రక్తంలో చక్కెర పెరగకుండా ఉండాలంటే ఆపిల్ తినాలా? పియర్ తినాలా?

Apples vs Pears: రక్తంలో చక్కెర పెరుగుతుందనే భయంతో పండ్లకు దూరంగా ఉండాల్సిన అవసరం లేదు. ముఖ్యంగా ఆపిల్, పియర్ వంటి పండ్లలో సహజ చక్కెరతో పాటు పీచు, నీరు, శరీరానికి మేలు చేసే మొక్కల పోషకాలు ఉంటాయి. అందుకే వీటిని సరైన మోతాదులో తీసుకుంటే రక్తంలో చక్కెర స్థాయిలను అదుపులో ఉంచుకునే ఆహారంలో భాగంగా చేసుకోవచ్చు.

ఆపిల్ చక్కెరగా ఎలా మారుతుంది?

ఆపిల్‌లో ఉండే పీచు జీర్ణక్రియను నెమ్మదించేలా చేస్తుంది. దీంతో చక్కెర ఒక్కసారిగా రక్తంలోకి చేరకుండా క్రమంగా విడుదలవుతుంది. ఆపిల్‌లోని సహజ మొక్కల పదార్థాలు కూడా శరీరం చక్కెరను ఎలా ఉపయోగించుకుంటుందో ప్రభావితం చేయవచ్చు. భోజనానికి ముందు ఆపిల్ తినడం వల్ల భోజనం తర్వాత చక్కెర ఒక్కసారిగా పెరగకుండా ఉండొచ్చని కొన్ని పరిశోధనలు చెబుతున్నాయి.

Also Read: ఉదయం ఫ్రెష్‌గా లేవాలంటే రాత్రి ఎప్పుడు పడుకోవాలి? నిపుణులు ఏం చెబుతున్నారు?

పియర్‌ ఎందుకు ప్రత్యేకం?

పియర్‌లో ఆపిల్ కంటే కొంచెం ఎక్కువ పీచు ఉంటుంది. ముఖ్యంగా తొక్కలో, తొక్కకు దగ్గరగా పీచు ఎక్కువగా ఉంటుంది. కాబట్టి.. బాగా కడిగి తొక్కతోనే తినడం మంచిది. పియర్‌లో నీరు, పీచు ఎక్కువగా ఉండటం వల్ల చక్కెర శరీరంలోకి నెమ్మదిగా చేరేందుకు సహాయపడుతుంది.

ఈ రెండింటిలో ఏది బెస్ట్?

రక్తంలో చక్కెర విషయానికి వస్తే ఆపిల్, పియర్ రెండూ దాదాపు సమానమే. రెండింటిలోనూ పీచు ఉంటుంది. చక్కెర నెమ్మదిగా శరీరంలోకి చేరుతుంది. పియర్‌లో పీచు కొద్దిగా ఎక్కువగా ఉండటం ఒక చిన్న ప్రయోజనం మాత్రమే. ఒకదానిని పూర్తిగా వదిలేసి మరొకదానినే ఎంచుకోవాల్సిన అవసరం లేదు.

పండ్లను ఇలా తింటేనే మేలు:

పండును రసం చేసుకుని తాగడం కంటే డైరెక్టుగా అలానే తినడం మంచిది. ఆపిల్ లేదా పియర్‌ను గింజలు, వేరుశెనగ వెన్న, ఉడికించిన గుడ్డు లేదా కాటేజ్ చీజ్ వంటి ప్రోటీన్, మంచి కొవ్వు ఉన్న ఆహారంతో కలిపి తీసుకుంటే కడుపు నిండిన భావన ఎక్కువసేపు ఉంటుంది. ముఖ్యంగా ఒకే పండుపై ఆధారపడకుండా ఆపిల్, పియర్‌తో పాటు ఇతర పండ్లను కూడా మారుస్తూ తినడం ఆరోగ్యానికి మరింత ఉపయోగకరం.

Also Read: ప్యాకేజ్డ్ ఫుడ్స్‌పై ఇక హెచ్చరిక లేబుల్స్.. కీలక ప్రతిపాదన చేసిన FSSAI!