ప్రతి ఇంట్లో ఎన్నో సమస్యలు ఉంటాయి. కేవలం మహిళలకే కాదు పురుషులు కూడా ఎన్నో బాధలు పడుతూ ఉంటారు. అలాంటి ఒక వ్యక్తి తన బాధను ఇలా చెప్పుకున్నాడు. దానికి మానసిక నిపుణులు సలహాను కూడా అందించారు.
ప్రశ్న: నాది ప్రేమ వివాహం. పెళ్లికి ముందు నేను ఎక్కువ జీతం వచ్చే ఉద్యోగంలో ఉండేవాన్ని. కాకపోతే అప్పుడు నా గర్ల్ ఫ్రెండ్ గా ఉన్న ఇప్పటి నా భార్య తనతో సమయం గడపడం లేదని అడిగింది. ఆమె తక్కువ జీతం వచ్చినా ఫరవాలేదు… ఎక్కువ సమయం తనతో గడిపేలా చిన్న ఉద్యోగం వెతుక్కోమని చెప్పింది. ఆమె కోసం నేను ఎక్కువ జీతం వచ్చే ఉద్యోగాన్ని వదిలి చిన్న ఉద్యోగంలో చేరాను. మూడేళ్ల పాటు మేము డేటింగ్ చేశాక పెళ్లి చేసుకున్నాను. ఆమె కూడా ఉద్యోగం చేస్తోంది. పెళ్ళికి ముందు ఆమెకు సమస్యగా కనిపించని నా జీతం.. ఇప్పుడు పెద్ద సమస్యగా మారిపోయింది. నేను తక్కువ సంపాదిస్తున్నానని నన్ను చాలా అగౌరవంగా చూస్తోంది. బంధువులు ముందు కూడా చాలా తక్కువ చేసి మాట్లాడుతోంది.
నువ్వు తెచ్చే జీతం ఖర్చులకే సరిపోదు.. ఇంకా ఎలా బతుకుతామో.. అంటూ మాట్లాడుతోంది. వాళ్ళ తల్లిదండ్రులకు కూడా నా గురించి చాలా చులకన చేసి చెబుతోంది. నిజానికి ఆమె వల్లే నేను మంచి జీవితాన్ని వదిలి తక్కువ జీతంలోకి వచ్చాను. ఇప్పుడు ఆమెకు నేను నచ్చడం లేదు. నేను సంపాదించే డబ్బులు పైనే ధ్యాసంతా ఉంది. ఆమె నాకన్నా ఎక్కువ సంపాదించడం వల్ల ఆ విషయాన్ని కూడా పదే పదే ఎత్తిచూపుతోంది. భార్య సంపాదనపై పడి బతుకుతున్నావు అంటూ వెక్కిరిస్తోంది. ఇలా అనడం వల్ల నా మానసిక ఆరోగ్యం కూడా దెబ్బతింటుంది. ఆమెను నేను నిజంగా ప్రేమిస్తున్నాను. ఈ కారణంగా వదిలేయాలనిపించడం లేదు. అలా అని ఆమెను భరించడం కూడా కష్టంగానే ఉంది. ఏం చేయమంటారు?
జవాబు: మీరు సంపాదించే జీతం మీ ఇంట్లో మీ ఇద్దరి ఖర్చులకు సరిపోవడంలేదని మీ భార్య మిమ్మల్ని తక్కువగా చూస్తోంది. ఆమె గతాన్ని మర్చిపోయింది. ఆ గతాన్ని ఆమెకు అందంగా గుర్తు చేయండి. మూడేళ్ల డేటింగ్ లో తక్కువ జీతం అయినా కూడా మీరు ఎంత ఆనందంగా జీవించారో చెప్పండి. తనకు సహకారం అందిస్తే తప్పకుండా ఎక్కువ జీతం ఉండే ఉద్యోగానికి వెళతానని, అంతవరకు సమయం కావాలని కోరండి. భర్త, భార్య ఇంట్లో సమానమే. భర్తకు కష్టం వచ్చినప్పుడు భార్య ఆదుకోవడం, భార్యకు కష్టం వచ్చినప్పుడు భర్త ఆదుకోవడం అనేది పెళ్లిలో చేసుకున్న ప్రమాణాల్లో ముఖ్యమైనది. అది ఆమెకు అర్థమయ్యేలా చెప్పండి. మనిషి ముఖ్యమో, జీతం ముఖ్యమో ఆమెను కూర్చోబెట్టి అడగండి. ఇలాంటి విషయాలు గొడవలు పడితే పెద్దవవుతాయి. అదే కూర్చొని సామరస్యంగా మాట్లాడుకుంటే చాలా వరకు సమస్య పోతాయి.
మీ భార్య మిమ్మల్ని తిట్టిందని మీరు మానసిక ఆవేదనకు గురి కావడం వల్ల ఎలాంటి ఉపయోగం లేదు. మీ జీతం తక్కువ అనే అంశం ఆమెలో ఎందుకంత మానసిక వేదనకు గురిచేస్తుందో మాట్లాడండి. మీరు ఆమె కోసమే కష్టపడుతున్నారని చెప్పండి. అలాగే అవకాశాలు వెతుకుతున్నట్టు తప్పకుండా మంచి జీతం వచ్చే ఉద్యోగానికి భవిష్యత్తులో వెళ్తానని ఆమెకు నమ్మకం కలిగించండి. అంతేకాదు మీ ఇద్దరినీ విడివిడిగా చూసుకోకండి. మీ ఇద్దరూ ఒకటే అన్న విషయం ఆమెకు అర్థం అయ్యేలా చెప్పండి. అలాగే మీ ఇద్దరూ జీతాలు కలిపితే మీరు బతకడానికి సరిపోతుందో లేదో చూడండి.
Share
Rice Storage: బియ్యంలో పురుగులు పడుతున్నాయా ? ఇలా చేస్తే ప్రాబ్లమ్ సాల్వ్
Slow Dating: ఈరోజు డేటింగ్ చేసి రేపు పెళ్లి చేసుకుంటే ఎలా గురూ? ఈ చిట్కా పాటిస్తే మీ లైఫ్ సేఫ్!
