Warning to iPhone Users: ప్రపంచవ్యాప్తంగా కోట్లమంది వినియోగించే ఐఫోన్, ఐప్యాడ్ భద్రతపై తీవ్రమైన ముప్పు ఉందని ఆపిల్ స్వయంగా హెచ్చరించింది. సఫారీ బ్రౌజర్కు ఆధారమైన వెబ్కిట్లో గుర్తించిన తీవ్రమైన లోపాలు, అత్యంత నైపుణ్యంతో రూపొందించిన సైబర్ దాడులకు దారి తీసే అవకాశం ఉందని ఆపిల్ వెల్లడించింది. ఈ లోపాల ద్వారా హ్యాకర్లు మీ అనుమతి లేకుండానే మీ ఫోన్ లేదా టాబ్లెట్పై నియంత్రణ సాధించే ప్రమాదం ఉందని భద్రతా నిపుణులు చెబుతున్నారు. అందుకే ఆపిల్ తాజా అప్డేట్లను వెంటనే ఇన్స్టాల్ చేయాలని స్పష్టంగా సూచించింది.
వెబ్కిట్ లోపాలు అంటే ఏమిటి
ఐఓఎస్ వ్యవస్థలోని అన్ని బ్రౌజర్లకు మూలంగా పనిచేసేది వెబ్కిట్. సఫారీ సహా ఇతర బ్రౌజర్లు ఇదే ఇంజిన్పై ఆధారపడతాయి. ఈ వెబ్కిట్లో రెండు కీలక లోపాలు బయటపడినట్లు ఆపిల్ తెలిపింది. ఇవి సాధారణ లోపాలు కావని, లక్ష్యంగా ఎంచుకున్న వ్యక్తులపై మాత్రమే అమలు చేసే అత్యంత క్లిష్టమైన దాడుల్లో వాడుతున్నట్లు వెల్లడించింది. ప్రమాదకర వెబ్సైట్లను తెరిచినప్పుడు, మీ డివైస్ హానికరమైన ఆదేశాలను అమలు చేసే పరిస్థితి ఏర్పడుతుంది.
జీరో-డే లోపాల ప్రమాదం అంటే ఏమిటి?
ఈ లోపాలను జీరో-డే భద్రతా లోపాలుగా గుర్తించారు. అంటే, సాఫ్ట్వేర్ తయారీదారులకు ముందుగా తెలియని లోపాలు కావడంతో, ప్యాచ్ విడుదలకుముందే హ్యాకర్లు వీటిని ఉపయోగించగలరు. ఆపిల్ భద్రతా బృందంతో పాటు గూగుల్ భద్రతా విశ్లేషణ బృందం (Google Threat Analysis Group) కూడా ఈ లోపాల గుర్తింపులో పాల్గొన్నట్లు సమాచారం. ఇవి సరిచేయకపోతే వ్యక్తిగత డేటా దొంగతనం, ఫోన్పై పూర్తిగా పట్టును కోల్పోయి, తీవ్రమైన సమస్యలు ఎదురయ్యే పరిస్థితి ఏర్పడే అవకాశం ఉంది.
ప్రమాదంలో ఫోన్లు, ట్యాబ్లు
ఈ భద్రతా లోపాల ప్రభావం ముఖ్యంగా ఐఫోన్ 11 నుంచి తర్వాత విడుదలైన అన్ని మోడళ్లపై ఉంటుందని ఆపిల్ తెలిపింది. అలాగే ఐప్యాడ్ ప్రో 12.9 అంగుళాల మూడో తరం నుంచి తర్వాతివి, ఐప్యాడ్ ప్రో 11 అంగుళాల మొదటి తరం నుంచి తర్వాతివి ప్రమాదంలో ఉన్నాయి. ఐప్యాడ్ ఎయిర్ మూడో తరం నుంచి, ఐప్యాడ్ ఎనిమిదో వెర్షన్ నుంచి, ఐప్యాడ్ మినీ ఐదో తరం నుంచి వచ్చిన మోడళ్లన్నీ ఈ జాబితాలో ఉన్నాయి. ఈ డివైస్లలో అప్డేట్ చేయకుండా వదిలేస్తే ముప్పు కొనసాగుతుందని నిపుణులు హెచ్చరిస్తున్నారు.
ఆపిల్ విడుదల చేసిన అప్డేట్లు
ఈ లోపాలను పరిష్కరించేందుకు ఆపిల్ వెంటనే కొత్త అప్డేట్లను విడుదల చేసింది. ఐఓఎస్ 26.2, ఐప్యాడ్ఓఎస్ 26.2తో పాటు, పాత వెర్షన్ల కోసం ఐఓఎస్ 18.7.3, ఐప్యాడ్ఓఎస్ 18.7.3ను కూడా అందుబాటులోకి తెచ్చింది. అలాగే మాక్ కంప్యూటర్ల కోసం మాకోఎస్ టాహో 26.2, టీవీలకు టీవీఓఎస్ 26.2, వాచ్లకు వాచ్ఓఎస్ 26.2, విజన్ ప్రో కోసం విజన్ఓఎస్ 26.2, సఫారీ 26.2ను విడుదల చేసింది. ఆటోమేటిక్ అప్డేట్లు ఆన్లో ఉన్నవారికి ఇవి ఇప్పటికే ఇన్స్టాల్ అయ్యి ఉండవచ్చు. మిగతావారు సెట్టింగ్స్లోకి వెళ్లి మాన్యువల్గా అప్డేట్ చేయాల్సిందే.
టెక్నికల్గా బయటపడిన భద్రతా లోపాలు
ఈ రెండు లోపాల్లో ఒకటి యూజ్-ఆఫ్టర్-ఫ్రీ బగ్గా గుర్తించారు. ఇది మెమరీ నిర్వహణకు సంబంధించిన సమస్య. తాత్కాలిక డేటాను సరిగ్గా నిర్వహించకపోవడం వల్ల ఈ లోపం ఏర్పడిందని ఆపిల్ తెలిపింది. దీన్ని సరిచేయడానికి మెమరీ మేనేజ్మెంట్ విధానాన్ని మరింత కట్టుదిట్టం చేశారు. ఈ లోపాన్ని సివిఈ-2025-43529గా నమోదు చేశారు. రెండో లోపం మెమరీ కరప్షన్ సమస్యగా గుర్తించారు. కఠినమైన చెక్లను అమలు చేయడం ద్వారా దీన్ని పరిష్కరించారు. దీనికి సివిఈ-2025-14174 అనే గుర్తింపు ఉంది.
ఆపిల్ భద్రతా విధానం
వినియోగదారుల భద్రత కోసమే దర్యాప్తు పూర్తయ్యే వరకు, ప్యాచ్లు విడుదలయ్యే వరకు భద్రతా లోపాలపై వివరాలు వెల్లడించమని ఆపిల్ స్పష్టం చేసింది. ఇది హ్యాకర్లు ముందుగానే సమాచారం దుర్వినియోగం చేయకుండా ఉండేందుకు తీసుకున్న జాగ్రత్తగా సంస్థ చెబుతోంది.
వినియోగదారులు ఎలా రక్షించుకోవాలి
సైబర్ భద్రతా నిపుణుడు కర్ట్ నట్సన్ (Kurt Knutsson) సూచనల ప్రకారం, అప్డేట్లను ఆలస్యం చేయకుండా వెంటనే ఇన్స్టాల్ చేయడమే మొదటి రక్షణ. జీరో-డే దాడులు ఎక్కువగా పాత సాఫ్ట్వేర్ వాడుతున్నవారినే లక్ష్యంగా చేసుకుంటాయి. ఆటోమేటిక్ అప్డేట్లను అన్ని ఆపిల్ డివైస్లలో ఆన్లో ఉంచితే, కొత్త ప్యాచ్ విడుదలైన వెంటనే ఇన్స్టాల్ అవుతుంది.
ప్రమాదకర లింక్ల నుంచి జాగ్రత్త
చాలా వెబ్కిట్ దాడులు ప్రమాదకర వెబ్సైట్ల ద్వారానే మొదలవుతాయి. ఎస్ఎంఎస్, వాట్సాప్, టెలిగ్రామ్, ఈమెయిల్ ద్వారా వచ్చే అనుకోని లింక్లను క్లిక్ చేయకుండా ఉండటం చాలా ముఖ్యం. లింక్పై అనుమానం వస్తే, నేరుగా బ్రౌజర్లో వెబ్సైట్ అడ్రస్ టైప్ చేసి తెరవడం సురక్షితమని నిపుణులు సూచిస్తున్నారు. మాల్వేర్ లేదా వ్యక్తిగత సమాచారం దొంగతనాన్ని నివారించేందుకు మంచి యాంటీవైరస్ సాఫ్ట్వేర్ వాడటం ఉపయోగకరం. ఇవి ఫిషింగ్ మెయిల్స్, ర్యాన్సమ్వేర్ గురించి ముందుగానే హెచ్చరిస్తాయి. లక్ష్యంగా చేసే దాడులు ఎక్కువగా వ్యక్తిగత సమాచారం ఆధారంగానే జరుగుతాయి కాబట్టి, సోషల్ మీడియా ప్రైవసీ సెట్టింగ్లను కట్టుదిట్టంగా మార్చుకోవడం అవసరం.
వ్యక్తిగత వివరాలను తొలగించే సేవలు
ఇంటర్నెట్లో మీ గురించి ఉన్న సమాచారం ఎంత తక్కువగా ఉంటే, హ్యాకర్లకు మిమ్మల్ని లక్ష్యంగా చేసుకోవడం అంత కష్టం. డేటా బ్రోకర్ సైట్ల నుంచి వ్యక్తిగత వివరాలను తొలగించే సేవలు ఖరీదైనవైనా, భద్రత విషయంలో ఆందోళన తగ్గించి, మనసుకు ధైర్యం కలిగిస్తుందని నిపుణులు చెబుతున్నారు. ఇవి వందల వెబ్సైట్లలో మీ సమాచారం ఉందో లేదో ఎప్పటికప్పుడు పరిశీలించి, తొలగించే ప్రయత్నం చేస్తాయి.
లైట్ తీసుకోవద్దు.. ఎందుకంటే?
ఐఫోన్, ఐప్యాడ్ భద్రత విషయంలో ఆపిల్ ఇచ్చిన ఈ హెచ్చరికను తేలికగా తీసుకోవద్దు. తాజా అప్డేట్లను వెంటనే ఇన్స్టాల్ చేయడం, అనుమానాస్పద లింక్లకు దూరంగా ఉండటం, వ్యక్తిగత సమాచారం పరిమితంగా ఉంచుకోవడం ద్వారా మాత్రమే ఈ తరహా అత్యాధునిక సైబర్ దాడుల నుంచి మనల్ని మనం రక్షించుకోవచ్చు. భద్రత అనేది ఒకసారి చేసే పని కాదు, నిరంతరం పాటించాల్సిన జాగ్రత్త.
Share
KCR : సారొచ్చారు వెళ్లారు.. కేసీఆర్ ఎత్తుకు రేవంత్ పై ఎత్తు!
Best Family Cars: మారుతి సుజుకి To కియా.. దేశీ మార్కెట్లో బెస్ట్ ఫ్యామిలీ కార్లు ఇవే!
