కరాచీలో గ్యాస్ బెలూన్లు.. ఎల్పీజీ కొరతతో ప్రమాదకరంగా స్టోరేజీ

Karachi gas balloons: ఇరాన్ యుద్ధంతో ప్రపంచ దేశాలు పెట్రోల్, డీజిల్, వంట గ్యాస్ కు తీవ్ర ఇబ్బందులు పడుతున్నాయి. ముఖ్యంగా పాకిస్తాన్ వంట గ్యాస్ కు తీవ్ర సంక్షోభం ఎదుర్కొంటుంది. గ్యాస్ సరఫరా లేకపోవడంతో.. కరాచీలోని కొన్ని ప్రాంతాల్లో ప్రజలు పైప్ లైన్ నుంచి వస్తున్న వంట గ్యాస్ ను ప్లాస్టిక్ బెలూన్లలో నిల్వ చేస్తున్నారని స్థానిక మీడియా కథనాలు ప్రసారం చేసింది. కరాచీలోని ఒరంగీ టౌన్ ప్రాంతంలోని మోమినాబాద్‌ లో గ్యాస్ ను బెలూన్ల నింపుతున్నట్లు వెలుగులోకి వచ్చింది. గ్యాస్ సరఫరా నిలిచిపోవడంతో.. ఇలా బెలూన్లలో నింపుతున్నట్లు స్థానికులు చెబుతున్నారు. గ్యాస్ పైప్ లైన్ నుంచి అప్పుడప్పుడు వస్తున్న సరఫరాను ప్రత్యేకంగా రూపొందించిన ప్లాస్టిక్ బెలూన్‌లలో నింపి, ఆ తర్వాత వాటిని వంటకు ఉపయోగిస్తున్నారు.

కరాచీలో గ్యాస్ సంక్షోభం

స్థానిక మార్కెట్లలో సుమారు రూ. 1,000 నుంచి రూ. 1,500 వరకు లభించే ఈ బెలూన్‌లను గ్యాస్ నింపుకునేందుకు ఉపయోగిస్తున్నారు. కొద్దిసేపు గ్యాస్ సరఫరా అవుతున్న సమయంలో ఈ బెలూన్లలోకి గ్యాస్ ను నింపుతున్నారు. ఇలా నింపిన గ్యాస్ ను రోజు వారీ వంటకు ఉపయోగిస్తున్నారు. కరాచీలో గ్యాస్ సంక్షోభం తీవ్రతకు ఇవి తెలియజేస్తున్నాయి. స్థిరమైన సరఫరా లేకపోవడంతో.. అనేక కుటుంబాలు కనీస అవసరాలు తీర్చుకోవడానికి కూడా ఇబ్బంది పడుతున్నాయని స్థానిక మీడియా తెలిపింది. అందుకే స్థానికులు ఇటువంటి అసాధారణమైన, ప్రమాదకరమైన పద్ధతులను పాటిస్తున్నారని పేర్కొంది.

మొబైల్ బాంబులు

ప్లాస్టిక్ బెలూన్లలో గ్యాస్‌ను నిల్వ చేయడం చాలా ప్రమాదకరమని నిపుణులు అంటున్నారు. వీటిని ‘మొబైల్ బాంబ్’ లుగా తెలిపారు. చిన్నపాటి రాపిడి, వేడి లేదా నిప్పురవ్వ భారీ పేలుడుకు దారితీస్తుందని తెలియజేశారు. నివాస ప్రాంతాలలో ఇలాంటి వాటితో భారీ ప్రమాదాలు జరగవచ్చని హెచ్చరించారు. ఇళ్లలో ఇలాంటి గ్యాస్ బెలూన్లు ఉండటం అగ్ని ప్రమాదాల భయాలను పెంచుతాయంటున్నారు. అధికారులు తక్షణమే జోక్యం చేసుకోవాలని నిపుణులు కోరుతున్నారు.

యూఎస్-ఇరాన్ యుద్ధంతో ప్రపంచ ఇంధన సరఫరా చైన్ ప్రభావితం అవుతున్నాయి. దీంతో భౌగోళిక రాజకీయ ఉద్రిక్తతలు చోటు చేసుకుంటున్నాయి. అమెరికా, ఇరాన్‌ల మధ్య కొనసాగుతున్న సంఘర్షణ, ప్రపంచ చమురు రవాణాకు కీలక మార్గమైన హార్మూజ్ జలసంధి దిగ్బంధంతో చమురు, గ్యాస్ సరఫరాకు అంతరాయం ఏర్పడింది.

Also Read: ఇరాన్ యుద్ధం టెన్షన్ మొదలు.. గ్యాస్ కష్టాలు మళ్లీ రెట్టింపు, కేంద్రం కీలక నిర్ణయాలు