌ (Sushant Singh) ప్రధాన పాత్రల్లో నటించారు. విశాల్‌ మంగళోర్కర్‌ (Vishal Mangalorkar) దర్శకత్వం వహించిన ఈ సిరీస్‌ మేజర్‌ దీపేంద్ర సింగ్‌ సెంగర్‌ జీవితం నుంచి స్ఫూర్తి పొందింది. కష్టాలు ఎదురైనప్పుడు జీవితం ముగిసిపోయిందని భావించకుండా, మళ్లీ మొదలు పెట్టే ధైర్యం ఎంత ముఖ్యమో చెప్పే స్ఫూర్తిదాయక కథ ఇది.
Share
రష్యా సైన్యంలో ఉక్రెయిన్‌ ఏజెంట్.. 300 మంది సైనికుల్ని లేపేసి.. దేశం దాటేసిన యువ అధికారి!
పిల్లల్లో డిప్రెషన్ ముప్పును తగ్గించే చిన్ననాటి అనుభవాలు ఇవే.. పేరెంట్స్ ఇవి తప్పక తెలుసుకోవాలి!
