Rava Kesari: రవ్వ కేసరి మిక్స్‌ను ఇలా తయారుచేసి పెట్టుకుంటే ఎప్పుడు కావాలంటే అప్పుడు ఈ స్వీట్ చేసుకోవచ్చు

Rava Kesari: రవ్వ కేసరి స్వీట్ కు అభిమానులు ఎక్కువ. కానీ ఒక్కోసారి తినాలనిపించినా బద్ధకంతో చేసుకోరు. అలాంటివారు రవ్వ కేసరి ప్రీమిక్స్ ను ముందే తయారు చేసి పెట్టుకుంటే ఎప్పుడు తినాలనిపిస్తే అప్పుడు 10 నిమిషాల్లో ఈ స్వీట్ ను రెడీ చేసుకోవచ్చు. ఈ రవ్వ కేసరి ప్రీమిక్స్‌ను ఒకసారి తయారు చేసి పెట్టుకుంటే మూడు నెలల పాటు తాజాగా ఉంటుంది. రుచిలో కూడా అద్భుతంగా ఉంటుంది. రవ్వ కేసరి ప్రీమిక్స్ రెసిపీ ఎలాగో ఇక్కడ ఇచ్చాము. దీన్ని ఫాలో అయిపోండి.

ఉప్మా రవ్వ – పావు కిలో

నెయ్యి – ఒక కప్పు

మిల్క్ పౌడర్ – అరకప్పు

డ్రై ఫ్రూట్స్ – అరకప్పు

పంచదార – ఒక కప్పు

యాలకుల పొడి – ఒక స్పూను

నీళ్లు – తగినన్ని

⦿ స్టవ్ మీద కళాయి పెట్టి ఒక స్పూను నెయ్యి వేయాలి.

⦿ ఆ నెయ్యిలో డ్రై ఫ్రూట్స్ అన్నింటినీ వేయించుకొని తీసి పక్కన పెట్టుకోవాలి.

⦿ ఇప్పుడు అదే కళాయిలో కప్పు నెయ్యి వేసి రవ్వను వేసి రంగు మారేవరకు వేయించుకోవాలి.

⦿ ఇప్పుడు అదంతా చల్లగా అయ్యేవరకు వదిలేయాలి.

⦿ ఆ రవ్వలోనే పంచదార, ముందుగా వేయించి పెట్టుకున్న డ్రై ఫ్రూట్స్, పాల పౌడర్, యాలకులపొడి వేసి బాగా కలుపుకోవాలి.

⦿ అంతే రవ్వ కేసరి ప్రీమిక్స్ రెడీ అయినట్టే.

⦿ దీన్ని ఒక డబ్బాలో వేసి మూత పెట్టుకోవాలి.

⦿ గాలి చొరబడకుండా చూసుకోవాలి.

⦿ గాలి వెళ్తే అది పాడయ్యే అవకాశం ఉంటుంది.

⦿ ఎప్పుడైతే మీరు రవ్వ కేసరి స్వీట్ చేయాలనుకుంటున్నారో అప్పుడు స్టవ్ మీద చిన్న గిన్నె పెట్టి అందులో నీళ్లు వేయాలి.

⦿ ఆ నీళ్లల్లో మూడు రేకులు కుంకుమపువ్వు వేసుకోవాలి.

⦿  అవి మరుగుతుండగా పక్కన మరొక బర్నర్ మీద కళాయి పెట్టి ఒక స్పూను నెయ్యి వేయాలి.

⦿ ఆ నెయ్యిలో ప్రీమిక్స్ కొంత తీసుకొని వేసి వేయించుకోవాలి.

⦿ కుంకుమపువ్వుల నానబెట్టిన నీటిని రెడీ చేసుకోవాలి.

⦿ కళాయిలోని రవ్వలో ఈ నీటిని వేసి ఇది చిక్కగా అయ్యేవరకు, గట్టిపడే వరకు అలా కలుపుతూ ఉండాలి.

⦿  హల్వాలాగా అయ్యాక స్టవ్ ఆఫ్ చేయాలి.

⦿  అంతే టేస్టీ రవ్వ కేసరి రెడీ అయినట్టే. మీకు ఎప్పుడు కావాలంటే అప్పుడు దీంతో రవ్వ కేసరి స్వీట్ చేసుకొని తినేయవచ్చు.

ముఖ్యంగా పండగల సమయంలో, ఇంటికి అతిధులు వచ్చినప్పుడు ఈ రవ్వ కేసని ప్రీమిక్స్ చాలా ఉపయోగపడుతుంది. ఎక్కువ టైం కష్టపడాల్సిన అవసరం లేకుండా సింపుల్ గా ఈ రెసిపీ సిద్ధమైపోతుంది. ఒకసారి మీరు ప్రయత్నించి చూడండి.