Karthika Masam 2025: కార్తీక మాసం తొలి సోమవారం.. ఎలాంటి నియమాలు పాటించాలి ?

Karthika Masam 2025: కార్తీక మాసం హిందూ సంస్కృతిలో అత్యంత పవిత్రమైన మాసం. ఈ మాసంలో శివకేశవులను పూజించడం వల్ల విశేష ఫలితాలు లభిస్తాయని నమ్ముతారు. ముఖ్యంగా కార్తీక మాసంలో వచ్చే సోమవారాలు పరమశివుడికి అంకితం చేయబడినవి. తొలి సోమవారం రోజున భక్తులు భక్తిశ్రద్ధలతో కొన్ని నియమాలను పాటించడం ద్వారా శివుని అనుగ్రహాన్ని పొందుతారు.

కార్తీక పురాణం ప్రకారం.. కార్తీక సోమవారం వ్రతాన్ని ఆచరించే వారికి మోక్షం, సకల పాపాలు నశించడం, కైలాసవాసం లభిస్తాయి. కార్తీక సోమవారం రోజున పాటించాల్సిన ప్రధాన నియమాలు, పూజా విధానం గురించిన పూర్తి వివరాలను ఇప్పుడు తెలుసుకుందాం.

1. పవిత్ర స్నానం, శుచి:

కార్తీక సోమవారం రోజున సూర్యోదయానికి ముందే నిద్ర లేవాలి. ఈ సమయంలో నదీ స్నానం అత్యంత శుభప్రదంగా చెబుతారు. నదికి వెళ్లడం సాధ్యం కానివారు.. ఇంట్లోనే గోరు వెచ్చని నీటిలో కొద్దిగా గంగాజలం లేదా పసుపు కలుపుకొని స్నానం చేయవచ్చు. స్నానం తరువాత శుభ్రమైన, పొడి బట్టలు ధరించాలి.

2. దీపారాధన, దీపదానం:

కార్తీక మాసంలో దీపారాధన చాలా ప్రధానమైనది.

తులసి కోట వద్ద దీపం: ఇంటిలోని తులసి కోట దగ్గర ఆవు నెయ్యి లేదా నువ్వుల నూనెతో దీపం వెలిగించి, తులసి దేవిని పూజించాలి. ఇది విష్ణుమూర్తి అనుగ్రహాన్ని కలుగజేస్తుంది.

శివాలయంలో దీపం: దగ్గరలోని శివాలయానికి వెళ్లి ప్రదక్షిణ చేసి.. శివుడి ముందు దీపం వెలిగించాలి. గోధూళి (సంధ్యా) సమయంలో దీపం వెలిగించడం శివుడికి ప్రీతిపాత్రమైనది. ఉసిరికాయపై లేదా పిండితో చేసిన ప్రమిదలలో దీపాలు వెలిగించడం కూడా శుభకరం.

3. ఉపవాసం (వ్రతం) ఆచరించడం:

కార్తీక సోమవారం నాడు ఉపవాసం ఉండటం అత్యంత ముఖ్యమైన నియమం. ఈ వ్రతంలో ఆరు రకాలు ఉన్నాయి. వాటిలో శక్తిని బట్టి ఏదో ఒకదాన్ని పాటించవచ్చు.

ఉపవాసం (పూర్తి ఉపవాసం): పగలంతా అన్నం లేదా ఇతర ఆహార పదార్థాలు తీసుకోకుండా.. పాలు లేదా పండ్ల రసాలు మాత్రమే తాగుతూ ఉండాలి. నక్షత్ర దర్శనం అయిన తర్వాత.. శివుడికి నైవేద్యం పెట్టిన తర్వాత మాత్రమే భోజనం చేస్తారు.

ఏకభుక్తం: పగలంతా ఉపవాసం ఉండి.. ఒక పూట మాత్రమే (సాధారణంగా రాత్రి) భోజనం చేయడం.

నక్తం: పగలు భోజనం చేసి, రాత్రి నక్షత్ర దర్శనం అయిన తర్వాత కేవలం తీర్థం లేదా పాలు మాత్రమే స్వీకరించడం.

అయాచితం: ఇతరులు పిలవకుండా.. కోరకుండా ఎవరైనా ఆహారం ఇస్తే మాత్రమే స్వీకరించడం.

తిలా దానం: ఉపవాసం ఉండలేని వారు నల్ల నువ్వులను దానం చేయడం.

Also Read: కార్తీక మాసంలో నిత్య దీపారాధన ఎందుకు చేయాలి ?

4. శివారాధన, అభిషేకం:

సోమవారం రోజు శివుడిని పూజించడం చాలా మంచిది. శివాలయాన్ని దర్శించి.. పరమశివుడికి రుద్రాభిషేకం చేయించాలి. బిల్వ పత్రాలు, గంగాజలం, పాలతో శివాభిషేకం చేయడం వల్ల సకల దోషాలు తొలగిపోతాయి. ఓం నమః శివాయ మంత్రాన్ని వీలైనన్ని సార్లు జపించడం శుభకరం.

5. పురాణ పఠనం:

కార్తీక మాసం వైభవాన్ని వివరించే కార్తీక పురాణం లేదా శివ పురాణం వంటి గ్రంథాలలో ఒక అధ్యాయాన్ని పఠించడం లేదా శ్రద్ధగా వినడం చేయాలి.

ఈ నియమాలను తొలి సోమవారం నుంచి నెల రోజులు పాటించడం వల్ల అపారమైన దైవానుగ్రహం, ఆయురారోగ్యాలు, సుఖ సంతోషాలు లభిస్తాయి.

Share

• 
• 
• 
• 
• 
•