Ricky Ponting : రికీ పాంటింగ్‌కు గుండె నొప్పి.. ఆస్పత్రిలో చేరిక..

Ricky Ponting : ఆస్ట్రేలియా క్రికెట్ మాజీ కెప్టెన్ రికీ పాంటింగ్‌ అస్వస్థతకు గురయ్యాడు.పెర్త్‌ వేదికగా ఆస్ట్రేలియా, వెస్టిండీస్‌ మధ్య జరుగుతున్న టెస్టు మ్యాచ్‌కు కామెంట్రీ చేస్తుండగా పాంటింగ్ ఇబ్బంది పడ్డాడు. దీంతో ఆసుపత్రిలో చేరినట్లు ఆస్ట్రేలియా మీడియాలో వార్తలు వచ్చాయి. పాంటింగ్‌కు ఛాతిలో నొప్పి రావడంతో ఆసుపత్రికి తీసుకెళ్లినట్లు తెలుస్తోంది.

ఆస్ట్రేలియా, వెస్టిండీస్‌ మధ్య జరుగుతున్న టెస్టు మ్యాచ్‌ మూడో రోజు ఆటకు ఛానెల్‌ 7 తరఫున పాంటింగ్‌ కామెంటటేర్‌గా ఉన్నాడు. ఈ మ్యాచ్‌కు 40 నిమిషాలపాటు వ్యాఖ్యాతగా వ్యవహరించాడు. లంచ్‌ విరామం సమయంలో కామెంట్రీ బాక్స్‌ నుంచి పాంటింగ్ బయటకు వెళ్లాడని ఆస్ట్రేలియా మీడియా కథనాలు వెల్లడించింది. పాంటింగ్‌ వెంట ఆస్ట్రేలియా మాజీ కోచ్‌ జస్టిన్‌ లాంగర్‌ వెళ్లాడు. ఛాతిలో నొప్పిరావడంతో ముందుజాగ్రత్త చర్యగా ఆసుప్రతిలో చేరినట్లు ఆస్ట్రేలియా మీడియా వెల్లడించింది.

1999 నుంచి 2007 వరకు వరసగా 3 ప్రపంచకప్‌లు సాధించిన ఆస్ట్రేలియా జట్టులో పాంటింగ్‌ సభ్యుడిగా ఉన్నాడు. అతని నాయకత్వంలోనే 2003, 2007 వన్డే ప్రపంచ కప్ లను ఆస్ట్రేలియా సాధించింది. 2006, 2009లో పాంటింగ్‌ నేతృత్వంలో ఆసీస్‌ వరుసగా రెండుసార్లు ఛాంపియన్‌ ట్రోఫీ సాధించింది. ప్రస్తుతం 47 ఏళ్ల పాంటింగ్ ఐపీఎల్ లో ఢిల్లీ జట్టుకు హెడ్‌ కోచ్‌గా వ్యవహరిస్తున్నాడు.