Makar Sankranti 2026: సంక్రాంతి పండగ ఎప్పుడు ? తేదీ, శుభ ముహూర్తం ఇదే !

Makar Sankranti 2026: సంక్రాంతి అంటేనే తెలుగువారికి పెద్ద పండగ. ఈ సమయంలో ఆకాశంలో రంగురంగుల గాలిపటాలు, వాకిళ్లలో ముగ్గులు, గొబ్బెమ్మలు, హరిదాసుల కీర్తనలతో పల్లెలు కళకళలాడుతుంటాయి. 2026 జనవరి 15.. గురువారం నాడు సూర్యుడు మకర రాశిలోకి ప్రవేశించడంతో మకర సంక్రాంతి జరుపుకోనున్నాము. ఈ పండగ ఆధ్యాత్మికంగా కూడా ఎంతో ప్రాముఖ్యత కలిగి ఉంటుంది. ఈ సంవత్సరం సంక్రాంతి ముహూర్తం, పూజా విధానం పూర్తి వివరంగా ఇప్పుడు తెలుసుకుందాం.

మకర సంక్రాంతి 2026: ముహూర్తం, పూజా విధానం:

భారతీయ సంస్కృతిలో మకర సంక్రాంతికి ఒక విశిష్టమైన స్థానం ఉంది. సూర్యుడు ధనస్సు రాశి నుంచి మకర రాశిలోకి ప్రవేశించే ఈ సమయాన్ని ‘మకర సంక్రాంతి’ అంటారు. దీనితో ఉత్తరాయణ పుణ్యకాలం ప్రారంభమవుతుంది.

సంక్రాంతి 2026 – తేదీ, సమయం:

హిందూ పంచాంగం ప్రకారం.. జనవరి 15.. గురువారం నాడు మకర సంక్రాంతిని జరుపుకోవాలి.

సంక్రాంతి ఘడియలు: మధ్యాహ్నం 03:13 నిమిషాలకు సూర్యుడు మకర రాశిలోకి ప్రవేశిస్తాడు.

పుణ్యకాలం: మధ్యాహ్నం 03:13 నుంచి సాయంత్రం 05:45 వరకు ఉంటుంది.

మహా పుణ్యకాలం: మధ్యాహ్నం 03:13 నుంచి సాయంత్రం 04:58 వరకు ఉంటుంది.

ఈ మహా పుణ్యకాలంలో చేసే స్నానాలు, దానాలు అత్యంత ఫలప్రదమని శాస్త్రాలు చెబుతున్నాయి.

పూజా విధానం – విధివిధానాలు:

అభ్యంగన స్నానం: సూర్యోదయానికి ముందే నువ్వుల నూనెతో అభ్యంగన స్నానం చేయాలి. వీలైతే నదుల్లో స్నానం చేయడం శ్రేష్ఠం.

సూర్య ఆరాధన: రాగి పాత్రలో నీరు తీసుకుని ఎర్రటి పూలు, అక్షతలు వేసి సూర్యుడికి అర్ఘ్యం వదలాలి. ఈ సమయంలో ‘ఓం సూర్యాయ నమః‘ అని జపించాలి.

దానధర్మాలు: సంక్రాంతి నాడు దానానికి చాలా ప్రాముఖ్యత ఉంది. ముఖ్యంగా నువ్వులు, బెల్లం, కొత్త బట్టలు, ధాన్యాలను పేదలకు దానం చేయాలి.

నైవేద్యం: కొత్త బియ్యం, బెల్లం, నువ్వులతో చేసిన పొంగలిని లేదా పాయసాన్ని సూర్య భగవానుడికి నైవేద్యంగా సమర్పించాలి.

పండగ విశిష్టత – ఉత్తరాయణం:

సంక్రాంతితో ఉత్తరాయణం ప్రారంభమవుతుంది. అంటే సూర్యుడు ఉత్తర దిశగా తన ప్రయాణాన్ని ప్రారంభిస్తాడు. దేవతలకు ఇది పగటి కాలం. భీష్మ పితామహుడు కూడా ప్రాణత్యాగం చేయడానికి ఈ ఉత్తరాయణ పుణ్యకాలం కోసమే ఎదురుచూశారు. అంటే ఇది మోక్షానికి మార్గం చూపే కాలం.

వివిధ ప్రాంతాల్లో సంక్రాంతి పేర్లు:

ఈ పండగను దేశం అంతటా వివిధ పేర్లతో జరుపుకుంటారు.

ఆంధ్రప్రదేశ్, తెలంగాణ – సంక్రాంతి

తమిళనాడు – పొంగల్

పంజాబ్, హర్యానా – లోహ్రి

అసోం – మాఘ్ బిహు

గుజరాత్ – ఉత్తరాయణ్ (గాలిపటాల పండుగ)