పీవీఆర్ ఐనాక్స్‌కు వెళ్తే రోగాలు గ్యారంటీ? ఆడియన్స్ ఆగ్రహం.. ఈ వీడియోలో నిజమెంత?

PVR INOX:సినిమా అంటే వినోదం.. కానీ ఆ వినోదం కోసం భారీగా డబ్బులు చెల్లించి థియేటర్‌కు వెళ్తే, అక్కడ ఎదురయ్యే చేదు అనుభవాలు ప్రేక్షకులను విసిగిస్తున్నాయి. ముఖ్యంగా హైదరాబాద్‌లోని పీవీఆర్ ఐనాక్స్ (PVR INOX) థియేటర్లలో సరైన నిర్వహణ లేకపోవడం, అపరిశుభ్రత మరియు సాంకేతిక లోపాలు ఇప్పుడు చర్చనీయాంశంగా మారాయి. “పీవీఆర్ వెళ్తే రోగాలు గ్యారంటీనా?” అనే స్థాయిలో నెటిజన్లు సోషల్ మీడియాలో తమ ఆవేదనను వ్యక్తం చేస్తున్నారు. అసలు అక్కడ ఏం జరుగుతుందో ఇప్పుడు చూద్దాం.

అకస్మాత్తుగా షోల రద్దు:

గచ్చిబౌలిలోని ప్రిజం మాల్‌తో పాటు పలు ఇతర ప్రాంతాల్లోని PVR థియేటర్లలో షోలు అకస్మాత్తుగా రద్దవుతుండటం ఇప్పుడు పెద్ద సమస్యగా మారింది. పవర్ ఫెయిల్యూర్ లేదా సాంకేతిక కారణాలు అంటూ సినిమా మొదలైన తర్వాత షోలు ఆపేయడం ప్రేక్షకులకు చిరాకు తెప్పిస్తోంది. ప్లాన్ చేసుకుని సినిమాకు వెళ్తే, మధ్యలో ఇలాంటి ఇబ్బందులు ఎదురవడం వల్ల సమయంతో పాటు డబ్బులు కూడా వృథా అవుతున్నాయని ప్రేక్షకులు వాపోతున్నారు.

అపరిశుభ్రతతో అనారోగ్య భయం:

మల్టీప్లెక్స్ అంటే మనం క్లీన్‌గా ఉంటుందని ఆశిస్తాం. కానీ పీవీఆర్ లోని వాష్ రూమ్స్ నిర్వహణ అధ్వానంగా ఉందనే వార్తలు వినిపిస్తున్నాయి. చాలా చోట్ల వాష్ రూమ్స్ పని చేయకపోవడం, విపరీతమైన దుర్వాసన రావడం వంటి సమస్యలు ఉన్నాయి. ఇక ఇలాంటి అపరిశుభ్ర వాతావరణం వల్ల ఇన్ఫెక్షన్లు వచ్చే ప్రమాదం ఉందని జనం భయపడుతున్నారు. టికెట్ల ధరలు మాత్రం ఆకాశాన్ని తాకుతున్నా, కనీసం పరిశుభ్రత పాటించకపోవడంపై ఆడియన్స్ ఆగ్రహం వ్యక్తం చేస్తున్నారు.

యాప్ సమస్యలు.. రీఫండ్ కష్టాలు:

సినిమా రద్దయినప్పుడు లేదా టికెట్ క్యాన్సిల్ చేసుకోవాలనుకున్నప్పుడు PVR యాప్ సరిగ్గా పని చేయడం లేదని ఫిర్యాదులు అందుతున్నాయి. కస్టమర్ సపోర్ట్ టీమ్ నుంచి ఎలాంటి రెస్పాన్స్ రాకపోవడంతో ప్రేక్షకులు పరేషాన్ అవుతున్నారు. ఇక టికెట్ క్యాన్సిల్ చేసే ఆప్షన్ యాప్‌లో పని చేయకపోవడం వల్ల డబ్బులు తిరిగి రావడం లేదని చాలా మంది తమ గోడును వెళ్లబోసుకుంటున్నారు. దీనిపై అడిగేందుకు థియేటర్ సిబ్బందిని కలిస్తే వారు కూడా నిర్లక్ష్యంగా సమాధానం ఇస్తున్నారని ఆరోపణలు ఉన్నాయి.

also read:దూకుడు పెంచిన గోపీచంద్.. మరో యాక్షన్ డ్రామాకి సిద్ధం!

స్క్రీన్ అలైన్‌మెంట్ మరియు సిబ్బంది తీరు:

కొన్ని చోట్ల ప్రొజెక్షన్ అలైన్‌మెంట్ సరిగ్గా లేకపోవడంతో సినిమా క్లారిటీగా కనిపించడం లేదు. స్క్రీన్ పైన బొమ్మ సరిగ్గా రాకపోయినా,సీట్స్ సరిగ్గా క్వాలిటీ లేకపోవటం, సౌండ్ సిస్టమ్ సరిగ్గా లేకపోయినా పట్టించుకునే నాథుడే లేడని ప్రేక్షకులు అంటున్నారు. ఇక వీటికి తోడు సిబ్బంది ప్రవర్తన కూడా కొన్ని చోట్ల వివాదాస్పదంగా మారింది. సమస్యల గురించి అడిగిన వారిపై సిబ్బంది అమర్యాదగా ప్రవర్తించడం పట్ల తీవ్ర స్థాయిలో విమర్శలు వస్తున్నాయి.

బ్రాండ్ ఇమేజ్ చూసి పీవీఆర్ ఐనాక్స్‌కు వెళ్తున్న ప్రేక్షకులకు వరుస షాక్‌లు తగులుతున్నాయి. మెయింటెనెన్స్ శూన్యం, హైజీన్ సమస్యలు వెరసి మల్టీప్లెక్స్ వెళ్లాలంటేనే భయపడే పరిస్థితి నెలకొంది. యాజమాన్యం ఇప్పటికైనా స్పందించి ఈ లోపాలను సరిదిద్దకపోతే, ప్రేక్షకులు ఈ థియేటర్లకు దూరమయ్యే ప్రమాదం ఉంది. మరి ఇక ఈ గొడవపై పీవీఆర్ స్పందన ఎలా ఉంటుందో వేచి చూడాలి. వినోదం పేరుతో ప్రజల ఆరోగ్యాన్ని, సమయాన్ని పణంగా పెట్టడం ఏమాత్రం సమర్థనీయం కాదు అంటున్నారు నెటిజన్స్.