US Praising Pakistan| ప్రపంచ దేశాలన్నీ ఉగ్రవాదాన్ని పాకిస్తాన్ పెంచి పోషిస్తోందని చెబుతుంటే.. అమెరికా అధికారులు మాత్రం దానికి వ్యతిరేకంగా వ్యాఖ్యలు చేస్తున్నారు. ఉగ్రవాదాన్ని అంతం చేసేందుకు అమెరికా చేస్తున్న పోరాటంలో పాకిస్తాన్ తమతో కలిసి గొప్పగా పోరాడుతోందని చెప్పారు.
అమెరికా సెంట్రల్ కమాండ్ కమాండర్ జనరల్ మైఖేల్ కురిల్లా.. పాకిస్తాన్‌ను ఉగ్రవాద వ్యతిరేక పోరాటంలో “గొప్ప భాగస్వామి”గా ప్రశంసించారు. ఆయన అమెరికా కాంగ్రెస్‌లో (పార్లమెంటులో) బుధవారం సాయంత్రం ఇచ్చిన సాక్ష్యంలో ఈ వ్యాఖ్యలు చేశారు. ఈ వ్యాఖ్యలు భారత్‌లో అసంతృప్తిని కలిగించవచ్చు, ఎందుకంటే భారత్.. ఇటీవల పాకిస్తాన్‌ను దౌత్యపరంగా ఒంటరిగా చేయడానికి ప్రపంచవ్యాప్తంగా ప్రయత్నాలు చేస్తోంది. ఏప్రిల్‌లో జమ్మూ కాశ్మీర్‌లోని పహల్గామ్‌లో జరిగిన ఉగ్రదాడి తర్వాత ఈ ప్రయత్నాలు మరింత ఊపందుకున్నాయి.
జనరల్ కురిల్లా మాట్లాడుతూ.. “పాకిస్తాన్ ప్రస్తుతం ఉగ్రవాద వ్యతిరేక పోరాటంలో చురుకుగా పనిచేస్తోంది. పాకిస్తాన్ అధికారులు మాతో కలిసి అద్భుతంగా పనిచేస్తున్నారు,” అని చెప్పారు. హౌస్ ఆర్మ్డ్ సర్వీసెస్ కమిటీ ముందు ఆయన సాక్ష్యంగా వ్యవహరిస్తూ.. ఆయన భారత్, పాకిస్తాన్‌లతో సంబంధాలను కొనసాగించాలని వాదించారు. “మనం భారత్, పాకిస్తాన్‌లతో సంబంధాలను విడదీసి చూడకూడదు. ఒక దేశంతో సంబంధం ఉంటే మరొక దేశంతో ఉండకూడదనే ఆలోచన సరికాదు,” అని ఆయన అన్నారు.
ఏప్రిల్ 22న పహల్గామ్‌లో జరిగిన ఉగ్రదాడిలో 26 మంది ప్రాణాలు కోల్పోయారు. దీనికి ప్రతీకారంగా భారత్ మే 7న పాకిస్తాన్, పాక్ ఆక్రమిత కాశ్మీర్‌లోని ఉగ్రవాద మౌలిక సదుపాయాలపై ఖచ్చితమైన దాడులు చేసింది. మే 10న రెండు దేశాల సైనిక డైరెక్టర్ జనరల్స్ మధ్య ఒప్పందం కుదిరిన తర్వాత ఈ దాడులు ముగిశాయి.
కురిల్లా పాకిస్తాన్ సైన్యం ఐసిస్-ఖొరాసాన్ ఉగ్రవాదులపై చేస్తున్న కార్యకలాపాలను ప్రశంసించారు. పాక్ ఆర్మీ చీఫ్ జనరల్ అసీమ్ మునీర్ నాయకత్వంలో పాకిస్తాన్, ఆఫ్ఘనిస్తాన్-పాకిస్తాన్ సరిహద్దులో డజన్ల కొద్దీ ఆపరేషన్లు చేసిందని చెప్పారు. ఐసిస్-ఖొరాసాన్ అనేది అమెరికా సహా ప్రపంచవ్యాప్తంగా దాడులు చేయడానికి ప్రయత్నిస్తున్న ఉగ్రవాద సంస్థ అని ఆయన తెలిపారు.
“పాకిస్తాన్‌తో మా భాగస్వామ్యం ద్వారా, వారు ఐసిస్-ఖొరాసాన్ ఉగ్రవాదులను లక్ష్యంగా చేసుకుని, డజన్ల కొద్దీ మందిని చంపారు. మా ఇంటెలిజెన్స్ సహాయంతో ఐదుగురు కీలక ఉగ్రవాదులను పట్టుకున్నారు,” అని కురిల్లా చెప్పారు. 2021లో కాబూల్ విమానాశ్రయంపై జరిగిన ఆత్మాహుతి దాడిలో 13 అమెరికన్ సైనికులు, 160 మంది సామాన్య ప్రజలు మరణించారు. ఈ దాడిలో పాల్గొన్న మహమ్మద్ షరీఫుల్లా అలియాస్ జాఫర్‌ను పాకిస్తాన్ అరెస్టు చేసింది. “అతడిని పట్టుకున్న తర్వాత, జనరల్ మునీర్ నాకు ఫోన్ చేసి.. ‘మేము అతడిని అమెరికాకు అప్పగిస్తాం’ అని చెప్పారు,” అని కురిల్లా తెలిపారు.
పాకిస్తాన్ కూడా ఉగ్రవాదం వల్ల భారీ నష్టం చవిచూసింది. 2024 ప్రారంభం నుండి 1,000కి పైగా ఉగ్రదాడులు జరిగాయి, దీనిలో 700 మంది భద్రతా సిబ్బంది, 2,500 మంది సామాన్య ప్రజలు మరణించారని కురిల్లా చెప్పారు.
Also Read: దూసుకుపోతున్న భారత్ జిడిపీ.. సంతోషించాల్సిన విషయం కాదు.. నిపుణుల హెచ్చరిక
అయితే.. పాకిస్తాన్‌పై భారత్ దౌత్యపరమైన ఒత్తిడిని కొనసాగిస్తోంది. పహల్గామ్ దాడి తర్వాత.. 33 దేశాలకు భారత్ తన బృందాలను పంపి, పాకిస్తాన్ ఉగ్రవాదాన్ని ప్రోత్సహిస్తోందని ఆరోపించింది. విదేశాంగ మంత్రి జైశంకర్ బ్రస్సెల్స్‌లో మాట్లాడుతూ,, ఉగ్రవాదంపై భారత్ జీరో టాలరెన్స్ విధానాన్ని అనుసరిస్తుందని.. పాకిస్తాన్ ఇలాంటి దాడులు కొనసాగిస్తే తిరిగి దాడి చేయడానికి వెనుకాడబోమని హెచ్చరించారు.
“ఉగ్రవాదం పాకిస్తాన్‌లోనే ఆగిపోదు, అది పశ్చిమ దేశాలను కూడా చేరుకుంటుంది. ఒకప్పుడు ప్రపంచమంతా ఒసామా బిన్ లాడెన్ కోసం గాలిస్తుంటే.. అతను మాత్రం పాకిస్తాన్‌లోని సైనిక పట్టణంలో సురక్షితంగా ఎందుకు ఉన్నాడు? ఇది కేవలం భారత్-పాకిస్తాన్ సమస్య కాదు, ప్రపంచవ్యాప్త ఉగ్రవాద సమస్య,” అని జైశంకర్ అన్నారు.
Share
Brahmamudi Serial Today June 12th: ‘బ్రహ్మముడి’ సీరియల్‌: రుద్రాణికి షాక్ ఇచ్చిన స్వప్న - రూంలో బంధీ అయిపోయిన రుద్రాణి
Shilpa Shetty: సాగర తీరాన విహరిస్తూ.. 50 ఏళ్లలో కూడా 16లా!
