సెల్ఫీ ఆరాటం.. బారికేడ్లు బద్దలు.. భీమవరంలో జగన్‌కు తప్పిన పెద్ద ప్రమాదం!

YS Jagan: భీమవరం వేదికగా వైసీపీ అభిమానుల గుండెల్లో ఒక్కసారిగా ఆందోళన రేపిన సంఘటన ఇది. ఆక్వా రైతులతో ముఖాముఖి మాట్లాడటానికి వేదికపైకి వచ్చిన పార్టీ అధినేత వైఎస్ జగన్‌ను చూడగానే అక్కడ ఉన్న జనం ఒక్కసారిగా ఉద్వేగానికి లోనయ్యారు. తమ ప్రియతమ నేతను ఎలాగైనా దగ్గరగా చూడాలని, ఒక్క సెల్ఫీ దిగాలని, కనీసం ఒక్కసారైనా షేక్ హ్యాండ్ ఇవ్వాలనే ఆరాటంతో అభిమానులు బారికేడ్లను సైతం లెక్కచేయకుండా దూసుకువచ్చారు.

అయితే, ఆ అమితమైన అభిమానమే అక్కడ ఊహించని ప్రమాదకర పరిస్థితికి దారితీసింది. వేలాదిగా తరలివచ్చిన ఫ్యాన్స్ ఒక్కసారిగా వేదికపైకి ఎగబడటంతో అక్కడ పరిస్థితి పూర్తిగా అదుపు తప్పింది. ఆ తోపులాటలో కొందరు జగన్ కాలు పట్టుకుని లాగగా, వెనుక ఉన్న జనం ముందుకు తోశారు. దీంతో ఒక్కసారిగా బ్యాలెన్స్ కోల్పోయిన వైఎస్ జగన్ వేదికపైనే కిందపడిపోయారు.

ఆయన కిందపడుతున్న క్షణంలో అక్కడే ఉన్న భద్రతా సిబ్బంది అత్యంత అప్రమత్తంగా వ్యవహరించారు. క్షణాల వ్యవధిలో ఆయన్ని పట్టుకుని పైకి లేపారు. ఒక్కసారిగా జరిగిన ఈ సంఘటనతో అక్కడ ఉన్నవారంతా షాక్‌కు గురయ్యారు. అయితే, లక్కీగా ఆయనకు ఎలాంటి గాయాలు కాకపోవడంతో వైసీపీ శ్రేణులు, అభిమానులు ఊపిరిపీల్చుకున్నారు. అభిమానం ఉండటం మంచిదే అయినా, అది ఇలాంటి ప్రమాదకర పరిస్థితులకు దారితీయకుండా చూసుకోవాల్సిన అవసరం ఉందని ఈ ఘటన మరోసారి గుర్తుచేసింది.