నేపాల్‌లో రగులుతున్న మరో జెన్-జీ ఉద్యమం.. ఏకంగా ప్రధాని రాజీనామా చేయాలని డిమాండ్.. ఎందుకంటే?

Nepal Protests: నేపాల్‌లో మరోమారు యువత (జెన్-జీ) ఉద్యమ బాట పట్టింది. దేశ రాజధాని ఖాట్మండు వీధులు నిరసనకారుల నినాదాలతో హోరెత్తుతున్నాయి. ఒక సాధారణ ట్రాఫిక్ చలాన్ వివాదం కాస్తా, ఒక యువకుడి ప్రాణాన్ని బలిగొనడమే కాకుండా.. ఇప్పుడు ఏకంగా దేశ ప్రధాని కుర్చీని కదిలించే స్థాయికి చేరింది. వ్యవస్థల వేధింపులకు నిరసనగా ఒక బైక్ రైడర్ ఆత్మహత్యకు పాల్పడటంతో నేపాల్ యువత వీధుల్లోకి వచ్చి తమ ఆగ్రహాన్ని వ్యక్తం చేస్తోంది.

అసలేం జరిగింది?
ఈ నెల 9వ తేదీన ఖాట్మండులోని పాస్‌పోర్ట్ కార్యాలయం వెలుపల ఓపెన్ ప్లేస్‌లో గణేష్ నేపాలి (25) అనే యువకుడు తన బైక్‌ను పార్క్ చేశాడు. నో-పార్కింగ్ జోన్ అంటూ ఖాట్మండు మెట్రోపాలిటన్ పోలీసులు అతని బైక్‌ను లాక్ చేసి, వెయ్యి నేపాలీ రూపాయల జరిమానా విధించారు. ఈ క్రమంలో పోలీసులకు, గణేష్‌కు మధ్య తీవ్ర వాగ్వాదం జరిగింది. సామాన్యులను లక్ష్యంగా చేసుకుని వేధిస్తున్నారనే మనస్తాపంతో, గణేష్ అందరూ చూస్తుండగానే తనపై పెట్రోల్ పోసుకుని నిప్పంటించుకున్నాడు. అక్కడే ఉన్న పోలీసులు వెంటనే స్పందించి, మంటలను ఆర్పి అతడిని ఆసుపత్రికి తరలించినప్పటికీ, చికిత్స పొందుతూ గణేష్ కన్నుమూశాడు.

సోషల్ మీడియాలో ‘ఆగ్రహ జ్వాల’.. రోడ్లపైకి జెన్-జీ
గణేష్ ఆత్మహత్యకు సంబంధించిన దృశ్యాలు, వార్తలు సోషల్ మీడియాలో దావానలంలా వ్యాపించాయి. దీంతో నేపాల్‌లోని జెన్-జీ ఒక్కసారిగా మేల్కొంది. కఠినమైన నిబంధనల పేరుతో సామాన్యుల పొట్ట కొడుతున్నారంటూ వేలాది మంది యువకులు ఖాట్మండు వీధుల్లోకి వచ్చి భారీ నిరసనలు చేపట్టారు. ఒకప్పుడు తమ సంపూర్ణ మద్దతుతో మేయర్‌గా గెలిపించుకున్న బాలెన్ షా నేతృత్వంలోని మెట్రోపాలిటన్ యంత్రాంగం, ఇప్పుడు అదే సామాన్య ప్రజలపై క్రూరంగా ప్రవర్తిస్తోందంటూ నిరసనకారులు తీవ్ర ఆరోపణలు చేస్తున్నారు.

ప్రధాని రాజీనామాకు డిమాండ్.. దిగొచ్చిన ప్రభుత్వం
ఈ నిరసనల తీవ్రత కేవలం మున్సిపల్ అధికారులపైనే కాకుండా ఏకంగా ప్రభుత్వంపైకి మళ్లింది. దేశంలో యువతకు ఉపాధి కల్పించడంలో, వారి సమస్యలను పరిష్కరించడంలో విఫలమయ్యారంటూ ప్రధాని వెంటనే తన పదవికి రాజీనామా చేయాలని ఉద్యమకారులు డిమాండ్ చేస్తున్నారు. పరిస్థితి చేయి దాటిపోతుండటంతో నేపాల్ ప్రభుత్వం దిద్దుబాటు చర్యలకు శ్రీకారం చుట్టింది. ఈ ఘటనపై సమగ్ర దర్యాప్తు జరిపేందుకు ఐదుగురు సభ్యులతో కూడిన ఒక ఉన్నత స్థాయి విచారణ కమిటీని ఏర్పాటు చేస్తూ కీలక నిర్ణయం తీసుకుంది.

పోలీసుల సస్పెన్షన్.. తదుపరి యాక్షన్ ప్లాన్
యువత ఆగ్రహాన్ని చల్లార్చేందుకు ప్రభుత్వం ప్రాథమిక చర్యగా.. గణేష్ ఆత్మహత్యకు కారణమైన, ఆ సమయంలో అక్కడే ఉన్న పోలీసు అధికారులను విచారణ పూర్తయ్యే వరకు సస్పెండ్ చేస్తున్నట్లు ప్రకటించింది. అయితే, కేవలం సస్పెన్షన్లతో సరిపెట్టబోమని, బాధ్యులపై క్రిమినల్ కేసులు నమోదు చేయాలని యువత పట్టుబడుతోంది. ఈ ఘోరానికి కారణమైన వ్యవస్థాగత లోపాలను సరిదిద్దే వరకు తమ పోరాటం ఆగేది లేదని జెన్-జీ ప్రతినిధులు స్పష్టం చేస్తుండటంతో నేపాల్‌లో ప్రస్తుతానికి ఉద్రిక్త పరిస్థితులు కొనసాగుతున్నాయి.

Also Read: యుద్ధ చరిత్రలోనే తొలిసారి.. ఇరాన్ నావికా స్థావరంపై అమెరికా సీ డ్రోన్ల ఊహించని మెరుపు దాడి

नेपाल में बड़ा जन-आक्रोश! 'Gen-Z' युवा अब नए प्रधानमंत्री बालेन शाह के ख़िलाफ़ सड़कों पर उतर आए हैं.

बिना किसी पुनर्वास योजना के गरीबों, झुग्गीवासियों और भूमिहीन लोगों को बेदखल करने के सरकार के फैसले का भारी विरोध हो रहा है. यह प्रदर्शन एक बड़े आंदोलन का रूप ले रहा है! pic.twitter.com/GStBiWZgpw

— Delhi Patrika (@PatrikaDelhi) July 13, 2026

Share

• 
• 
• 
• 
• 
•