Spiritual Wellness: బయటికి అందంగా కనిపించాలనే ఉద్దేశంతో పరిమళాలు, క్రీములు వాడుతుంటాం. కానీ తల నుంచి కాలి వేళ్ల వరకు ప్రతి అవయవం లోపల దాగి ఉన్న శక్తిని మాత్రం పెద్దగా పట్టించుకోము. అసలు మానవ శరీరం అనేది యంత్రం కాదు.. అది ప్రకృతి నిర్మించిన అద్భుత శక్తి వ్యవస్థ. ఒక చిన్న ఉదాహరణ తీసుకుంటే.. నాలుక శ్రమ లేకుండా ఉచ్చరించే ‘ఓం’ మంత్రానికి ఉన్న ప్రభావం గురించి మనకు తెలుసు. అలాగే, మన అరచేతుల్లో కూడా అంతే లోతైన శక్తి దాగి ఉంది.
మన చేతి వేళ్లు కేవలం పట్టుకోవడానికి మాత్రమే కాదు. ప్రతి వేలు ఒక మూలకానికి ప్రతీకగా భావించబడుతుంది. బొటనవేలు అగ్ని తత్వాన్ని, చూపుడు వేలు వాయు తత్వాన్ని, మధ్యవేలు ఆకాశ తత్వాన్ని, ఉంగరపు వేలు భూమి తత్వాన్ని, చిటికెన వేలు జల తత్వాన్ని సూచిస్తాయి. ఈ ఐదు వేళ్ల స్పర్శ ఏదైనా వస్తువును తాకినప్పుడు.. ముఖ్యంగా ఆహారాన్ని పట్టుకున్నప్పుడు ఆ మూలకాల సమతుల్యత చైతన్యమవుతుంది. అదే సమయంలో చేతి నరాల ద్వారా ఈ స్పందన మెదడుకు చేరి, అక్కడి నుంచి మళ్లీ శరీరమంతా వ్యాపిస్తుంది.
చేత్తో తినమని పెద్దలు చెప్పినప్పుడు.. దాన్ని మనం అలవాటు లేదా పాత పద్ధతి అనుకున్నాం. కానీ దాని వెనుక శాస్త్రం కూడా ఉంది. చేతులను ముందుగా నీటితో శుద్ధి చేసుకుని, వేళ్లతో అన్నం తినేటప్పుడు అరచేతిలోని శక్తి తరంగాలు ఆహారానికి స్పందిస్తాయని ఆయుర్వేద భావన చెబుతుంది. అన్నం జీర్ణక్రియకు అనుకూలంగా మారుతుంది. ఆహారంలో ఉన్న సూక్ష్మ లోపాలు కూడా కొంతవరకు తగ్గుతాయని నమ్మకం. ఈ రోజుల్లో స్పూన్లు ఫ్యాషన్ అయిపోయాయి కానీ.. శరీరం మాత్రం ఇంకా చేతి స్పర్శనే గుర్తుపడుతుంది.
మన చేతి వేళ్లలో శక్తి నిక్షిప్తమై ఉండటం వల్ల, మనం ఎక్కువసేపు పట్టుకునే వస్తువుల ప్రభావం మనపై పడుతుంది. జపం చేసేవాళ్లు తులసి పూసలు చేత్తో తిప్పుతూ ఎందుకు జపం చేస్తారో ఇదే కారణం. మనసుకు ప్రశాంతత కోరుకుంటారు కాబట్టి.. ఆ శక్తిని మళ్లీ చేతుల ద్వారానే మేల్కొలుపుతారు. కలం పట్టుకుంటే రాయాలని అనిపిస్తుంది, కర్ర పట్టుకుంటే అటూ ఇటూ తిప్పాలనిపిస్తుంది, చాకు పట్టుకుంటే ఏదైనా కోయాలనే ఆలోచన కలుగుతుంది. అది మన ఊహ కాదు.. చేతులు ఆ వస్తువు స్వభావాన్ని గ్రహించి, మనల్ని ఆ దిశగా ప్రేరేపిస్తాయి.
పెద్దల పాదాలకు నమస్కరించినప్పుడు, వారు చేతిని తలపై ఉంచి ఆశీర్వదిస్తారు. అక్షింతలు వేస్తారు. ఆ క్షణంలో మనకు ఒక తెలియని బలం వచ్చినట్టు అనిపిస్తుంది. అది భావోద్వేగం మాత్రమే కాదు.. వారి చేతుల్లో ఉన్న శక్తి, పంచభూతాల సాక్షిగా మనపై పడినట్టు భావిస్తారు. అందుకే ఆశీర్వచనం అంటే మాటలు మాత్రమే కాదు.. అది శక్తి బదిలీ.
పూజలు చేస్తున్న పండితులను గమనిస్తే.. దేవుడికి చేసే ప్రతి కైంకర్యం చేత్తోనే జరుగుతుంది. హారతి ఇవ్వడం, నైవేద్యం సమర్పించడం, మంత్రాల సమయంలో ప్రత్యేక ముద్రలు వేయడం ఇవన్నీ వేళ్లతోనే. భరతనాట్యం, కూచిపూడి లాంటి నాట్యాల్లో ముద్రలకు ఉన్న ప్రాధాన్యం తెలిసిందే. యోగ, ధ్యానంలో కూడా వివిధ ముద్రలు శక్తిని నియంత్రించడానికి ఉపయోగపడతాయి.
చివరికి.. మన జీవిత గమనం చెప్పే రేఖలు కూడా అరచేతిలోనే ఉంటాయి. అందుకే హస్తసాముద్రికం ద్వారా జీవన ప్రయాణాన్ని అర్థం చేసేందుకు ప్రయత్నిస్తారు. ‘నీ జీవితం నీ చేతుల్లోనే ఉంది’ అన్న మాటకు ఇదే అసలైన అర్థం. అందుకే అన్నం చేతితోనే తింటూ.. ఆ స్పర్శను ఆస్వాదించమని మన పెద్దలు చెబుతుంటారు.
Share
Chest Pain: ఛాతి నొప్పి, ఆయాసమా? ప్రతిదీ గుండెపోటు కాదు.. అసలు కారణాలు ఇవే !
Big tv kissik Talks: శివాజీ మాటల్లో తప్పేముంది..ఆయన ఉద్దేశం కరెక్టే: అరియాన
