Lenskart Controversy: ముంబైలోని లెన్స్‌కార్ట్ (Lenskart) స్టోర్‌లో బీజేపీ నేత నాజియా ఇలాహీ ఖాన్ సిబ్బందిని నిలదీస్తున్న వీడియో సామాజిక మాధ్యమాల్లో విపరీతమైన చర్చకు దారితీసింది. స్టోర్ ఉద్యోగులకు ఆమె స్వయంగా తిలకం దిద్ది, వారితో ‘జై శ్రీరామ్’ నినాదాలు చేయించడం ఆ వీడియోలో కనిపించింది. హిందూ సంప్రదాయ చిహ్నాలైన తిలకం, మంగళసూత్రం, బొట్టు వంటి వాటిపై లెన్స్‌కార్ట్ నిషేధం విధించిందన్న ఆరోపణల నేపథ్యంలో ఆమె ఈ నిరసన చేపట్టారు. పని ప్రదేశాల్లో సాంస్కృతిక, మతపరమైన హక్కులను గౌరవించాలంటూ ఆమె ఈ సందర్భంగా డిమాండ్ చేశారు.
ఈ వివాదం ముదిరిన తరుణంలో లెన్స్‌కార్ట్ సీఈఓ పీయూష్ బన్సల్ బహిరంగ క్షమాపణలు చెప్పారు. సంస్థ పాత స్టైల్ గైడ్ లో ఉన్న నిబంధనలు ప్రస్తుత విధానాలను ఉద్దేశించిన‌వి కావ‌ని ఆయన స్పష్టం చేశారు. ఆ పాత నిబంధనల ప్రకారం మతపరమైన చిహ్నాలపై ఉన్న పరిమితులను తొలగించామ‌న్నారు. ప్రస్తుతం బొట్టు, తిలకం, కలావా, హిజాబ్ వంటి అన్ని రకాల మతపరమైన వ్యక్తీకరణలను లెన్స్‌కార్ట్ అనుమతిస్తోందని ఆయన వివరణ ఇచ్చారు. అయితే, సీఈఓ వివరణ ఇచ్చిన తర్వాత కూడా నాజియా ఇలాహీ ఖాన్ వీడియో బయటకు రావడం, కార్పొరేట్ నిబంధనలు వర్సెస్ సాంస్కృతిక హక్కుల మధ్య ఉన్న వివాదాన్ని మరోసారి చర్చకు పెట్టింది.
ఈ వివాదానికి ప్రధాన కారణం లెన్స్‌కార్ట్ సంస్థ ఇంట‌ర్న‌ల్ గ్రోమింగ్ పాలసీ. గతంలో రూపొందించిన ఈ పాలసీలో ఉద్యోగులు విధుల్లో ఉన్నప్పుడు తలపై తిలకం, మణికట్టుకు కలావా (మతపరమైన దారం), లేదా పెద్ద బొట్టు వంటివి ధరించకూడదని నిబంధనలు ఉన్నాయి. ఉద్యోగులందరూ ఒకేవిధంగా, ప్రొఫెషనల్‌గా కనిపించాలనే ఉద్దేశంతో ఈ నిబంధనలు పెట్టారు. అయితే, అవి భారతీయ సంస్కృతిని, మత స్వేచ్ఛను హరిస్తున్నాయని విమర్శలు వెల్లువెత్తాయి. ఒక ఉద్యోగికి సంబంధించిన ఫోటోలు బయటకు రావడం, అందులో మతపరమైన చిహ్నాలపై ఆంక్షలు ఉండటంతో ఈ వివాదం రాజుకుంది.
ప్రస్తుతం సోషల్ మీడియాలో ఈ అంశంపై భిన్నాభిప్రాయాలు వ్యక్తమవుతున్నాయి. ఒక వర్గం కార్పొరేట్ సంస్థలు తమ ప్రొఫెషనల్ ఇమేజ్ కోసం ఇలాంటి నిబంధనలు పెట్టుకోవడంలో తప్పులేదని వాదిస్తుంటే, మెజారిటీ ప్రజలు మాత్రం ఒక వ్యక్తి తన మతపరమైన ఆచారాలను పాటించే హక్కును పని ప్రదేశాలు కాలరాయకూడదని అభిప్రాయపడుతున్నారు. లెన్స్‌కార్ట్ తన విధానాలను వెంటనే సవరించినప్పటికీ, ఈ ఘటన దేశవ్యాప్తంగా ఉన్న ఇతర కార్పొరేట్ సంస్థలకు ఒక పాఠంగా నిలిచింది.
BIG NEWS 🚨 BJP leader Nazia Elahi Khan reaches Lenskart store in Mumbai.
NAZIA : "Who is the head of the store here? Why you imposed ban on Mangalsutra, Tilak for employees?" 😳
She applied Tilak to Hindu staff and all chanted Jai Shri Ram. https://t.co/0XyBPeEU1Y pic.twitter.com/YnZIz0DbNn
— News Algebra (@NewsAlgebraIND) April 20, 2026
Share
వేసవిలో వడదెబ్బ ప్రభావం తెలిపే లక్షణాలు ఇవే.. ఈ జాగ్రత్తలు పాటించడం తప్పనిసరి
నమ్మినోల్లే నట్టేట ముంచే ఘోరమైన మోసం... మత్తులో ఉన్న అమ్మాయితో... చిన్న పిల్లలు చూడకూడని సినిమా
