ఆలయాలకే రక్షణ కరువైందా? అల్లూరి జిల్లాలోని పాడేరు దుర్గాదేవి ఆలయంలో భారీ చోరీ

Gold Theft: అల్లూరి సీతారామరాజు జిల్లాలో చోటుచేసుకున్న ఒక ఘటన స్థానికంగా తీవ్ర కలకలం రేపింది. పాడేరులోని ప్రసిద్ధ దుర్గాదేవి ఆలయంలో దుండగులు బీభత్సం సృష్టించారు. ఎవరికీ అనుమానం రాకుండా రాత్రి వేళల్లో రెక్కీ నిర్వహించి, ఆలయ భద్రతను సైతం ఛేదించి ఈ ఘాతుకానికి ఒడిగట్టారు. అమ్మవారి గర్భాలయంలోకి చొరబడి సుమారు 8 లక్షల రూపాయల విలువైన బంగారు, వెండి ఆభరణాలను అపహరించుకుపోయారు. ఈ ఘటనతో స్థానిక భక్తులు, ప్రజలు తీవ్ర దిగ్భ్రాంతికి గురయ్యారు.

అర్ధరాత్రి తలుపులు పగులగొట్టి..
ఆలయానికి సంబంధించిన ప్రధాన ద్వారం తాళాలను, తలుపులను బలవంతంగా పగులగొట్టి దొంగలు లోపలికి ప్రవేశించారు. గర్భగుడిలోకి వెళ్లిన దుండగులు, అమ్మవారికి భక్తులు భక్తిశ్రద్ధలతో సమర్పించుకున్న విలువైన ఆభరణాలనే టార్గెట్ చేశారు. సుమారు రూ. 8 లక్షల విలువైన వెండి, బంగారు నగలను దోచుకెళ్లారు. ఉదయం నిత్యపూజల కోసం ఆలయానికి చేరుకున్న అర్చకులు, తలుపులు విరిగిపోయి ఉండటాన్ని చూసి షాక్ అయ్యారు. వెంటనే ఆలయ కమిటీ సభ్యులకు, స్థానికులకు ఈ విషయాన్ని చేరవేయడంతో ఈ వార్త క్షణాల్లో పాడేరు అంతా వ్యాపించింది.

రంగంలోకి దిగిన పోలీసులు.. దర్యాప్తు ముమ్మరం
చోరీ సమాచారం అందుకున్న వెంటనే పాడేరు పోలీసులు హుటాహుటిన సంఘటనా స్థలానికి చేరుకున్నారు. క్లూస్ టీమ్, డాగ్ స్క్వాడ్‌ను రంగంలోకి దించి ఆధారాలు సేకరించే ప్రయత్నం చేస్తున్నారు. ఆలయం చుట్టుపక్కల ఉన్న సీసీటీవీ కెమెరాల ఫుటేజీలను పరిశీలిస్తున్నారు. నిందితులు ఏ దిశగా వచ్చారు, ఎటు వెళ్లారనే కోణంలో ప్రత్యేక బృందాలతో గాలింపు చర్యలు ముమ్మరం చేశారు. దొంగలను వీలైనంత త్వరగా పట్టుకుని, దొంగిలించిన సొమ్మును రికవరీ చేస్తామని పోలీసులు హామీ ఇచ్చారు.

Also Read: నాచారంలో దారుణం.. హోటల్ భోజనంలో పురుగులు.. నిలదీస్తే దిక్కున్న చోట చెప్పుకో అంటూ బెదిరింపులు

ఆలయాల భద్రతపై ప్రశ్నార్థకాలు
ఈ ఘటన స్థానికంగా ఆలయాల భద్రతపై తీవ్రమైన సందేహాలను లేవనెత్తుతోంది. నిత్యం భక్తులతో రద్దీగా ఉండే ప్రాంతంలో ఇంత భారీ చోరీ జరగడం ప్రజలను ఆలోచనలో పడేసింది. ఇప్పటికైనా దేవాదాయ శాఖ అధికారులు, ఆలయ కమిటీలు అప్రమత్తమై సీసీటీవీ కెమెరాలు, అలారం వ్యవస్థలు, రాత్రి వేళల్లో భద్రతా సిబ్బందిని ఏర్పాటు చేయాల్సిన అవసరం ఎంతైనా ఉంది. భక్తుల నమ్మకాలకు ప్రతీకలైన ఆలయాలలో ఇలాంటి ఘటనలు జరగకుండా కట్టుదిట్టమైన చర్యలు తీసుకోవాలని స్థానికులు డిమాండ్ చేస్తున్నారు.

దుర్గాదేవి ఆలయంలో భారీ చోరీ.. వెండి, బంగారు నగలను ఎత్తుకెళ్లిన దొంగలు

అల్లూరి జిల్లా పాడేరులోని దుర్గాదేవి ఆలయంలో దొంగల బీభత్సం

తలుపులను విరగగొట్టి లోపలికి ప్రవేశించిన దొంగలు

సుమారు రూ.8 లక్షల విలువైన వెండి, బంగారు ఆభరణాలు చోరీ

Major Theft at Durga Devi Temple in Alluri… pic.twitter.com/byQPJvsWzk

— BIG TV Breaking News (@bigtvtelugu) May 2, 2026