Road Accident: వరినాట్ల కోసం వస్తుండగా ప్రమాదం.. స్పాట్‌లో 18 మంది కూలీలు

Road Accident: పెద్దపల్లి జిల్లా పరిధిలో శనివారం తెల్లవారుజామున ఘోర రోడ్డు ప్రమాదం చోటుచేసుకుంది. కూలీలతో వెళ్తున్న బొలెరో వాహనం అదుపుతప్పి బోల్తాపడింది. ఈ ఘటనలో 18 మంది కూలీలకు తీవ్ర గాయాలు కాగా, వారిలో ఇద్దరి పరిస్థితి విషమంగా ఉన్నట్లు సమాచారం.

వివరాల్లోకి వెళ్తే.. మహారాష్ట్రకు చెందిన కూలీలు సుల్తానాబాద్‌లో వరినాట్ల పనుల కోసం వస్తుండగా.. ఈ ప్రమాదం జరిగినట్లు తెలుస్తోంది. ఈ ఘటన సమయంలో బొలెరోలో ఎక్కువ మంది కూలీలు ఉన్నారు.

సమాచారం తెలుసుకున్న పోలీసులు ఘటనా స్థలానికి చేరుకుని క్షతగాత్రులను సమీప ఆసుపత్రికి తరలించారు. ప్రమాదం కారణంగా కొంతసేపు ఆ మార్గంలో ట్రాఫిక్‌కు అంతరాయం ఏర్పడింది. పోలీసులు ప్రమాదానికి గురైన వాహనాన్ని రోడ్డుపక్కకు తొలగించి ట్రాఫిక్‌ను పునరుద్ధరించారు. ప్రాథమికంగా డ్రైవర్ నిర్లక్ష్యం, అతివేగమే ప్రమాదానికి కారణమై ఉండొచ్చని పోలీసులు అనుమానిస్తున్నారు. అయితే పూర్తి స్థాయి దర్యాప్తు అనంతరం స్పష్టమైన కారణాలు వెల్లడిస్తామని తెలిపారు.

ఈ ఘటనపై కేసు నమోదు చేసుకున్న పోలీసులు దర్యాప్తు ప్రారంభించారు. వాహనం అనుమతికి మించి కూలీలను తీసుకెళ్లిందా, భద్రతా నిబంధనలు పాటించారా లేదా అనే కోణాల్లో విచారణ కొనసాగుతోంది.

Also Read: అమెరికాలో భారీ పేలుడు.. 3 బిల్డింగ్ లు తుక్కుతుక్కు

ప్రస్తుతం గాయపడిన కూలీలకు వైద్య చికిత్స కొనసాగుతోంది. ఇద్దరి పరిస్థితి విషమంగా ఉండటంతో వైద్యులు ప్రత్యేకంగా పర్యవేక్షిస్తున్నారు. పోలీసులు దర్యాప్తు పూర్తి చేసిన తర్వాత పూర్తి వివరాలు వెల్లడిస్తామని తెలిపారు.