Nashik Tour: నాసిక్ .. మహారాష్ట్రలోని ఒక ప్రసిద్ధ నగరం. ఇక్కడ ఆధ్యాత్మిక, చారిత్రక ,సహజ సౌందర్యం కలగలిపి ఉంటాయి. గోదావరి నది ఒడ్డున ఉన్న ఈ నగరం కుంభమేళా కేంద్రంగా ప్రపంచవ్యాప్తంగా గుర్తింపు పొందింది. అలాగే.. దీనిని “వైన్ కేపిటల్ ఆఫ్ ఇండియా” అని కూడా పిలుస్తారు. ఇన్ని ప్రత్యేకతలు ఉన్న నాసిక్‌లో కొన్ని రకాల ప్రదేశాలను తప్పకుండా చూడాలి. అవేంటో ఇప్పుడు తెలుసుకుందాం.
నాసిక్‌లో తప్పకుండా చూడాల్సిన ముఖ్య ప్రదేశాలు:
1. ఆధ్యాత్మిక, పురాణ ప్రదేశాలు:
నాసిక్ రామాయణంతో ముడిపడి ఉన్న గొప్ప పుణ్యక్షేత్రం. శ్రీ త్రయంబకేశ్వర జ్యోతిర్లింగం: నాసిక్‌కు 28 కి.మీ దూరంలో ఉన్న ఈ ఆలయం. శివుడి 12 జ్యోతిర్లింగాలలో ఒకటి. గోదావరి నది ఉద్భవించిన బ్రహ్మగిరి కొండలకు సమీపంలో ఇది ఉంది. దీని ప్రత్యేకమైన వాస్తుశిల్పం, పవిత్రత కారణంగా భక్తులు దీనిని తప్పక సందర్శిస్తారు.
పంచవటి, సీతా గుఫా: గోదావరి నది ఎడమ ఒడ్డున ఉన్న పంచవటి, శ్రీరాముడు, సీతాదేవి, లక్ష్మణుడు తమ వనవాసంలో కొంతకాలం గడిపిన ప్రదేశంగా ప్రసిద్ధి. ఇక్కడే సీతా గుహ ఉంది. ఇది రావణుడు సీతను అపహరించిన ప్రదేశమని భక్తుల నమ్మకం.
రామ్‌కుండ్: గోదావరి నది ఒడ్డున ఉన్న ఈ పవిత్ర స్నాన ఘట్టంలో శ్రీరాముడు స్నానం చేశాడని చెబుతారు. కుంభమేళా సమయంలో లక్షలాది మంది భక్తులు ఇక్కడ పవిత్ర స్నానం చేస్తారు.
కాలారామ్ దేవాలయం: నలుపు రాయితో నిర్మించిన ఈ పెద్ద ఆలయం శ్రీరాముడికి అంకితం చేయబడింది. ఇక్కడ రాముడు, సీత, లక్ష్మణ విగ్రహాలు కూడా నలుపు రంగులో ఉంటాయి.
2. సులా వైన్యార్డ్స్ – వైన్ కేంద్రం
ఆధునిక నాసిక్ అంటే వైన్ కేంద్రంగా దీనికి ప్రత్యేక గుర్తింపు ఉంది.
సులా వైన్యార్డ్స్ ఇండియాలోనే మొట్టమొదటి , అతిపెద్ద వైన్ తయారీ కేంద్రాలలో ఒకటి. ఇక్కడ మీరు ద్రాక్షతోటల పర్యటన , వైన్ తయారీ ప్రక్రియను చూడొచ్చు. అంతే కాకుండా వివిధ రకాల వైన్లను రుచి చూడవచ్చు. ప్రకృతి ప్రేమికులు అంతే కాకుండా కొత్త అనుభవాలను కోరుకునే వారికి ఇది అద్భుతమైన ప్రదేశం.
3. చారిత్రక గుహలు, కోటలు:
పాండవ్‌లేని గుహలు: నాసిక్ నగరం నుంచి సుమారు 8 కి.మీ దూరంలో ఉన్న ఈ 24 శిలాకృత్తి గుహలు క్రీ.శ. 1వ శతాబ్దం నుంచి 3వ శతాబ్దం మధ్య కాలానికి చెందిన పురాతన బౌద్ధ శిల్పకళను ప్రదర్శిస్తాయి. ఈ గుహలు హినయాన బౌద్ధమతానికి చెందినవి.
అంజనేరి కొండలు: త్రయంబకేశ్వర్ పర్వత శ్రేణిలో ఉన్న ఈ కొండ హనుమంతుని జన్మస్థలంగా నమ్ముతారు. ఇక్కడ ట్రెక్కింగ్, పైన ఉన్న ఆలయాన్ని సందర్శించడం ఒక ప్రసిద్ధ ఆకర్షణ.
Also Read: బెంగళూరు టూర్.. ఈ ప్రదేశాలు ఒక్కసారైనా చూడాల్సిందే !
4. ప్రకృతి, జలపాతాలు :
గంగాపూర్ ఆనకట్ట , బ్యాక్‌వాటర్స్ : గోదావరి నదిపై నిర్మించిన ఈ ఆనకట్ట చుట్టూ ఉన్న ప్రశాంతమైన బ్యాక్‌వాటర్స్ పిక్నిక్, ప్రశాంతమైన సాయంత్రం గడపడానికి అనువైనవి.
సోమేశ్వర్ జలపాతం : దీనిని స్థానికంగా దూద్‌సాగర్ జలపాతం అని కూడా అంటారు. వర్షాకాలంలో దీని అందం మరింత పెరుగుతుంది. చుట్టూ పచ్చని వాతావరణంలో జలపాతం ఉధృతంగా ప్రవహించడం చూడవచ్చు.
నాసిక్ సంస్కృతి, చరిత్ర, ఆధ్యాత్మికత, వైన్ రుచుల అద్భుతమైన కలయిక. ఇక్కడ ఒక్క రోజులో దేవాలయాలు, వైన్యార్డ్స్, చారిత్రక ప్రదేశాలను సందర్శించవచ్చు.
Share
Vivo V40 Pro 5G: ఫోన్‌ కాదు, మినీ కెమెరా స్టూడియో.. ట్రెండ్‌ మార్చిన వివో వి40 ప్రో 5జి పూర్తి వివరాలు
Actress Khushbu: హీరోయిన్ పై బాడీ షేమింగ్.. మీడియా పై కుష్బూ ఫైర్ .. విలువలు కోల్పోయారంటూ!
