Siddu Jonnalagadda: టిల్లుకు, నాకు మధ్య ఉన్న తేడా అదే.. ?

Siddu Jonnalagadda: స్టార్ బాయ్ సిద్దు జొన్నలగడ్డ ప్రస్తుతం టిల్లు స్క్వేర్ సినిమాతో ప్రేక్షకుల ముందుకు రానున్నాడు. డీజే టిల్లు సినిమాతో సిద్దు బ్లాక్ బస్టర్ హిట్ అందుకొని స్టార్ బాయ్ గా మారాడు. ఇక దీనికి సీక్వెల్ గా తెరకెక్కిన చిత్రం టిల్లు స్క్వేర్. మల్లిక్ రామ్ దర్శకత్వంలో తెరకెక్కిన ఈ చిత్రాన్ని సూర్యదేవర నాగవంశీ నిర్మిస్తున్నాడు. ఇప్పటికే ఈ చిత్రం నుంచి రిలీజైన పోస్టర్స్, సాంగ్స్, ట్రైలర్ ప్రేక్షకులను విశేషంగా ఆకట్టుకున్నాయి. ఎన్నో అంచనాల నడుమ టిల్లు స్క్వేర్ రేపు అనగా మార్చి 29 న థియేటర్ లో రిలీజ్ కానుంది. ఇక రిలీజ్ డేట్ దగ్గరపడుతుండటంతో ప్రమోషన్స్ వేగాన్ని పెంచిన సిద్దు తాజాగా సినిమా గురించి ఒక ఇంటర్వ్యూలో చెప్పుకొచ్చాడు.

డీజే టిల్లు లాంటి భారీ విజయానికి సీక్వెల్ గా వస్తున్న సినిమా కదా.. ఏమైనా ఒత్తిడి ఉందా? అన్న ప్రశ్నకు సిద్దు మాట్లాడుతూ.. ” డీజే టిల్లు సమయంలో ప్రేక్షకుల్లో ఎలాంటి అంచనాల్లేవు. హీరో పాత్ర ఎలా ఉంటుంది అనేది ముందు ఎవరికి తెలీదు. అందుకే ఆ పాత్రను చూసి ప్రేక్షకులు సర్ ప్రైజ్ అయ్యారు. ఇప్పుడు అదే పాత్రతో మరోసారి మ్యాజిక్ చేయాల్సి రావడంతో కాస్త ఒత్తిడి ఉండటం సహజం. అయితే ఒత్తిడిని జయించి మెరుగైన అవుట్ పుట్ ని అందించడానికి కృషి చేశాం” అని చెప్పుకొచ్చాడు. ఇక సీక్వెల్ కి దర్శకుడు మారడంపై సిద్దు మాట్లాడుతూ.. ” సీక్వెల్ చేద్దాం అనుకున్న సమయంలో విమల్ వేరే ప్రాజెక్ట్ కమిట్ అయ్యి ఉండటంతో అందుబాటులో లేరు. మరోవైపు నేను, మల్లిక్ ఒక సినిమా చేద్దామని అప్పటికే అనుకుంటున్నాము. మా కలయికలో డీజే టిల్లు సీక్వెల్ చేస్తే బాగుంటుంది అనిపించి.. అలా మల్లిక్ న దర్శకుడిగా తీసుకోవడం జరిగిందని” చెప్పుకొచ్చాడు.

ఇక డీజే టిల్లు పాత్ర ఎలా పుట్టింది.. టిల్లుకు, మీకు దగ్గర పోలికలు ఉన్నాయా..? అన్న ప్రశ్నకు సిద్దు మాట్లాడుతూ.. ” టిల్లు పాత్ర నా ఆలోచనలు, నేను చూసిన అనుభవాల నుంచి పుట్టింది. టిల్లుకి, నాకు ఒక్కటే తేడా. టిల్లు తన మనసులో ఉన్నవన్నీ బయటకు అంటాడు. నేను మనసులో అనుకుంటాను అంతే తేడా” అని తెలిపాడు. మరి ఈ సినిమా సిద్ధుకు ఎలాంటి విజయాన్ని తీసుకొస్తుందో చూడాలి.