Oily Skin: ఆయిలీ స్కిన్ కోసం..బెస్ట్ ఫేస్ ప్యాక్స్

Oily Skin: ఆయిలీ స్కిన్ అనేది చాలా మందికి సాధారణంగా ఉండే సమస్య. దీని వల్ల ముఖం ఎప్పుడూ జిడ్డుగా, నిగనిగలాడుతూ ఉంటుంది. దీంతో పాటు మొటిమలు, బ్లాక్‌హెడ్స్ వంటి సమస్యలు కూడా వచ్చే అవకాశం ఉంటుంది. అయితే.. ఈ సమస్యకు ఖరీదైన క్రీమ్‌లు, ఫేస్ వాష్‌లకు బదులుగా ఇంట్లో ఉండే సహజ పదార్థాలతో సులభంగా పరిష్కారం కనుగొనవచ్చు. ఇవి చర్మానికి ఎటువంటి సైడ్ ఎఫెక్ట్స్ కలిగించవు. అంతే కాకుండా జిడ్డును తగ్గించి, మెరుపును అందిస్తాయి.

1. శనగపిండి, పెరుగు ఫేస్ ప్యాక్:
శనగపిండి అనేది చర్మంపై ఉండే అదనపు నూనెను తొలగించడంలో అద్భుతంగా పనిచేస్తుంది. పెరుగు చర్మాన్ని మృదువుగా, కాంతివంతంగా ఉంచుతుంది.

కావాల్సినవి:
శనగపిండి: 2 టేబుల్ స్పూన్లు

పెరుగు: 1 టేబుల్ స్పూన్

తయారీ విధానం:
ఒక గిన్నెలో శనగపిండి, పెరుగు కలిపి మెత్తని పేస్ట్ లా చేయండి. ఈ పేస్ట్‌ను ముఖం, మెడపై అప్లై చేసి 15-20 నిమిషాలు ఆరనివ్వండి. తర్వాత గోరువెచ్చని నీటితో కడిగేయండి. ఈ ప్యాక్‌ను వారానికి రెండు సార్లు వాడటం వల్ల మంచి ఫలితాలు ఉంటాయి.

2. ముల్తానీ మట్టి, గులాబీ నీరు ఫేస్ ప్యాక్
జిడ్డు చర్మానికి ముల్తానీ మట్టి ఒక గొప్ప వరం. ఇది చర్మంపై ఉండే నూనెను పీల్చుకుని, రంధ్రాలను శుభ్రం చేస్తుంది. గులాబీ నీరు చర్మాన్ని చల్లబరచి, రిఫ్రెష్ చేస్తుంది.

కావాల్సినవి:
ముల్తానీ మట్టి: 2 టేబుల్ స్పూన్లు
రోజ్ వాటర్ : సరిపడా

తయారీ విధానం:
ముల్తానీ మట్టిలో రోజ్ వాటర్ కలిపి పేస్ట్ లా చేయండి. ఈ పేస్ట్‌ను ముఖంపై సమానంగా పట్టించి 15 నిమిషాలు ఆరనివ్వండి. ప్యాక్ పూర్తిగా ఆరిన తర్వాత చల్లని నీటితో కడిగేయండి. ఈ ప్యాక్ చర్మాన్ని బిగుతుగా చేసి, మొటిమలను నివారిస్తుంది.

3. టమాటో, నిమ్మరసం ప్యాక్:
టమాటోలో యాస్ట్రింజెంట్ గుణాలు ఉంటాయి. ఇవి చర్మంపై ఉండే నూనెను నియంత్రిస్తాయి. నిమ్మరసంలోని విటమిన్ సి చర్మాన్ని శుభ్రపరిచి, రంధ్రాలను మూసివేయడంలో సహాయపడుతుంది.

కావాల్సినవి:
టమాటా గుజ్జు: 1 టేబుల్ స్పూన్
నిమ్మరసం: అర టీస్పూన్

తయారీ విధానం:
టమాటో గుజ్జులో నిమ్మరసం కలిపి ముఖానికి రాసుకోండి. 10-15 నిమిషాలు ఉంచి చల్లని నీటితో కడిగేయండి. సున్నితమైన చర్మం ఉన్నవారు నిమ్మరసం వాడకపోవడం మంచిది.

ఈ ఫేస్ ప్యాక్స్ మీ చర్మం తత్వాన్ని బట్టి ఎంచుకోవచ్చు. వీటిని క్రమం తప్పకుండా వాడటం వల్ల జిడ్డు చర్మం సమస్య తగ్గడమే కాకుండా.. చర్మం ఆరోగ్యంగా, కాంతివంతంగా మారుతుంది. అయితే.. ఏదైనా కొత్త ప్యాక్ ఉపయోగించే ముందు మీ చర్మంపై చిన్న ప్రాంతంలో పరీక్షించుకోవడం మంచిది.