Bhogapuram Airport: భోగాపురం ఎయిర్పోర్ట్ చుట్టూ ఇప్పుడు ఏపీ రాజకీయాల్లో హాట్ డిబేట్ నడుస్తోంది. సిటీ సెంటర్ నుంచి అక్కడికి వెళ్లాలంటే గంటకు పైగా పడుతుందని, ప్రయాణికులకు ఇది పెద్ద సమస్యే అని విపక్షాలు రాద్ధాంతం చేస్తున్నాయి. నగరానికి ఇంత దూరంలో విమానాశ్రయం ఉంటే ఏం లాభమంటూ.. ప్రశ్నల వర్షం కురిపిస్తున్నాయి. కానీ, కాస్త వెనక్కి తిరిగి చూసుకుంటే.. అసలు దేశంలో ఏ మెట్రో సిటీ ఎయిర్పోర్ట్ సిటీ మధ్యలో ఉంది? అన్ని ప్రధాన నగరాల్లోనూ పరిస్థితి ఇలాగే ఉందనేది వాస్తవం. భోగాపురం ఒక్కటే కాదు.. దేశంలోని ప్రతి ఇంటర్నేషనల్ ఎయిర్పోర్ట్ నగరానికి దూరంగానే ఉంది. మరి మిగతా పెద్ద నగరాల సంగతేంటో ఒకసారి చూద్దాం.
సౌత్ ఇండియాలో టెక్ హబ్గా పరుగులు పెడుతున్న సిలికాన్ వ్యాలీ బెంగళూరుకు వెళ్లే వాళ్లకు కెంపేగౌడ ఎయిర్పోర్ట్ దూరం కొత్తేం కాదు. దేవనహళ్లి ప్రాంతంలో ఉన్న ఈ విమానాశ్రయం.. మెజిస్టిక్ లేదా ఎంజీ రోడ్డు వంటి సిటీ సెంటర్ నుంచి ఏకంగా 35 – 40 కి.మీ. దూరంలో ఉంటుంది. రోడ్డు మార్గంలో బండి మీద వెళ్తే.. సాధారణ ట్రాఫిక్లోనే కనీసం గంటన్నర నుంచి రెండు గంటలు పడుతుంది. ఇక పీక్ అవర్స్లో అయితే ఆ ప్రయాణం నరకాన్ని తలపిస్తుంది. అయినా సరే, బెంగళూరు జనం ఈ దూరానికి ఎప్పుడో అలవాటు పడిపోయారు.
నైజాం నగరంలో విమానం ఎక్కాలంటే ముందుగా శంషాబాద్ ప్రయాణం తలచుకోవాల్సిందే. అబిడ్స్ లేదా బంజారా హిల్స్ లాంటి సిటీ సెంటర్ నుంచి ఇక్కడికి దాదాపు 30 – 35 కి.మీ. దూరం ఉంటుంది. మధ్యలో పీవీఆర్ ఎక్స్ప్రెస్వే ఉన్నప్పటికీ.. సిటీ ట్రాఫిక్ దాటుకుని ఎయిర్పోర్టుకు చేరడానికి ముప్పావు గంట నుంచి గంటన్నర వరకు పడుతుంది. విమానం టైమ్కి అందుకోవాలంటే ప్రయాణికులు కాస్త ముందుగానే ఇంటి నుంచి కదలాల్సి వస్తుంది.
Also Read: వైట్ వెనిగర్, డిష్వాష్ లిక్విడ్ కలిపి వాడితే.. అద్భుతమైన ఫలితాలు చూస్తారు!
దేశ రాజధాని అనగానే ఇందిరా గాంధీ ఇంటర్నేషనల్ ఎయిర్పోర్ట్ గుర్తొస్తుంది. అది కాస్త సిటీకి దగ్గరగా ఉన్నా, ఇటీవలే తెరపైకి వస్తున్న నోయిడా జెవర్ ఇంటర్నేషనల్ ఎయిర్పోర్ట్ మాత్రం నగరానికి ఏకంగా 60 – 70 కి.మీ. దూరంలో ఉంది. ఢిల్లీ నుంచి ఆ కొత్త ఎయిర్పోర్టును చేరుకోవాలంటేనే గంటన్నర నుంచి రెండు గంటల సమయం పడుతుంది. రాబోయే కాలపు రద్దీని తట్టుకునేందుకే మెగా సిటీలన్నీ ఇలాంటి దూర ప్రాంతాలకే గ్రీన్ సిగ్నల్ ఇస్తున్నాయి.
ముంబైలో ఎయిర్పోర్ట్ నగరం మధ్యలో ఉన్నా సరే.. అక్కడి విపరీతమైన ట్రాఫిక్ కారణంగా ఛత్రపతి శివాజీ ఎయిర్పోర్ట్కు చేరడానికి కొన్ని ప్రాంతాల నుంచి గంటకు పైగా పడుతుంది. ఇక కేరళలోని కొచ్చిన్ ఇంటర్నేషనల్ ఎయిర్పోర్ట్ కూడా సిటీ సెంటర్ నుంచి 30 కి.మీ. దూరంలో ఉండగా.. ప్రయాణ సమయం గంట దాటుతుంది. ఉత్తర గోవాలో కొత్తగా వచ్చిన మోపా ఎయిర్పోర్ట్ పరిస్థితి కూడా సరిగ్గా అలాగే ఉంది.
ప్రపంచవ్యాప్తంగా లేదా మన దేశంలోని ఇతర పెద్ద నగరాలను గమనిస్తే.. గ్రీన్ ఫీల్డ్ ఎయిర్పోర్టులను సిటీ విస్తరణను దృష్టిలో ఉంచుకునే దూరంగా కడుతున్నారు. ఒకవేళ నగరంలోనే ఉంటే రద్దీ పెరిగి విమానాల రాకపోకలకు, రన్వేల విస్తరణకు జాగా దొరకదు. భోగాపురం విషయంలోనూ అదే సూత్రం వర్తిస్తుంది. సిటీ నుంచి గంట టైం పడుతుందనేది నిజమే అయినా.. భవిష్యత్తులో ఉత్తరాంధ్ర పారిశ్రామిక, పర్యాటక రంగాల అభివృద్ధికి ఇది ఎంతగానో ఉపయోగపడుతుంది. కాలం మారుతున్న కొద్దీ నగరాలు పెరుగుతాయి, దాంతో ఈ దూరాలు కూడా అందరికీ అలవాటైపోతాయి.
Also Read: వాట్సప్లో ఫొటోలు, వీడియోలు ఆటోమేటిక్గా డౌన్లోడ్ కాకుండా ఎలా ఆపాలి?
Share
పాకిస్తాన్ బౌలర్ ను మెచ్చుకున్న రవిశాస్త్రి...అతన్ని ఎదుర్కొవడం ఎవరి వల్లే కాదంటూ
కుస్తీ తక్కువ.. వినోదం ఎక్కువ!
