Microplastics in Indian Milk| పాలు ఆరోగ్యానికి మంచివని చిన్నప్పటి నుంచే వింటూ పెరిగాం. కానీ ఇప్పుడు మన గ్లాసులోకి ప్లాస్టిక్ కణాలు కూడా వస్తున్నాయా? భారతదేశంలో నిర్వహించిన అధ్యయనాలు పాలలో మైక్రోప్లాస్టిక్స్ ఉన్నట్లు వెల్లడించాయి. ప్యాకేజింగ్ నుంచి పాల సేకరణ వరకు పలు దశల్లో ప్లాస్టిక్ కణాలు కలిసే అవకాశం ఉందని పరిశోధకులు చెబుతున్నారు. అయితే ఈ కారణంతో పాలు పూర్తిగా మానేయాల్సిన అవసరం ఉందా?
జర్నల్ ఆఫ్ ఫుడ్ కాంపోజిషన్ అండ్ అనాలిసిస్లో ప్రచురితమైన ఒక అధ్యయనం ప్రకారం.. భారతీయ ఆవు పాలలో మైక్రోప్లాస్టిక్స్ గుర్తింపబడ్డాయి. పరిశోధకులు ప్యాకెట్ పాలు, స్థానికంగా సేకరించిన పచ్చి పాలతో కలిపి తొమ్మిది నమూనాలను పరిశీలించారు. వాటిలో మొత్తం 66 ప్లాస్టిక్ కణాలను గుర్తించారు. ఒక లీటరు పాలలో మూడు నుంచి 30 కణాల వరకు ఉన్నట్లు పరిశోధనలో తేలింది.
ఈ కణాల్లో ఎక్కువ భాగం ఫైబర్లు లేదా చిన్న ప్లాస్టిక్ ముక్కలుగా ఉన్నాయి. పరీక్షల్లో పాలలో పాలిథిలీన్, పాలీప్రొపిలీన్ ప్రధాన ప్లాస్టిక్ రకాలుగా కనిపించాయి. ఈ ప్లాస్టిక్స్ను ఆహార ప్యాకేజింగ్తో పాటు అనేక రోజువారీ వస్తువుల్లో ఉపయోగిస్తారు.
మరో భారతీయ అధ్యయనం ఆరు ప్యాకెట్ పాల బ్రాండ్లను పరిశీలించింది. పరిశోధకులు వాటిని ఫార్మ్ నుంచి నేరుగా సేకరించిన పాలతో పోల్చారు. ఫామ్ పాలలో లీటరుకు సుమారు 17.8 మైక్రోప్లాస్టిక్ కణాలు కనిపించాయి. ప్యాకెట్ పాలలో ఈ సంఖ్య 37.8 నుంచి 71.1 కణాల వరకు నమోదైంది. కొన్ని ప్యాకెట్ పాల నమూనాల్లో ఫామ్ పాల కంటే దాదాపు నాలుగు రెట్లు ఎక్కువ కణాలు ఉన్నాయి. పాల ఉత్పత్తి సమయంలో కూడా ప్లాస్టిక్ కణాలు పాలలోకి చేరవచ్చని పరిశోధకులు తెలిపారు. పశువుల మేత సంచులు, పాల సేకరణ పరికరాలు, ఫిల్టర్లు దీనికి కారణాలు కావచ్చు. ప్యాకేజింగ్ సమయంలో కూడా అదనపు ప్లాస్టిక్ కణాలు పాలలోకి చేరే అవకాశం ఉంది.
మైక్రోప్లాస్టిక్స్ మన ఆరోగ్యంపై చూపే ప్రభావాలను శాస్త్రవేత్తలు ఇంకా పూర్తిగా అర్థం చేసుకోలేదు. పాలల్లో ప్లాస్టిక్ కణాలు కనిపించాయని మాత్రమే చెప్పడం వల్ల వ్యాధులు వస్తాయని నిర్ధారించలేం.
అయితే ల్యాబ్, జంతు అధ్యయనాల్లో కొన్ని ఆందోళనకర విషయాలు వెలుగులోకి వచ్చాయి. మైక్రోప్లాస్టిక్స్ వాపు, ఆక్సిడేటివ్ స్ట్రెస్, కణజాల నష్టంతో సంబంధం ఉండవచ్చని కొన్ని పరిశోధనలు సూచించాయి. శాస్త్రవేత్తలు జీర్ణ, శ్వాసకోశ, పునరుత్పత్తి వ్యవస్థలపై వాటి ప్రభావాలను కూడా పరిశీలిస్తున్నారు. అయితే మనుషుల్లో దీర్ఘకాలిక ప్రభావాలను నిర్ధారించడానికి మరిన్ని బలమైన ఆధారాలు అవసరం.
Also Read: బ్రేకప్ తర్వాత గుండెపై ప్రభావం? బ్రోకెన్ హార్ట్ సిండ్రోమ్ అంటే ఏంటి?
పరిశోధకులు.. మానవ రక్తం, కాలేయం, పెద్దపేగు, వీర్యం, తల్లి పాలలో కూడా మైక్రోప్లాస్టిక్స్ ఉన్నట్లు గుర్తించారు. అతి చిన్న నానోప్లాస్టిక్స్పై శాస్త్రవేత్తలు ప్రత్యేకంగా దృష్టి పెట్టారు. వాటి స్మూక్షంగా ఉండే సైజు కారణంగానే శరీరంలోని కొన్ని జీవ అవరోధాలను దాటి ప్రవేశిస్తున్నాయి. అయితే మైక్రోప్లాస్టిక్స్ వల్ల మనుషుల్లో నిర్దిష్ట వ్యాధులు వస్తాయని ఇప్పటివరకు నిర్ధారించలేదు.
ప్రస్తుతం మైక్రోప్లాస్టిక్స్ భయంతో పూర్తిగా పాలు మానేయాలని ఆధారాలు సూచించడం లేదు. పాలు ప్రోటీన్, కాల్షియం వంటి ముఖ్యమైన పోషకాలను అందిస్తాయి. అయితే పాల ఉత్పత్తి నుంచి ప్యాకేజింగ్ వరకు ప్లాస్టిక్ సంబంధాన్ని తగ్గించడం అవసరం. వినియోగదారులు కూడా సాధ్యమైనంత వరకు ఆహారం, డ్రింక్స్ పదార్థాల విషయంలో ప్లాస్టిక్ వినియోగాన్ని తగ్గించాలి. ముఖ్యంగా వేడి పదార్థాలను ప్లాస్టిక్ పాత్రల్లో ఎక్కువసేపు ఉంచకుండా జాగ్రత్తపడవచ్చు. మైక్రోప్లాస్టిక్స్పై పరిశోధన ఇంకా కొనసాగుతోంది. అందువల్ల ప్రస్తుతం భయపడటం కంటే, అనవసరమైన ప్లాస్టిక్ పరిచయాన్ని తగ్గించడం మరింత ఆచరణాత్మకమైన మార్గం.
Also Read: సినిమాల్లో బోల్డ్ సీన్లు ఎలా షూట్ చేస్తారు? కెమెరా వెనుక జరిగేది ఇదే
Share
మీ ఫోన్ పోగొట్టుకున్నారా.. వెంటనే ఇలా చేయండి.. సీక్రెట్స్ చెప్పిన సైబరాబాద్ సీపీ?
జాన్వీ, ఖుషీలకు నోటీసులు.. శ్రీదేవి ఆస్తి వివాదంలో సుప్రీం కీలక ఆదేశం
