Crime News: జగిత్యాల జిల్లాలో అనుమానాస్పద స్థితిలో పదేళ్ల బాలుడు మృతి.. ప్రమాదమా? హత్యనా?

Crime News: జగిత్యాల జిల్లా సారంగాపూర్ మండలం రేచపల్లి గ్రామంలో విషాదకర ఘటన చోటుచేసుకుంది. హోలీ పండుగ పూట ఒక చిన్నారి అదృశ్యం కావడం, చివరకు ఆ బాలుడు శవమై కనిపించడం యావత్ జిల్లాను దిగ్భ్రాంతికి గురిచేసింది. అయితే, గ్రామానికి చెందిన చిన్నోజి రమేష్, జ్యోత్స్న దంపతుల రెండో కుమారుడైన పవన్ తేజ (10), ఈ నెల 3వ తేదీన స్నేహితులతో కలిసి రంగులు ఆడుకుంటానని ఉత్సాహంగా ఇంటి నుంచి బయటకు వెళ్లాడు. అయితే, సాయంత్రమైనా బాలుడు తిరిగి రాకపోవడంతో ఆందోళన చెందిన తల్లిదండ్రులు చుట్టుపక్కల వెతికి, ఫలితం లేకపోవడంతో స్థానిక పోలీస్ స్టేషన్‌లో ఫిర్యాదు చేశారు.

పోలీసులు మిస్సింగ్ కేసు నమోదు చేసి గాలింపు చర్యలు చేపట్టినప్పటికీ, మూడు రోజుల తర్వాత గ్రామ శివారులోని అటవీ ప్రాంతంలో ఉన్న ఒక నీటి మడుగులో పవన్ తేజ మృతదేహం తేలియాడుతూ కనిపించింది. బాలుడు వెళ్లిన సైకిల్ కూడా అదే ప్రాంతంలో లభ్యం కావడంతో తనిఖీలు ముమ్మరం చేశారు. అల్లారుముద్దుగా పెంచుకున్న కొడుకు ఇలా విగతజీవిగా మారడంతో తల్లిదండ్రుల రోదనలు మిన్నంటాయి. పండుగ పూట బయటకు వెళ్లిన బిడ్డ విగతజీవిగా తిరిగిరావడాన్ని గ్రామస్థులు జీర్ణించుకోలేకపోతున్నారు.

ఈ మరణం వెనుక అనేక అనుమానాలు వ్యక్తమవుతున్నాయి. బాలుడు ఆడుకుంటూ ప్రమాదవశాత్తు నీటి మడుగులో పడి మరణించాడా? లేక ఎవరైనా దుండగులు బాలుడిని అపహరించి, హత్య చేసి మృతదేహాన్ని అక్కడ పడేశారా? అనే కోణంలో పోలీసులు విచారణ జరుపుతున్నారు. మృతదేహం లభ్యమైన తీరు, సంఘటనా స్థలంలో ఉన్న పరిస్థితులు పలు సందేహాలకు తావిస్తున్నాయి. బాలుడికి ఈత వచ్చా లేదా అనే అంశంపై కూడా పోలీసులు ఆరా తీస్తున్నారు.

జగిత్యాల రూరల్ సీఐ కరుణాకర్ సంఘటనా స్థలాన్ని సందర్శించి, క్లూస్ టీమ్ సహాయంతో ఆధారాలు సేకరించారు. మృతదేహాన్ని పోస్టుమార్టం నిమిత్తం ఆసుపత్రికి తరలించారు. ప్రాథమిక సమాచారం ప్రకారం ఇది ప్రమాదమా లేక కుట్రనా అనే విషయాన్ని నిర్ధారించడానికి పోస్టుమార్టం నివేదిక అత్యంత కీలకం కానుంది. పోలీసులు స్థానికులను, బాలుడి స్నేహితులను విచారిస్తూ కేసును అన్ని కోణాల్లో దర్యాప్తు చేస్తున్నారు.

Also Read: గుంటూరు జిల్లాలో దారుణం.. ఆస్తి రాసివ్వలేదని తల్లిని బయటకు తోసేసి..

తమ బిడ్డ మరణానికి గల వాస్తవ కారణాలను వెలికితీసి, ఒకవేళ ఎవరైనా అన్యాయం చేసి ఉంటే వారికి కఠిన శిక్ష పడేలా చేయాలని పవన్ తేజ కుటుంబ సభ్యులు కన్నీరుమున్నీరుగా కోరుతున్నారు. చిన్నారి మృతికి సంబంధించిన పూర్తి వివరాలు పోలీసుల తుది విచారణలో తేలాల్సి ఉంది.