Belpatra: శివపూజలో బిల్వపత్రం ఎందుకు తప్పనిసరి? పురాణాలు ఏం చెబుతున్నాయి?

Belpatra: హిందూ ధర్మంలో శివారాధనకు అత్యంత ప్రాముఖ్యత ఉంది. అభిషేక ప్రియుడైన శివుడిని భక్తితో ఒక్క మారేడు దళంతో పూజించినా, ఆయన సంతోషించి కోరిన కోరికలు తీరుస్తాడని శాస్త్రాలు చెబుతున్నాయి. అసలు శివుడికి మారేడు దళం అంటే ఎందుకు అంత ఇష్టం? దీని పుట్టుక వెనుక ఉన్న పురాణ రహస్యాలేమిటి? మూడు ఆకులు కలిపి ఉండే ఈ దళం వెనుక ఉన్న అంతరార్థం ఏమిటి? మహాశివరాత్రి, శ్రావణ మాసాల్లో బిల్వపత్ర పూజ ఎందుకు విశిష్టమైనది? వంటి ఆసక్తికరమైన విషయాలను  వివరంగా తెలుసుకుందాం.

శివుడికి బిల్వపత్రం ఎందుకు ఇష్టం?
మహాదేవుని ఆరాధనలో ‘బిల్వపత్రం’ ఒక ప్రధాన అంగం. సామాన్యమైన ఆకులా కనిపించినప్పటికీ.. దీనికి అనంతమైన శక్తి ఉందని వేదాలు ఘోషిస్తున్నాయి.

మారేడు దళం పుట్టుక – పురాణ గాథ:
బిల్వపత్రం పుట్టుక గురించి పురాణాల్లో ప్రధానంగా ఒక గాథ వినిపిస్తుంది. ‘లింగ పురాణం’ ప్రకారం, లక్ష్మీదేవి పరమశివుడిని పూజించడానికి సుదీర్ఘకాలం తపస్సు చేసింది. ఆ సమయంలో ఆమె శివునికి సమర్పించడానికి ఏమీ లేక తన స్థనాన్నే సమర్పించడానికి సిద్ధపడగా, ఆమె భక్తికి మెచ్చిన శివుడు ఆమెను ఆపి, ఆ స్థానంలో ఒక పవిత్రమైన వృక్షాన్ని సృష్టించాడు. అదే ‘బిల్వ వృక్షం’. లక్ష్మీదేవి తపస్సు వల్ల పుట్టింది కాబట్టి దీనిని ‘శ్రీ వృక్షం’ అని కూడా పిలుస్తారు. ఈ వృక్షం యొక్క ఆకుల్లో లక్ష్మీదేవి నివసిస్తుందని, అందుకే శివుడు దీనిని ఎంతో ఇష్టంగా స్వీకరిస్తాడని చెబుతారు.

త్రిదళం – మూడు ఆకుల అంతరార్థం:
బిల్వపత్రంలో మూడు ఆకులు ఒకే కాడకు కలిసి ఉంటాయి. దీనిని ‘త్రిదళం’ అంటారు. దీని వెనక మూడు ముఖ్యమైన అర్థాలు ఉన్నాయి.
త్రిగుణాలు: సత్వ, రజ, తమో గుణాలకు ఇది సంకేతం.
త్రిమూర్తులు: బ్రహ్మ, విష్ణు, మహేశ్వరులను ఇది సూచిస్తుంది.
ముక్కంటి చూపు: శివుని మూడు కన్నులకు (సూర్య, చంద్ర, అగ్ని నేత్రాలు) ఇది ప్రతీక. శాస్త్ర ప్రకారం, మూడు ఆకులు కలిసిన మారేడు దళాన్ని సమర్పించడం అంటే మనలోని అహంకారాన్ని, కర్మలను శివుని పాదాల చెంత ఉంచడమని అర్థం.

ప్రాముఖ్యత, పురాణ రహస్యాలు:
హాలాహలం ప్రభావం: సముద్ర మథనం సమయంలో శివుడు హాలాహలాన్ని మింగినప్పుడు, ఆయన శరీరం విపరీతమైన వేడికి గురైంది. ఆ వేడిని తగ్గించడానికి దేవతలు మారేడు దళాలను శివునిపై ఉంచారు. మారేడు ఆకులకు చలువ చేసే గుణం ఉండటంతో శివుడు శాంతించాడు.అందుకే ఆయనకు బిల్వపత్రాలతో అభిషేకం అంటే అంత ప్రీతి.
దారిద్ర్య నివారణ: “దూరతః సర్వపాపానాం.. బిల్వపత్రం శివార్పణం” అని అంటే, అన్నీ పాపాలను దూరం చేసే శక్తి బిల్వపత్రానికి ఉంది. శని దోషాలు, దారిద్ర్యం ఉన్నవారు మారేడు దళాలతో శివుడిని పూజిస్తే ఆర్థిక ఇబ్బందులు తొలగిపోతాయి.

ఆయుర్వేద విశిష్టత:
శివుడు వైద్యనాథుడు కూడా. మారేడు ఆకుల్లో అద్భుతమైన ఔషధ గుణాలు ఉన్నాయి. ఇవి డయాబెటిస్, జీర్ణక్రియ సమస్యలు, చర్మ వ్యాధులను నయం చేస్తాయి. అందుకే ఆధ్యాత్మికంగానే కాక, ఆరోగ్యపరంగా కూడా దీనిని శివుని ప్రసాదంగా భావిస్తారు.

“ఏక బిల్వం శివార్పణం” అంటే మనసు నిండా భక్తితో సమర్పించే ఒక్క మారేడు దళం మూడు జన్మల పాపాలను హరిస్తుంది. కేవలం ఆకులను సమర్పించడమే కాకుండా, శివుని లాంటి నిర్మలమైన మనస్సును అలవరచుకోవడం ఈ పూజలోని అసలు ఉద్దేశ్యం.

Share

• 
• 
• 
• 
• 
•