కాజీపేటలో నూతన రైల్వే డివిజన్ ఏర్పాటు.. కేంద్ర మంత్రికి కేటీఆర్ లేఖ

కాజీపేట కేంద్రంగా నూతన రైల్వే డివిజన్‌ను వెంటనే ఏర్పాటు చేయాలని కోరుతూ బీఆర్ఎస్ వర్కింగ్ ప్రెసిడెంట్ కేటీఆర్ కేంద్ర రైల్వే శాఖ మంత్రి అశ్విని వైష్ణవ్‌కు లేఖ రాశారు. పార్టీ ఎంపీల బృందం బుధవారం ఢిల్లీలో కేంద్ర మంత్రిని కలిసి ఈ లేఖను అందజేసింది. దక్షిణ మధ్య రైల్వేలో జరుగుతున్న అంతర్గత పునర్వ్యవస్థీకరణ ప్రక్రియతో పాటు దక్షిణ తీర రైల్వే కార్యకలాపాల ప్రారంభం వల్ల సికింద్రాబాద్ డివిజన్‌పై పనిభారం విపరీతంగా పెరిగిందని కేటీఆర్ తన లేఖలో ఆందోళన వ్యక్తం చేశారు.

ప్రస్తుత గణాంకాల ప్రకారం.. సికింద్రాబాద్ డివిజన్ పరిధి 2,755 ట్రాక్ కిలోమీటర్లుగా ఉందని ఆయన వివరించారు. రాబోయే కాలంలో వాడి-రాయచూర్ తో పాటు విష్ణుపురం-బీబీనగర్ డబ్లింగ్ పనులు పూర్తయితే ఈ పరిధి సుమారు 3,150 కిలోమీటర్లకు చేరుకుంటుందని పేర్కొన్నారు. భారతీయ రైల్వేల పరిపాలనా ప్రమాణాల ప్రకారం ఒక డివిజన్‌కు ఉండాల్సిన పరిమితి కంటే ఇది చాలా ఎక్కువని గుర్తుచేశారు. విజయవాడ అలాగే గుంతకల్ డివిజన్లు దాదాపు 2,200 ట్రాక్ కిలోమీటర్ల పరిధిని కలిగి ఉండగా గుంటూరు డివిజన్ కేవలం 900 కిలోమీటర్ల లోపే ఉందని తులనాత్మక విశ్లేషణను లేఖలో పొందుపరిచారు. ఈ భారీ అసమతుల్యత కారణంగా సికింద్రాబాద్ డివిజన్ నిర్వహణ అత్యంత సంక్లిష్టంగా మారిందని ఇది రైళ్ల రాకపోకల సాంద్రతపై తీవ్ర ప్రభావం చూపుతుందని హెచ్చరించారు.

పరిపాలనా సౌలభ్యం ఇంకా కార్యకలాపాల రీత్యా సేవలు మెరుగుపడాలంటే కాజీపేటను ప్రత్యేక డివిజన్‌గా ప్రకటించడం ఒక్కటే సరైన మార్గమని కేటీఆర్ స్పష్టం చేశారు. ప్రతిపాదిత కాజీపేట డివిజన్‌లో కాజీపేట-బల్లార్షా అలాగే పెద్దపల్లి-నిజామాబాద్ మార్గాలను చేర్చాలని చించారు. వీటితో పాటు కాజీపేట-ఎర్రుపాలెం ఇంకా డోర్నకల్-మనుగూరు అలాగే సత్తుసూపల్లి వంటి కీలక మార్గాలను చేర్చడం ద్వారా సుమారు 2,000 ట్రాక్ కిలోమీటర్ల నెట్‌వర్క్‌ను సమర్థవంతంగా నిర్వహించవచ్చని ప్రతిపాదించారు.

పెద్దపల్లి-నిజామాబాద్ సెక్షన్‌ను హైదరాబాద్ డివిజన్‌కు బదిలీ చేసే ప్రతిపాదనను కేంద్రం ఉపసంహరించుకోవాలని కేటీఆర్ డిమాండ్ చేశారు. భౌగోళిక సామీప్యతను పరిగణనలోకి తీసుకుని ఆ సెక్షన్‌ను కాజీపేట డివిజన్‌లోనే ఉంచాలని కోరారు. లాతూర్ రోడ్-పర్లీ వైజనాథ్ సెక్షన్‌ను నాందేడ్ డివిజన్‌కు మార్చే అంశాన్ని కూడా పునఃపరిశీలించాలని విన్నవించారు. తెలంగాణ రైల్వే అవసరాలను గుర్తించి కాజీపేట డివిజన్ ఏర్పాటుపై సానుకూల నిర్ణయం తీసుకోవాలని కోరారు.

ALSO READ: జాతీయ స్థాయిలో సత్తా చాటిన తెలంగాణ పంచాయతీలు.. ఆ గ్రామాలు ఇవే, మంత్రి సీతక్క హర్షం